پاندەميادان كەيىن الپاۋىت كومپانيالار جۇمىس كەڭسەلەرىنەن باس تارتۋى مۇمكىن

ونلاين ساۋدا، قاشىقتان ءبىلىم بەرۋ ۇدەرىسى دامىدى. مۇنداي جاڭاشىلدىق ەڭبەك نارىعىن دا اينالىپ وتپەدى. پاندەميادان كەيىن الپاۋىت كومپانيالار جۇمىس كەڭسەلەرىنەن تولىقتاي باس تارتۋى مۇمكىن. ويتكەنى كارانتين كەزىندە قىزمەتكەرلەردىڭ باسىم بولىگى قاشىقتان جۇمىس ىستەگەن. - كوروناۆيرۋس كەڭسەدەگى قىزمەتتى تولىعىمەن جويدى دەپ ايتۋعا بولا ما؟

- ازىرگە ناق ايتۋ قيىن. دەگەنمەن، Facebook, Twitter سىندى الپاۋىت كومپانيالار بولاشاقتا قاشىقتان جۇمىس ىستەۋ ءتارتىبىن ەنگىزەمىز دەپ وتىر. پاندەمياعا دەيىن جاھان جۇرتشىلىعى ءومىرىنىڭ ۇشتەن ءبىر بولىگىن كەڭسەلەردە وتكىزۋشى ەدى. ءبىراق كارانتين كەزىندە ولاردىڭ باسىم بولىگى ۇيدەن جۇمىس ىستەۋگە كوشتى. پاندەميا اياقتالعان سوڭ جۇمىس بەرۋشىلەر «كەڭسەدەن باس تارتامىز» دەپ وتىر. ويتكەنى قىزمەتكەرلەر ۇيدە وتىرىپ- اق ءوز مىندەتتەرىن تولىقتاي ورىنداپ وتىرعان.

سوندىقتان Barclays بانكىنىڭ باسشىسى ارتىق جىلجىمايتىن مۇلىكتەرىنەن باس تارتاتىن بولدى. بريتاندىق كاسىپكەر مارتين سورەلل بولسا، كەڭسە جالداۋعا كەتكەن 35 ميلليون فۋنت قارجىنى قىزمەتكەرلەرگە جۇمسايمىن دەپ وتىر. كەڭسەسىز كاسىبىن دوڭگەلەتۋ باستاماسىن Facebook- ءتىڭ باس ديرەكتورى مارك سۋكەربەرك تە قولدادى.

مارك سۋكەربەرگ، Facebook كومپانياسىنىڭ باس ديرەكتورى:

- COVID-19 پاندەمياسى ءبىزدىڭ قالىپتى تىرشىلىگىمىزگە ايتارلىقتاي وزگەرىس اكەلدى. بۇگىندە Facebook كومپانياسى قىزمەتكەرلەرىنىڭ %95- ءى قاشىقتان جۇمىس ىستەپ وتىر. جالپى وسى جىلدىڭ سوڭىنا دەيىن بۇل تاجىريبە وزەكتى بولادى. سەبەبى، كەڭسە اشىلسا دا، قاشىقتىقتى ساقتاۋ ءتارتىبى بار. ءبارىبىر بارلىق قىزمەتكەر كەڭسەگە ورالا المايدى. جالپى قاشىقتان جۇمىس ىستەۋ ۇدەرىسىن بولاشاقتا قالىپتى جاعدايعا اينالدىرۋعا تىرىسامىز.

Facebook قانا ەمەس، الەمدەگى ءبىرقاتار الپاۋىت كومپانيالار قازىر قاشىقتان قىزمەت ەتۋگە كوشكەن Amazon مەن Microsoft كومپانياسى قازان ايىنا دەيىن، Google قىزمەتكەرلەرى جىل سوڭىنا دەيىن ۇيدەن قىزمەت كورسەتەدى. Twitter باسشىسى دجەك دورسي بولسا، «قىزمەتكەرلەر قالاۋى بويىنشا ماڭگى باقي قاشىقتان قىزمەت ەتە الادى» دەپ مالىمدەمە جاسادى.

بۇل ورايدا ساراپشى پىكىرىن تىڭداپ كورەيىك.

