باس سانيتار كوروناۆيرۋسقا سەنبەيتىن تۇرعىندارعا جاۋاپ بەردى

«ستاتيستيكادان قاشىپ قۇتىلۋعا بولمايدى. كوروناۆيرۋس الەمنىڭ 215 مەملەكەتىنە تارادى. ەپيدەميا جاريالاندى. 5,5 ميلليوننان استام جۇقتىرۋ جاعدايى تىركەلدى. 350 مىڭنان استام ادام قايتىس بولدى. مۇنىڭ بارلىعى كوروناۆيرۋستىڭ قانداي ماڭىزدى ەكەنىن كورسەتپەي مە؟ ءيا، قازاقستانداعى جاعداي تۇراقتى، سەبەبى بىزدە قامداناتىن ۋاقىت بولدى. قىتايداعى ىندەت جەلتوقساننىڭ سوڭىندا، قاڭتاردا باستالىپ، كورشىلەس ارىپتەستەردەن كوپ نارسە ۇيرەندىك. بۇل ۋاقىتتا ارنايى بازا مەن مامانداردى، زەرتحانالاردى ازىرلەدىك. ق ر پرەزيدەنتى دەر كەزىندە توتەنشە جاعداي جاريالادى. بارلىق الەۋمەتتىك قارىم- قاتىناستى شەكتەدىك، جۇمىسقا بارمادىق. كوپتەگەن نىسانداردىڭ جۇمىسى توقتادى. مۇنىڭ بارلىعى جاپپاي جۇقتىرۋ مەن ءولىم- ءجىتىمنىڭ الدىن الۋعا كومەكتەستى»، - دەدى باس سانيتارلىق دارىگەر ق ر دەنساۋلىق ساقتاۋ ميينسترلىگىنىڭ فەيسبۋكتەگى باسپا ءسوز ءماسليحاتىندا.

دەگەنمەن بۇل شارالار كوروناۆيرۋس ينفەكسياسىنىڭ جوعالىپ كەتكەنىن بىلدىرمەيدى. ت ج رەجيمىنەن شىقساق تا، كارانتين شارالارىن ساقتاۋ كەرەك.

«ەگەر اۋرۋ جۇقتىرۋ دەڭگەيى تاعى كوبەيسە، بۇرىنعى قاتاڭ كارانتيندىك شارالارعا ورالۋعا ءماجبۇر بولامىز. كوروناۆيرۋستىڭ قانداي قاۋىپتى ەكەنىن باعامداۋىمىز كەرەك. بارلىق ەرەجەلەردى ۇستانۋ قاجەت، ولار اسا قيىن دا ەمەس. قول تازالىعى، الەۋمەتتىك ارا قاشىقتىق ءبىزدىڭ ءومىر سالتىمىزعا ەنۋى كەرەك. ۆيرۋستى قانشالىقتى ەڭسەرەتىنىمىز وزىمىزگە تىكەلەي بايلانىستى»، - دەدى ايجان ەسماعامبەتوۆا.

بۇعان دەيىن باس سانيتارلىق دارىگەر قازاقستان اۋەجايلارىندا وزگە ەلدە جۇرگىزىلگەن پ ت ر تەستىنىڭ ناتيجەسى قابىلداناتىنىن حابارلاعان ەدى. ودان بولەك، ا. ەسماعامبەتوۆا اۋە، تەمىر جول قوزعالىسى اشىلسا دا، بلوكپوستتاردىڭ نەگە الىنبايتىنىن ءتۇسىندىردى. COVID-19 ناۋقاسىمەن بايلانىستا بولعاندار ەكى توپقا بولىنەتىن بولادى. ال كوروناۆيرۋس ينفەكسياسىنا تەست تاپسىراتىن ادامداردىڭ جاڭا ساناتى جاريالاندى. سونىمەن بىرگە، باس سانيتارلىق دارىگەر اشىق اۋادا نە ءۇشىن ماسكا تاعۋ قاجەتتىگىن ءتۇسىندىردى.

اۆتور: ايجان سەرىكجان قىزى