10:01, 24 - مامىر 2020 | GMT +6
نيۋ- يوركتەگى قازاق پوليتسەيى «الەم قاھارمانى» اتاندى
نيۋ- يورك. قازاقپارات - قازاقستان تۋماسى، نيۋ- يورك قالاسىنىڭ پوليتسەيى ديماش نيازوۆ بۇكىلالەمدىك بوكس كەڭەسى (WBC) اتىنان «Hero of the World award» («الەم قاھارمانى» ) ماراپاتىن الدى، دەپ حابارلايدى قازاقپارات ءتىلشىسى.
«بۇكىلالەمدىك بوكس كەڭەسىنەن «الەم قاھارمانى« ماراپاتىن الدىم. WBC- گە وسىنداي ماراپاتى ءۇشىن راحمەت جانە مەنى قاھارمان ساناعاندارعا راحمەت. مەن ايانباي ەڭبەك ەتىپ، جاستارعا جانە مەنى باقىلاپ وتىراتىندار ءۇشىن ۇلگى بولۋدى جالعاستىرا بەرەمىن. بۇل ماراپات مەن ءۇشىن قىمبات»،- دەپ جازدى ديماش نيازوۆ Instagram پاراقشاسىنا.
بۇل ماراپات COVID-19 پاندەمياسى كەزىندە بەلسەندى جۇمىس ىستەگەن تۇرعىندارعا بەرىلەدى. ديماش نيازوۆ - قازاقستان تۋماسى، نيۋ- يورك پوليتسەيى. ول 13 جاسىندا ا ق ش- قا كوشىپ كەتكەن. نيۋ- يورك قالاسىنىڭ پوليتسيا دەپارتامەنتىندە جۇمىس ىستەيدى، برۋكلين اۋدانىندا پاترۋلدىك ەتەدى. ەسكە سالا كەتسەك، ول 2017 -جىلدىڭ باسىندا ۇزدىك پوليتسيا قىزمەتشىسى بولعانى ءۇشىن ماراپاتتالعان. سونداي- اق، كاسىپقوي بوكسشى.