قازاقستان - پاندەمياعا قاراماستان ترانسپلانتاتسيا جاساپ جاتقان ورتالىق ازياداعى جالعىز مەملەكەت

None
None
نۇر- سۇلتان. قازاقپارات - كوروناۆيرۋس پاندەمياسى سالدارىنان بار الەم وقشاۋلانۋعا ءماجبۇر بولدى. بۇل ەكونوميكا، ءبىلىم بەرۋ، دەنساۋلىق ساقتاۋ سىندى ءبىرقاتار سالانىڭ جۇمىسىنا ىقپال ەتتى.

وسى ورايدا ق ر ۇلتتىق كارديوحيرۋرگيالىق ورتالىعىنىڭ باسقارما ءتوراعاسى يۋريي پيا كارانتيندە دونورلىق جۇمىستىڭ قانداي ماسەلەلەرگە تاپ بولعانىن ايتىپ بەردى، دەپ حابارلايدى قازاقپارات ءتىلشىسى.

ونىڭ ايتۋىنشا، قازاقستان - پاندەمياعا قاراماستان ترانسپلانتاتسيا جۇرگىزىپ جاتقان ورتالىق ازياداعى جالعىز مەملەكەت.

«كارانتين كەزىندە بىزدە عانا ەمەس، بارلىق الەمدە ترانسپلانتاتسيا كولەمى ازايدى. كەي ەلدەردە دونورلىق جۇمىسى مۇلدەم توقتاتىلعان. ەۋروپا ەلدەرى ورتاق جەلى قۇرىپ، ىقتيمال دونورلار تۋرالى دەرەكتەر بانكىن قۇردى. وسىلايشا، ورگان مۇقتاجدىعىن جويىپ، ءتيىمدى جۇمىس ىستەپ جاتىر. ال ءبىز - ورتالىق ازيادا جۇرەك پەن وكپە الماستىراتىن جالعىز ەلمىز. مۇنداي وتانى تەك قازاقستان ىشىندە عانا جاساي الامىز. ورگانداردى وزگە ەلدەن جەتكىزە المايمىز جانە ءوزىمىز دە جىبەرە المايمىز. سوندىقتان بىزدە قايتىس بولعان ادامنان ورگان الۋ جۇمىستارى وتە از جۇرگىزىلەدى»، - دەدى يۋريي پيا كارديوحيرۋرگيالىق ورتالىقتا وتكەن باسپا ءسوز ءماسليحاتىندا.

دارىگەر 2012 -جىلدان بەرى قازاقستاندا جۇرەك الماستىرۋدا 81 وتا جاسالعانىن ايتتى.

«بۇل - وتە از كورسەتكىش. كۇن سايىن ادامدار جول اپاتىنان، وندىرىستە نەمەسە ميعا قان قۇيىلىپ قايتىس بولادى. وسىلايشا، ىقتيمال دونورلار سانى كوپ بولادى. الايدا، ولاردىڭ جاقىندارى مەن تۋىستارى كوپ جاعدايدا ترانسپلانتاتسياعا رۇقسات بەرمەيدى. (...) حالىقارالىق ستاتيستيكادا 1 ميلليون ادامدا 10 جۇرەك الماستىرىلادى. ءبىزدىڭ ەلىمىزدە جىلىنا شامامەن 180 جۇرەك اۋىستىرۋ سۇرانىسى بار. ال ءبىز مۇنداي وتالاردى جىلىنا 10 رەت قانا جاسايمىز. ءتىرى دونوردان كوپ جاعدايدا ناۋقاستىڭ تۋىستارىنان بۇيرەك نەمەسە باۋىردىڭ ءبىر بولىگى الىنادى. ال جۇرەك پەن وكپە تەك قايتىس بولعانداردان الىنادى»، - دەدى يۋريي پيا.

ەسكە سالا كەتسەك، پاۆلوداردا ينسۋلتتەن كوز جۇمعان ەر ادامنىڭ اعزا مۇشەلەرى 5 ادامعا ءساتتى اۋىستىرىلدى. جۇرەك 35 جاستاعى ەر ادامعا بەرىلسە، وكپە - 41 جاستاعى ايەلگە جاڭا ءومىر سىيلادى. ودان بولەك، قوس بۇيرەگى ەلوردانىڭ تاعى ءبىر ورتالىعىندا ەكى ناۋقاسقا ءساتتى ورنالاستىرىلدى. ال باۋىر الماتىداعى ناۋقاسقا جىبەرىلدى.

اۆتور: ايجان سەرىكجان قىزى

سوڭعى جاڭالىقتار