قازاقستاندىق دەرەكتى فيلم ءۇش بىردەي بەدەلدى حالىقارالىق فەستيۆالگە قاتىسادى

بۇل جونىندە «قازاق فيلم» كينوستۋدياسىنا سىلتەمە جاساپ قازاقپارات حابارلايدى.

ق ر مادەنيەت جانە سپورت مينيسترلىگىنىڭ تاپىسىرىسىمەن «قازاقفيلم» كينوستۋدياسىندا تۇسىرىلگەن دەرەكتىڭ فيلمنىڭ جەلىسى 1952 -جىلى جامبىل ماڭىنداعى لۋگوۆوي جىلقى زاۋىتىندا تۋعان سوۆەت زامانىنداعى جىلقى سپورتىنىڭ اڭىزى بولعان «ابسەنت» اقالتەكەسى جانە تاۋەلسىز قازاقستانداعى كونكۋردىڭ جاعدايىن باياندايدى. «كەدەرگىلەردى جەڭۋ» فيلمى مەنىڭ جۇرەگىمدە ەرەكشە ورىن الادى. مەنىڭ دەبيۋتتىك جۇمىسىم بولعاندىقتان عانا ەمەس، ءبىر جىل بويى جۇمىس ىستەگەن فيلمنىڭ ارقاسىندا تاماشا ادامدارمەن - ءبىزدىڭ كەيىپكەرلەرىمىزبەن تانىسقانىم ءۇشىن دە ىستىق. ءبىز ولاردىڭ قالاي ات تاڭداعانىنا، جىلقىلار اۋىرعان كەزدە قالاي ۋايىمداعانىنا، ءتورت جىلدان ارتىق وتكىزىلمەگەن قازاقستانداعى الەم كۋبوگى كەزەڭىنە دايىندىعىنا جانە جەتىستىكتەرىنە قالاي قۋانعانىنا كۋا بولدىق»، - دەيدى فيلمنىڭ رەجيسسەرى بانۋ رامازانوۆا.

ونىڭ ايتۋىنشا، ءبىز قازىر فيلمدەگىدەي، كوروناۆيرۋستىڭ تارالۋىنا بايلانىستى كەدەرگىلەردى جەڭىپ جاتىرمىز.

«COVID-19 بارلىق سالادا، اتاپ ايتقاندا كينويندۋستريادا ايتارلىقتاي كەدەرگىلەر تۋعىزىپ وتىر. فيلمىمىزدى ۇسىنعان كوپ فەستيۆالدەر پاندەمياعا بايلانىستى كەيىنگە شەگەرىلدى. ءبىراق سوعان قاراماستان، ءبىز بۇل كەدەرگىدەن ءوتىپ، فەستيۆالدەردىڭ نەگىزگى كونكۋرسىنا ىلىندىك. بۇل جولى ءبىز بۇرىنعى ومىرىمىزگە جەڭىمپاز بولىپ ورالامىز»، - دەپ قوستى فيلمنىڭ اۆتورى.

دەرەكتى فيلم 2020 -جىلى 30-31 - مامىردا ستامبۋلدا وتەتىن Anatolia International Film Festival حالىقارالىق كينوفەستيۆالىنىڭ باستى بايقاۋىنا قاتىسادى. دەرەكتى فيلم «ەڭ ۇزدىك دەرەكتى» ، «ۇزدىك مۋزىكالىق فيلم» جانە «ۇزدىك رەجيسسەر» اتالىمى بويىنشا ءۇش نوميناتسيادا بايگەگە تۇسەدى. جىلىنا ەكى رەت وتەتىن كينوبايقاۋ باعدارلاماسىنا قىسقا، تولىقمەتراجدى كوركەم فيلمدەر مەن دەرەكتى فيلمدەر كىرەدى.

فيلم سونىمەن قاتار 2020 -جىلعى 1-7 -تامىز ارالىعىندا گرەتسيادا وتەتىن 7- يەراپتەرا حالىقارالىق دەرەكتى فيلمدەر فەستيۆالىنىڭ نەگىزگى كونكۋرستىق باعدارلاماسىندا ۇسىنىلادى. اشىق اسپان استىندا وتەتىن فەستيۆال بۇكىل الەمدەگى دەرەكتى فيلمدەرگە ارنالعان جانە جاس ءارى تاۋەلسىز رەجيسسەرلەردىڭ جۇمىسىن قولدايتىن، ونەردىڭ جەتەكشى ءتۇرى رەتىندە وسى جانردى ناسيحاتتاۋعا ارنالعان. بيىلعى كورسەتىلىم عىلىمي زەرتتەۋلەر مەن يننوۆاتسيالارعا ارنالادى. 23-30 تامىز ارالىعىندا «كەدەرگىلەردى جەڭۋ» كارتيناسى Docs Without Borders Film Festival كينوفەستيۆالىنىڭ نەگىزىگى كونكۋرسىنا قاتىسادى. امەريكاداعى ەڭ ءىرى دەرەكتى فيلم كينوفەستيۆالدەرىنىڭ ءبىرى 23-30 - تامىز ارالىعىندا وتەدى.