بريۋس دەيسلي، ساراپشى:

- جاقىن كۇندەرى ءبىر كومپانيانىڭ قىزمەتكەرىمەن سۇحباتتاستىم. بۇرىن كەڭسەگە كۇندەلىكتى 1400 قىزمەتكەر كەلسە، ءازىر وندا 30 ادام عانا جۇمىس ىستەپ وتىر ەكەن. قالعاندارى قاشىقتان قىزمەت ەتەدى. ودان كاسىپ توقتاپ قالعان جوق. جۇمىستىڭ ساپاسى جاقسارماسا، كەمىمەگەن. سوندىقتان مەنىڭ ويىمشا، كەڭسە جالداۋ دەگەن بۇرىنعىنىڭ ەنشىسىندە قالادى. ەندى كوبى قاشىقتان قىزمەت ەتۋگە كوشەدى.

جانسۇلۋ دۇيسەنالى، ءتىلشى:

- ءيا، بۇگىندە كاسىپكەرلەر قاشىقتان قىزمەت كورسەتۋدىڭ ءتيىمدى ەكەنىن ءتۇسىندى. ەڭ باستىسى، كەڭسە جالداۋعا قانشاما قارجىنى ۇنەمدەپ قالماق. ال، جينالىستى ونلايىن وتكىزۋگە مۇمكىندىك بار. دەسە دە، كەڭسەدەن تولىقتاي باس تارتۋعا بولمايدى دەگەندەر دە بار.

ليۋسي كەللوۋەي، «كەڭسەدەگى ادامدار» اتتى كوركەم فيلمنىڭ اۆتورى:

- كەڭسە كەرەك ەمەس دەۋگە بولمايدى. ادامدار كۇندەلىكتى زاماناۋي ءارى ۇلكەن كەڭسەلەرگە كەلۋ ارقىلى جۇمىسىنىڭ ماڭىزدىلىعىن تۇسىنەدى. ءبىر عانا نوۋتبۋكپەن كۇندىز- ءتۇنى ەڭبەك ەتسە، ونىڭ ءمانى بولمايدى. جۇمىستىڭ ساپاسى دا تومەندەيدى. ءاربىر قىزمەتكەر كەڭسەگە كەلىپ، ۇجىممەن ارالاسىپ، پىكىر الماسۋى كەرەك.

***

پسيحولوگ: كەڭسەدەن باس تارتۋعا بولمايدى

جاڭالىققا قاتىستى مامانداردىڭ پىكىرى قاق جارىلدى. بۇل ورايدا كاسىبي پسيحولوگتىڭ پىكىرىن بىلسەك.

برەد بەلل، پسيحولوگ، كورنەللا ۋنيۆەرسيتەتىنىڭ پروفەسسورى:

- ءوزىم جەكە جۇرگىزگەن زەرتتەۋلەر ناتيجەسىمەن بولىسەيىن. كوپ ۋاقىت وقشاۋلاۋدا، ياعني ۇيدە وتىرىپ جۇمىس ىستەيتىن ادامنىڭ جۇيكەسى جۇقارادى. ول قاشىقتا وتىرىپ، جۇمىسىنان ءلاززات الا المايدى. ورتاق ءىستىڭ ماڭىزدىلىعىن تۇسىنبەيدى. ونىڭ سوڭى سترەسسكە الىپ كەلەدى. ءبىز بارلىعىمىز الەۋمەتتىك ورتانىڭ مۇشەسىمىز. سول ءۇشىن ادامدارمەن ارالاسۋ فيزيكالىق تۇرعىدا مىندەتتى. ۇزاق ۋاقىت قاشىقتان قىزمەت ەتۋدىڭ تەرىس سالدارى بولاتىنىن ايتا كەتەيىن.

2015 -جىلى بۋففەر ونلاين- ستارتاپ مەنەدجەرلەرى سان- فرانسيسكوداعى ايىنا 7 مىڭ دوللار تۇراتىن كەڭسەلەرىن جاۋىپ، قاشىقتان جۇمىس ىستەۋگە كوشەدى. بۇگىندە كومپانيانىڭ 90 قىزمەتكەرى الەمنىڭ تۇكپىر- تۇكپىرىندە ءجۇر. ءبىرى ساياحاتتاپ ءجۇرىپ، ءبىرى لاينەر بورتىنان جۇمىسىن اتقارادى. دەسە دە، قاشىقتان تىرلىگى تىنبايتىن ماماندىق بارىن ايتايىق. سوندىقتان پاندەميادان سوڭ كەڭسەلەردىڭ تولىقتاي جابىلۋى ەكىتالاي.

www.24.kz