قازاقستاندىق جۇرگىزۋشىلەر الداعى ۋاقىتتا تەك جەكە كۋالىكپەن كولىك جۇرگىزە بەرەتىن بولادى

ءماجىلىستىڭ جالپى وتىرىسىندا زاڭ جوباسىن تانىستىرعان ىشكى ىستەر ءمينيسترى ەرلان تۇرعىمبايەۆ قولدانىلعان اۆتوكولىك سايماندارى تەحنيكالىق قۇجاتسىز ساتىلىمعا شىعارىلمايتىنىن ءمالىم ەتتى. «ەل ىشىندە ءبىرشاما زاڭنامالىق باستامالار لەگىن، ونىڭ ىشىندە ىشكى ساۋدا ەرەجەلەرى تۋراسىندا ەرەجەلەردى ەنگىزدىك. وتكەن جىلدىڭ ماۋسىم ايىندا ءتيىستى نورما ەنگىزىپ، وعان سايكەس اۆتوكولىك سايماندارى تەك ارنايى دۇكەندەردە ساتىلۋى كەرەكتىگىن بەكىتتىك. قازىرگى تاڭدا بۇل ارنايى دۇكەندەردەگى باقىلاۋ كۇشەيتىلدى. لومباردتاعىداي، ەندىگارى دۇكەن يەسى سايماندى ساتۋ ءۇشىن كولىكتىڭ تەحنيكالىق قۇجاتى مەن ءوزىنىڭ جەكە كۋالىگىن كورسەتۋى كەرەك. ياعني كولىك سايمانى بازارىنىڭ وزىندە قاي سايمان قاي كولىكتەن الىنعانىن ءبىلىپ وتىرامىز»، - دەدى ەرلان تۇرعىمبايەۆ.

مينيستر سونىمەن قاتار اقپاراتتىق جۇيەلەر ينتەگراتسياسى تۋرالى دا ءسوز قوزعادى. «بۇگىنگى تاڭدا پوليتسيا قىزمەتكەرلەرىندە 6 مىڭ پلانشەت بار. اۆتوكولىككە قاتىستى مالىمەتتەر بازاسى ينتەگراتسيالاندى. مەملەكەت باسشىسىنىڭ تاپسىرماسىمەن ءتيىستى نورمانى ەنگىزىپ، جۇرگىزۋشىگە مىندەتتى تۇردە قۇقىعىن راستايتىن قۇجاتتاردى الىپ ءجۇرۋ ەرەجەسىن الىپ تاستاعالى جاتىرمىز. جەكە كۋالىگى بولسا بولدى. سەبەبى قالعان قۇجاتتاردىڭ ءبارىن ءبىز پلانشەت ارقىلى كورىپ وتىرامىز. جۇرگىزۋشىنىڭ قانداي كولىگى بار، قانشا سەنىمحات جازىلدى، ساقتاندىرۋ پوليسى قاشان اياقتالادى، تەحنيكالىق تەكسەرىستەن قاشان ءوتتى، ايىپپۇلى قانشا - ءبارى دە پلانشەتتە كورىنىپ تۇرادى. سونىمەن قاتار ءبىز پلانشەتتەردىڭ ءبارىن قازىر كوشەدەگى ۆيدەوكامەرالارمەن ينتەگراتسيالاپ جاتىرمىز»، - دەدى ول.

اۆتور: ايان بەكەن ۇلى