«ورالمان» ءسوزىنىڭ «قانداس» بولىپ وزگەرۋى - قازاق كوشىنىڭ ەكىنشى التىن ءداۋىرىنىڭ باستالۋى – ا. مۇقيبەك
مۇنداي پىكىردى اقىن، ق ر پرەزيدەنتى جانىنداعى ۇلتتىق قوعامدىق سەنىم كەڭەسىنىڭ مۇشەسى اۋىت مۇقيبەك ءبىلدىردى، دەپ حابارلايدى قازاقپارات ءتىلشىسى.
«ورالمان» ءسوزى 1997 -جىلى «حالىقتىڭ كوشى- قونى تۋرالى» زاڭى قابىلدانعاندا قولدانىسقا ەنگەن بولاتىن. سودان بەرى 23 جىل ءوتىپتى، بۇل اتاۋدى جۇرت قابىلداي الماي كەلدى. بۇل اتاۋ الىستان كەلگەن اعايىن مەن جەرگىلىكتى حالىقتى جاقىنداتۋدىڭ ورنىنا، بولەكتەپ تۇردى. 2017 -جىلى اتالعان زاڭعا وزگەرتۋلەر مەن تولىقتىرۋلار ەنگىزىلگەندە دە وزگەرتۋگە ارەكەت جاساعامىز. ءبىراق، ول ۇسىنىسىمىز ءساتسىز اياقتالىپ ەدى. مىنە، وتكەن جىلى پرەزيدەنت قاسىم-جومارت توقايەۆتىڭ تىكەلەي تاپسىرماسىمەن بۇل اتاۋ «قانداس» بولىپ وزگەردى.
ءتىپتى، ءماجىلىس «باۋىرلاس» دەگەن ءسوزدى قابىلداپ جىبەرگەن جەرىنەن قاسىم-جومارت كەمەل ۇلى ءوزى ارالاسىپ، «قانداس» ءسوزىن قايتا ۇسىندى. بۇل - ءداۋىر بولگىش وقيعا بولدى. مىنە، حالىق وتە جىلى قابىلداپ، قولدانىسقا ەندى دە كەتتى. موينىمىزدان اجىرعىمىز الىنعانداي كۇيگە بولەنىپ، راحاتتانىپ قالدىق. سول ءۇشىن، شەتتەن كەلگەن اعايىنداردىڭ وكىلى رەتىندە، پرەزيدەنت قاسىم-جومارت كەمەل ۇلىنا راحمەت ايتام. مەن بۇل وزگەرىستى - قازاق كوشىنىڭ ەكىنشى التىن ءداۋىرىنىڭ باستالعانى دەپ باعالايمىن»، - دەدى ول.
سونىمەن قاتار، قوعام قايراتكەرى ەندى «قانداس» مارتەبەسىنىڭ مەرزىمىن وتكىزىپ العان قانداستارىمىز قازاقستان رەسپۋبليكاسىنىڭ ازاماتتىعىن وڭايلاتىلعان (تىركەۋ) تارتىپپەن الۋ ماقساتىندا «قانداس» كۋالىگىنىڭ مەرزىمىن تاعى ءبىر مارتە ۇزارتىپ الۋعا مۇمكىندىگى بار ەكەندىگىن باسا ايتتى.
«ايتا بەرسەك، جاڭالىقتار جوق ەمەس. بۇرىنعى زاڭ بويىنشا كوشىپ كەلگەن اعايىن تۇراقتى تىركەۋ مەن ازاماتتىققا بولەك-بولەك ەكى رەت قۇجات وتكىزسە، ەندى جاڭا زاڭعا ساي ەكەۋىن ءبىر مەزگىلدە تاپسىراتىن بولادى. مۇنىڭ ءبارى قانداستارىمىزدىڭ تەز قۇجاتتانۋىنا كەڭ جول اشادى»، - دەدى اۋىت مۇقيبەك.
ايتا كەتەيىك، كەشە پرەزيدەنت قاسىم- جومارت توقايەۆ «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كوشى-قون پروتسەستەرىن رەتتەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسى زاڭىنا قول قويعان ەدى.