سولتۇستىك ەۋروپاداعى تاريحي ساياباقتا ديماشتىڭ اتىنداعى اعاش پايدا بولدى

گۇلدەپ تۇرعان تال سولتۇستىك ەۋروپاداعى اسەم دە تاريحي ساياباقتاردىڭ ءبىرى سانالاتىن كادريورگ ساياباعىنداعى اللەيادا وتىرعىزىلدى. شارانى قازاقستاندىق ءانشىنىڭ ەستونياداعى «Dimash Estonian Dears» فان- كلۋبى ۇيىمداستىردى. ەستونيالىق جانكۇيەرلەر 2018 -جىلى ديماشتىڭ لوندونداعى كونتسەرتىنە بارعاننان كەيىن، 2019 -جىلدىڭ ناۋرىزىندا «Dimash Estonian Dears» فان- كلۋبىن قۇردى.

«ءانشىنىڭ تۋعان كۇنىنە ءبىر اي قالعاندا ەستونيالىق Dears ديماشقا قانداي سىيلىق جاساۋ كەرەكتىگىن ويلاستىرا باستادى. ولار سىيلىقتىڭ ەرەكشە بولۋىن ءارى ءومىر بويىنا ساقتالۋىن قالادى. فان- كلۋبتىڭ نەگىزىن قالاۋشىلاردىڭ ءبىرى ۋللە كرۋۋسە تانىمال تۇلعالار ەسىمدەرىمەن اتالعان اللەيادا ورنالاسقان ايگىلى كادريورگ ساياباعىندا قىزمەت ەتەدى ەكەن. فان- كلۋب اكىمشىلىگى كوپ ويلانباي، ديماشقا ارناپ تال وتىرعىزۋ كەرەك دەپ شەشكەن. ەرەكشە ءارى ەستە قالارلىق سىيلىق»، - دەلىنگەن سايتتا.

ديماشتىڭ اتىنداعى تال ءساۋىر ايىندا وتىرعىزىلدى. ال بەلگى ءانشىنىڭ تۋعان كۇنى قارساڭىندا ورناتىلدى. وندا «ديماش قۇدايبەرگەن. الەمدەگى ەڭ تاماشا داۋىس. ەستونيالىق دوستار 2020» دەپ جازىلعان. بەلگىنىڭ اشىلۋىنا قازاقستاننىڭ ەستونياداعى ەلشىسى نۇرلان سەيتىموۆ قاتىستى. ەسكە سالا كەتسەك، 24 - مامىردا ديماش 26 جاسقا تولدى. الەمنىڭ بىرنەشە ەلىندەگى جانكۇيەرلەر وعان ءتۇرلى قۇتتىقتاۋلار جولدادى. ال قىتايلىق فاناتتار ءانشىنىڭ قۇرمەتىنە ءشول دالاعا 3 مىڭ اعاش وتىرعىزدى. سونىمەن بىرگە، ديماش Instagram پاراقشاسىندا جانكۇيەرلەرىمەن قاۋىشىپ، ولاردىڭ سۇراقتارىنا جاۋاپ بەردى.

بۇدان بولەك، ونىڭ تۋعان كۇنى قۇرمەتىنە Dimash Manga (Manga D’R’S’) جاڭا رەسمي جوبا تانىستىرىلدى. Manga D’R’S’ — بۇل ەرەكشە جانە قىزىقتى سيۋجەتى بار جاپون كوميكستەرى (مانگا) جانرىنداعى شىعارمالار تسيكلى. كوميكستى الەمنىڭ 7 تىلىندە ەلەكتروندى نەمەسە باسپا تۇرىندە ارنايى سايتتان ساتىپ الۋعا بولادى. وقيعا جەلىسى 2019 -جىلدىڭ 10 - جەلتوقسانىندا ديماشتىڭ نيۋ- يوركتەگى كونتسەرتىنەن باستاۋ الادى. Manga D’R’S’ شامامەن 1 - شىلدەدە ساتىلىمعا شىعا باستايدى.