قىز بالا تاربيەلەپ وتىرعان اكەلەرگە ارنالادى

قازىرگى تاربيە بەرۋ جۇيەسى ۇل، قىز دەپ بولىنبەيدى. ەكەۋىنە دە بىردەي جاقسى ادام بوپ ءوسۋى ءۇشىن اتا- اناسىنىڭ مەيىرىمى، قولداۋى، ءتۇسىنۋى قاجەت. ولاردىڭ قىزىعۋشىلىعىنا نەمقۇرايلى قاراماي، بويىنداعى قابىلەتىن اشىپ، قاتەلىگىنەن ساباق الۋعا داعدىلاندىرۋ. بالانى تاربيەلەۋ قيىن نە وڭاي بولۋى ونىڭ ۇل نە قىز بولۋىنا قاتىسى جوق. قىز ءوسىرۋ دەگەن ونىڭ شاشىن ءورىپ بەرىپ، ادەمى كويلەك كيگىزىپ، قىرىنداعان جىگىتتەردەن قورۋمەن شەكتەلمەيدى. قىزى بار اكەلەر ەسىندە ۇستاۋى ءتيىس بىرنەشە ەرەجە ۇسىنامىز.

كوپ وتباسىدا انالارى بالاسىن باقىلاۋدا ۇستاپ، شەكارالارعا قاماپ، موينىنا مىندەتتەر جۇكتەپ، بالانى ءار ىستەن شەكتەۋ ءرولىن اتقارادى. ال اكەلەر ەكىگە بولىنەدى: ءبىرى - بالاسىن ءوز جاعىنا تارتۋ ءۇشىن اناسى شەكتەگەن بارلىق ىسكە ەركىندىك بەرەدى، ەكىنشى ءتۇرى - «اكەڭ كەلسە جانىڭدى شىعارادى» دەگەن اڭگىمەنىڭ كەيىپكەرى. بۇل ءتيپتىڭ ەكەۋىنەن دە اۋلاق بولعان ءجون. وتباسىدا اكە قاتال، ءبىراق بارىنە ادىلەتتى بولۋى ءتيىس. حانشايىمى كوز جاسىن توگۋىنە جول بەرمەي، ورنىمەن ماقتاپ، اقىلىن ايتىپ وتىرعانى ابزال. ءار اكە ءوزىنىڭ قىزى ومىرگە كەلمەيىنشە قۋىرشاق ويناۋ، قىزىنىڭ شاشىن جيناپ بەرۋ سەكىلدى ىستەردە ءوزىن ەلەستەتە المايدى. ال نەگىزىندە قىز بالا ويىندارىندا اكەسى ماڭىزدى ءرول وينايدى. قىز ءۇشىن اناسى ونسىزدا سۇلۋلىق ەتالونى ەكەنى بەلگىلى. ال ونىڭ ويىنىنا اكەسى قاتىسا بىلسە، قىزى ومىردەگى ەر ادامنىڭ ءرولىن جاقسىراق سەزىنىپ وسەدى. ايەلىڭىزدىڭ ادالدىعىنا قالاي سەنسەڭىز، قىزىڭىز دا جامان جولمەن جۇرمەيتنىنە يمانداي سەنۋىڭىز كەرەك.

ءجاسوسپىرىم شاققا جەتكەندە قىزىم قايدا، كىممەن ءجۇر دەپ ۇنەمى كۇدىكتەنىپ، ەركىندىگىن شەكتەي بەرەر بولساڭىز، ول كەرىسىنشە تىيىم سالىنعان جاققا قاراي ىقىلاسى اۋىپ تۇرادى. وعان سەنىپ، شەكسىز جاقسى كورەتىنىڭىزدى كورسەتسەڭىز، ساناسى بار بالا ءسىزدىڭ اتىڭىزعا كىر كىلتىرمەۋى ءۇشىن بارىن سالادى. بولاشاقتا ءوز وتباسىندا دا وسى ونەگەنى كورسەتەدى. ەر ادام پسيحولوگياسىنان حاباردار ەتىڭىز. بۇل وعان العاشقى ماحابباتتىڭ ءدامىن تاتقاندا قاجەت بولادى. ادەتتە ولاردىڭ بالالىق سەزىمى ءوزى قاتارلى ۇل بالالار ءالى ماحابباتتان تۇك حابارى جوق كەزدە ويانادى. وعان سونشالىقتى الاڭداپ، ۋايىمداۋدىڭ قاجەتى جوق، جاي عانا وتپەلى كەز. وسى كەزدەن باستاپ ونى اركىمنەن قورىپ، اۋلاقتاتۋعا تىرىسساڭىز، ونىڭ سىزگە دەگەن سەنىمى جوعالادى. سونىمەن قاتار ونىڭ تاڭداۋىنا قارسى شىعۋ تۋرالى دا ويلاماڭىز. ەش اكەگە كۇيەۋ بالاسى ءبىر كورگەننەن ۇناعان ەمەس. ونىڭ تۇبىندە جاي عانا قىزعانىش جاتاتىنىن ۇمىتپاڭىز.

