بەكەڭنىڭ ءار قادامى - التىن، ءار ايتقان ءسوزى - جاقۇت - ەتنوگراف بەيسەن قۇرانبەك تۋرالى ەستەلىگىن ءبولىستى

بولات بوپاي ۇلى «ايتۋعا وڭاي» توك-شوۋىنىڭ باس كەڭەسشىسى بولعان. ەتنوگرافتىڭ سوزىنشە، ول تەلەجۋرناليستپەن ءتورت جىل بۇرىن سول باعدارلامادا باس كەڭەسىشىسى بولىپ بىرگە جۇمىس اتقارعان.

بۇل تۋرالى Tengrinews.kz حابارلايدى.

«قايران، جاس ءومىر... كەتىپ قالدى. ءبىراق ارتىنا تولاعاي ەڭبەك قالدىرىپ كەتتى. قازاق تەلەۆيزياسىنىڭ وسى عاسىرداعى جاڭا جارقىن جاعىمدى بەينەسىن جاساپ، سومداپ كەتتى. جۋرناليستيكانىڭ عىلىم ەكەنىن، جالىندى جاپالى جۇمىس ەكەنىن، ۇلكەن ۇجىم ەكەنىن، جۇمىلا كوتەرەتىن اۋىر جۇك ەكەنىن ءوز ءىس-ارەكەتىمەن دالەلدەپ كەتتى. جالپى حالىقپەن ەتەنە جاقىن ءجۇرىپ، تىعىز بايلانىس جاساپ، توقتاۋسىز قىزمەت ەتۋدىڭ ۇلگىسى مەن وشپەس ونەگەسىن ءوزى اتقارىپ، تايعا تاڭبا باسقانداي ەتىپ، ايقىنداپ ارتقى ۇرپاققا ۇلاعاتتاپ تاستاپ كەتتى. بەرەكەنىڭ، بىرلىكتىڭ المايتىن قامالى بولمايتىنىن كورسەتىپ ءوتتى. تەلەجۇرگىزۋشىلىكتىڭ ەڭ جوعارى جۇرگىزۋ شەبەرلىگى مەكتەبىنىڭ ءتىرى بەينەسىندەگى وقۋلىعىن ءوز بەينەسىمەن كورسەتىپ ءوتتى. حالىقتىڭ بار قاجەتى مەن مۇڭىن مىڭ قۇلاقتى پەرىشتە كوڭىلمەن تىڭدادى.

سان-ساۋالىنا مىڭ تىلمەن جاۋاپ تاۋىپ ايتتى. حالىق كوكىرەگىندەگى ، كوپ سۇراقتاردى كورەگەن كوزبەن كوردى، قالاي شەشۋدىڭ جولىن ءبىلدى. ايتقاندارىنىڭ ءبارىن شەشتى، موينىنا العان حالىق پارىزدارىن تۇگەل ورىندادى. بەرەم دەگەن نارسەلەرىنە تۇگەل قولىن جەتكىزدى. سەرتىن سەنىممەن اتقاردى. سول ارقىلى وسى عاسىرداعى ادامزات بالاسىنىڭ ەڭ جوعارى دەڭگەيدەگى ادامگەرشىلىك قاسيەتىن الەم ەلدەرى الدىندا، كوگىلدىر ەكران ارقىلى كورسەتىپ، كۇللى ادام بالاسىنىڭ كوكىرەگىندە، ماڭگىلىككە التىن شام شىراق بولىپ مازداپ جانىپ قالدى. ۇلىلىق - قاراپايىمدىلىقتا ەكەنىن؛ قارا حالىقتا ەكەنىن؛ قاراپايىم جۇمىستا ەكەنىن؛ بەرەكە - بىرلىكتە ەكەنىن؛ كىشپەيىلدىكتە ەكەنىن؛ ار مەن ۇياتتا ەكەنىن؛ مادەنيەت پەن ونەردە ەكەنىن؛ ۇلتىن قالتقىسىز سۇيۋدە ەكەنىن؛ ادىلەت - شىندىقتا ەكەنىن؛ دوستىق - مەيرىمدىلىكتە ەكەنىن؛ جاقسىلىق - ادالدىقتا ەكەنىن؛ وتانىن ءسۇيۋ وتباسىنان باستاۋ الاتىنىن؛ ساناۋلى عۇمىردى سانالى، ساپالى جۇمىس ىستەۋگە ارناۋ كەرەك ەكەنىن ءوز ءومىر ونەگەسىمەن كورسەتىپ كەتتى.

جالىنى جارىق ەتىپ سونە سالاتىن از ءومىردى قالاي ءماندى وتكىزۋ كەرەك ەكەنىن توقسان-توعىز جاقتان تولىق دالەلدەپ كەتتى. بەكەڭ، دالەلدەمەگەن ەشتەڭە قالعان جوق، بارىنە ۇلگەردى. ۇلگىنى ونەگە ەتىپ تىكتەدى. مىنە، ءومىر وسىلاي دەپ ءوتتى دە كەتتى. بەكەڭنىڭ ءار باسقان قادامى - التىن، ءار ايتقان ءسوزى - جاقۇت، ءار قيمىلى ۇلگى مەن ونەگە. ءار جازعان جازۋى - تاريح.

مارقۇمنىڭ جاتقان جەرى جاننات، توپىراعى تورقا بولسىن. ومىردەگى ونەگەسى ۇرپاقتارعا ۇلىلىق بوپ دارىسىن. بولاشاق بەيسەن قۇرانبەك مەكتەبى اشىلادى. وقۋشىلارى دايىن»، - دەپ ءبولىستى ەتنوگراف.

ايتا كەتەيىك، 18-مامىردا تانىمال تەلەجۇرگىزۋشى بەيسەن قۇرانبەك قايتىس بولعانى تۋرالى حابارلاندى. ول قاتەرلى ىسىكپەن اۋىرعان، ءبىر جىلدان اسا ەم العان.