ەلوردادا ماسكاسىز جولاۋشىلار اۆتوبۋستان تۇسىرىلەدى

CTS كومپانياسىنىڭ قىزمەتكەرلەرى تاڭعى ساعات 6-دان باستاپ قوعامدىق كولىك توقتاعانشا جولاۋشىلارمەن جۇمىس جاساۋدا. ولار ادامداردىڭ ماسكا تاعۋىن تەكسەرىپ، ساقتتىق شارالارىن ءتۇسىندىرىپ جاتىر.

«جولاۋشىدا ماسكا بولماعان جاعدايدا اۆتوبۋستان ءتۇسۋدى وتىنەمىز. بۇعان قوسا، اۆتوبۋس ءىشى جولاۋشىعا 50 پايىز تولعاندا ايالداماعا توقتاعانىمەن، الدىڭعى ەسىگى اشىلمايدى. جۇرگىزۋشى باسقا جولاۋشىلاردى شىعارۋ ءۇشىن قالعان ەسىكتەردى اشادى. بۇل شارالار قالا تۇرعىندارىنىڭ قاۋىپسىزدىگى ءۇشىن جاسالادى»، - دەپ اتاپ وتەدى اتالعان كومپانيادان.

ەسكەرىڭىزگە سالا كەتەيىك، 11 - مامىردا ەلىمىزدە توتەنشە جاعداي رەجيمى الىندى. ەپيدەميالوگيالىق احۋالدىڭ جاقسارۋىنا بايلانىستى شەكتەۋ شارالارى دا بىرتىندەپ جۇمسارتىلۋدا. سول سەبەپتى قوعامدىق كولىكتەگى جولاۋشىلار سانى ارتىپ كەلەدى. ماسەلەن، اۆتوبۋستار باعدارعا شىققان 12 - مامىر كۇنى قوعامدىق كولىكتەردە 146907 جولاۋشى قاتىناسا 15 - مامىردا ادامدار سانى 237969-عا جەتتى. قوعامدىق كولىك 15- مامىردان باستاپ تاڭعى ساعات 6-دان كەشكى 22:00-گە دەيىن جۇرەدى.

«سانيتارلىق نورمالار بۇزىلعان جاعدايدا قوعامدىق كولىكتىڭ قوزعالىسى توقتاپ، قالا كارانتيننىڭ قاتاڭ شارالارىنا قايتا ورالۋى مۇمكىن»، - دەپ ەسكەرتەدى CTS كومپانياسىندا.

اۆتور: مارلان جيەمباي