قىز بالاسى اناسىنا قاراعاندا اكەسىنەن كوبىرەك ماقتاۋ ەستىگىسى كەلەدى. ونىڭ سۇلۋ ەكەنىن، نازىك ەكەنىن ۇنەمى قۇلاعىنا قۇيىپ وتىرىڭىز. ەر ادامنىڭ كوزقاراسىمەن جوعارى باعالانعان قىزدىڭ وزىنە دەگەن سەنىمى مىقتى بولادى. وزىنە سەنىپ، ءوزىن باعالاي بىلەتىن جان ەشقاشان باقىتسىزدىققا ۇرىنباق ەمەس. ەگەر قىزىڭىز سىزگە قۇربىلارىمەن بولعان كيكىلجىڭدى نە ءوزىنىڭ ىشكى ۋاىمدارىن ايتقىسى كەلسە، وعان ەشقاشان قۇلىقسىز بولماڭىز. مۇنداي اڭگىمەلەردى اناڭا ايت، وداندا ءوز ىسىڭمەن اينالىس دەگەن سەكىلدى سوزدەردى ايتۋشى بولماڭىز. ءتىپتى مۋلتفيلمنىڭ سيۋجەتىن ايتىپ بەرگىسى كەلسە دە، ونى مۇقيات تىڭداڭىز جانە اڭگىمەگە ارالاسا ءبىلىڭىز. زور سەنىم مەن ماڭىزدى اڭگىمە كىشى ديالوگتاردان باستالادى.

قىزىعۋشىلىعىن قۇرتپاڭىز بالاڭىز تىڭدايتىن اۋەن، كورەتىن فيلم، قىزىعاتىن كەيىپكەرى سىزگە ۇناماۋى مۇمكىن. ءسىزدىڭ قىزىعۋشىلىقتارىڭىزدى دا اتا- اناڭىز قولداعىسى كەلمەگەن بولار. ويتكەنى ءار زاماننىڭ ءوز ءسانى بار. كەرىتارتپا اكە رولىندە بولىپ، قىزىڭىزدى وزىڭىزدەن قاشىقتاتقىڭىز كەلمەسە، زامان اعىمىنا ىلەسىپ، جاستاردىڭ نە كورىپ، نە تىڭدايتىنىن ءبىلىپ، ءتۇسىنىپ، بالاڭىزبەن ءبىر تولقىندا بولىڭىز.

مەكتەپ ومىرىنە قىزىعىڭىز. اتا- انا جينالىسىنىڭ باسىم بولىگى انالاردان عانا تۇرادى. ءۇي تاپسىرماسىنا دا كومەكتەسۋ، سومكەسىن جيناسۋ، كۇندەلىگىن تەكسەرۋ - بارلىعى انالاردىڭ عانا موينىنا جۇكتەلگەندەي. اكەلەردىڭ كوبى ءتىپتى بالاسىنىڭ نەشىنشى سىنىپقا بارىپ جۇرگەنىن بىلمەيدى. مەكتەپتە دوسى بار ما، جوق پا ودان دا حابارسىز. الايدا مەكتەپتە وتەتىن ون جىل ءار بالانىڭ ومىرىندە ماڭىزدى ءرول اتقارادى. وسى جىلدار ىشىندە اكە بالاسىنىڭ سەنىمىنە كىرىپ ۇلگەرۋى كەرەك.

پسيحولوگتار پىكىرىنە سۇيەنسەك، ءار اتا- انا ءار بالاسىنا وڭاشا ۋاقىت ارناۋى كەرەك. بۇل تولىق ءبىر كۇن بولماسا دا، بىرنەشە ساعاتقا سوزىلار. اكەسى قىزىنا بىرنەشە ساعات، ۇلىنا بىرنەشە ساعات، اناسى دا سولاي ەكەۋدەن- ەكەۋ وتكىزەتىن ۋاقىت ارناۋى كەرەك. قىزىڭىزبەن بىرگە ساياباقتا سەرۋەندەڭىز، كافەگە، كينوعا، زووپارككە، مۇراجايعا بارىڭىز، ءارتۇرلى تاقىرىپتا ويىن سۇراپ، پىكىرىن تالقىلاڭىز.

Massaget.kz