بولاشاق باعدارلاماسى: بارلىق كۆوتالار قىسقارادى، شەت تىلىنە قويىلاتىن تالاپ كۇشەيەدى

كوميسسيا وتىرىسىندا ءبىلىم جانە عىلىم ءمينيسترى اسحات ايماعامبەتوۆتىڭ شەتەلدە كادرلار دايارلاۋ جونىندەگى رەسپۋبليكالىق كوميسسيانىڭ حاتتامالىق تاپسىرمالارىنىڭ ورىندالۋى تۋرالى ەسەبى تىڭدالدى، سونداي-اق، «بولاشاق» حالىقارالىق ستيپەندياسىن ىسكە اسىرۋعا قاتىستى ءبىرقاتار ماسەلەلەر قارالدى.

كونكۋرسقا قاتىسۋعا ارنالعان قۇجاتتار «بولاشاق» حالىقارالىق ستيپەندياسىن تاعايىنداۋ ءۇشىن ۇمىتكەرلەردى ىرىكتەۋدىڭ جاڭا قاعيدالارىنا سايكەس قابىلدانادى.

قاعيدالاردا مىنا وزگەرىستەر كوزدەلگەن: باسىم ماماندىقتار تىزبەسى ەڭبەك نارىعىنداعى قاجەتتىلىك بولجامىن ەسكەرە وتىرىپ قالىپتاستىرىلادى، اۋىلدىق ەلدى مەكەندەردەن شىققان ۇمىتكەرلەردى قوسپاعاندا، ۇمىتكەرلەر «بولاشاق» حالىقارالىق ستيپەندياسى شەڭبەرىندە ۇسىنىلاتىن شەتەلدىك جەتەكشى جوعارى وقۋ ورنىنان باسىم ماماندىققا وقۋ ءۇشىن شارتسىز شاقىرۋ ۇسىنۋ، شەتەلدىك جوعارى وقۋ ورنىنان شارتسىز شاقىرۋى بار ۇمىتكەر ءۇشىن GPA تالاپتارىن الىپ تاستاۋ، كونكۋرستىق ىرىكتەۋ كەزەڭدەرىن التى تۋردان ءۇش تۋرعا دەيىن قىسقارتۋ، قولدانىستاعى بارلىق كۆوتالىق ساناتتاردى قىسقارتۋ، اعىلشىن تىلىندە الدىن الا تىلدىك دايىنداۋ قازاقستاندا تەك اۋىلدىق ەلدى مەكەندەردەن شىققان ۇمىتكەرلەر ءۇشىن عانا جۇزەگە اسىرىلاتىن بولادى.

بۇل رەتتە شەت ءتىلىن مەڭگەرۋ دەڭگەيىنە قويىلاتىن تالاپتار كۇشەيتىلەدى. سونىمەن قاتار، «بولاشاق» حالىقارالىق ستيپەندياسىن ىسكە اسىرۋدىڭ جاڭا تاسىلدەرى ەنگىزىلەدى. جاڭا تاسىلدەر «بولاشاق» ستيپەندياسىنا كونكۋرستىق ىرىكتەۋ تەتىكتەرىن جەتىلدىرۋ مەن اۆتوماتتاندىرۋدى «پرەزيدەنتتىك جاستار كادرلىق رەزەرۆىنە» ىرىكتەۋ ءتاسىلى بويىنشا جۇرگىزۋدى كوزدەيدى.

وتىرىس قورىتىندىسى بويىنشا قىرىمبەك كوشەربايەۆ اسىرەسە «بولاشاق» ستيپەنديانتتارىنىڭ وقۋ جانە ەڭبەكپەن وتەۋ پروتسەسىنە باقىلاۋ مەن مونيتورينگ جۇرگىزۋدى كۇشەيتۋ جانە مەملەكەت باسشىسى قاسىم- جومارت توقايەۆتىڭ بيىلعى 27-مامىردا ۇلتتىق قوعامدىق سەنىم كەڭەسىندە بەلگىلەگەن مىندەتتەردى ىسكە اسىرۋ بويىنشا ءبىرقاتار ناقتى تاپسىرما بەردى.