قاسىم- جومارت توقايەۆ تۇركيا پرەزيدەنتىمەن تەلەفون ارقىلى سويلەستى
مەملەكەتتەر باسشىلارى ءبىرىن- ءبىرى بارشا مۇسىلماننىڭ قاسيەتتى ورازا ايت مەرەكەسىمەن قۇتتىقتاپ، باۋىرلاس قازاق- تۇرىك حالىقتارىنا باق- بەرەكە تىلەدى. اڭگىمەلەسۋ بارىسىندا تاراپتار COVID-19 ىندەتىنە قارسى كۇرەستە ەكى ەل ۇكىمەتتەرىنىڭ قابىلداعان ناقتى شارالارىن تالقىلادى.
رەجەپ تاييپ ەردوعان كوروناۆيرۋستىڭ تارالۋىن بولدىرماۋ، ازاماتتارعا اۋقىمدى كومەك كورسەتۋ، سونداي- اق، شاعىن جانە ورتا بيزنەستى قولداۋ جونىندەگى قازاقستاننىڭ ءىس- قيمىلدارىنا جوعارى باعا بەردى. قاسىم- جومارت توقايەۆ رەجەپ تاييپ ەردوعانعا قولداۋ كورسەتكەنى جانە گۋمانيتارلىق كومەك رەتىندە مەديتسينالىق جەكە قورعانىش قۇرالدارىن بەرگەنى ءۇشىن ريزاشىلىق ءبىلدىردى.
مەملەكەتتەر باسشىلارى اتالعان سالاداعى تىعىز ىنتىماقتاستىقتى جالعاستىرا بەرۋگە نيەتتى ەكەنىن ناقتىلادى. سونىمەن قاتار تاراپتار ءوزارا تاۋار اينالىمىن ۇلعايتۋدىڭ جانە بىرلەسكەن ينۆەستيتسيالىق جوبالاردى جۇزەگە اسىرۋدىڭ ماڭىزدىلىعىنا توقتالىپ، قازاق- تۇرىك قاتىناستارىنىڭ قازىرگى احۋالى مەن دامۋ پەرسپەكتيۆالارىن تالقىلادى. اڭگىمە سوڭىندا مەملەكەت باسشىسى تۇركيا پرەزيدەنتىن قازاقستانعا ساپارمەن كەلۋگە شاقىردى.