17:50, 29 - مامىر 2020 | GMT +6
قازاقستاندا كينوتەاترلار جۇمىسى قايتا جاندانادى
نۇر-سۇلتان. قازاقپارات - ۆەدومستۆوارالىق كوميسسيا ءبىرقاتار مەكەمەلەردىڭ جۇمىسىن جانداندىرىپ، بلوكپوستاردى اشۋ تۋرالى شەشىم قابىلدادى، دەپ حابارلايدى قازاقپارات ۇكىمەتتىڭ رەسمي سايتىنا سىلتەمە جاساپ.
سوعان سايكەس، 2020 -جىلدىڭ 1-ماۋسىمىنان باستاپ ايماقارالىق بلوكپوستار اشىلادى، قازاقستاننىڭ ءىرى قالالارى مەن وبلىس ورتالىقتارىنا تەمىرجول تاسىمالى قاتىنايدى، سونىمەن قاتار جولاۋشىلار تاسىمالدايتىن ايماقارالىق اۆتوبۋستاردىڭ جۇمىسى جاندانادى. جولاۋشىلاردى تاسىمالداۋ بەكىتىلگەن سانيتارلىق تالاپتارعا ساي جۇزەگە اسادى. فيتنەس جانە س پ ا ورتالىقتارى جۇمىسىن باستايدى. سپورتتىق جانە مادەني ءىس- شارالار ۇيىمداستىرىلادى، ءبىراق كورەرمەنسىز وتەدى. مەكتەپكە دەيىنگى ءبىلىم بەرۋ مەكەمەلەرى، قوسىمشا ءبىلىم بەرۋ ۇيىمدارى (ءبىر توپتا 15 ادامنان كوپ ەمەس) جانە عىلىمي- زەرتتەۋ ينستيتۋتتارى مەن عىلىمي ورتالىقتاردىڭ جۇمىسى جاندانادى. 15 ماۋسىمنان باستاپ كينوتەاترلار كورەرمەندەرگە ەسىگىن ايقارا اشادى. ءبىراق سانيتارلىق تالاپتاردىڭ ساقتالۋى مىندەتتەلەدى.