ءدۇلدۇل كۇيشىلەر كۇيمەن نار ءيدىرىپ، جىلقى قايىرعان - شەتەلدەگى قازاق ءتىلدى ب ا ق- قا شولۋ
نۇر-سۇلتان. قازاقپارات - ادەتتەگىدەي «قازاقپارات» حالىقارالىق اقپارات اگەنتتىگى شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.
سىبىزعى عۇمىر - قىتايدىڭ «ورتالىق حالىق راديوسى» (CNR)
قىتايدىڭ kazakcnr.com سايتىندا، سول ەلدە تۇراتىن قانداسىمىز، بەلگىلى سىبىزعىشى بەيىلقان قالياكبار ۇلىنىڭ ونەر جولى مەن شىعارماشىلىعى تۋرالى جانە ۇلتىمىزدىڭ قازىنالى ونەرىنىڭ قاتپارلى سىرىن تولعاعان مازمۇندى سۇحبات جارىق كوردى.
اقپارات كوزىنىڭ دەرەگىنشە، بەلگىلى سىبىزعىشى بەيىلقان قالياكبار ۇلى 1988 -جىلى قىتايدىڭ تەڭىز جاعاسىنداعى داليان قالاسىندا رەسپۋبليكالىق ءداستۇرلى ونەر مەرەكەسىنە قاتىسىپ، حالقىمىزدىڭ سىبىزعى اسپابىن تۇڭعىش رەت ىشكى قىتاي جەرىنىڭ ساحاناسىنا شىعارعان.
ال 1992 -جىلى تۇركيانىڭ ىستانبۇل قالاسىندا وتكىزىلگەن حالقارالىق ونەر باسكەسىنە قاتىسىپ، باس جۇلدەنى قانجىعالاعان. شىڭجاڭ تەلەارناسى 2005 -جىلى بەيىلقان قالياكبار ۇلىنىڭ 30 دان استام كۇيىن تاسپاعا ءتۇسىرىپ، التىن قورعا ەنگىزگەن.
ول 2008 -جىلدارى الماتىدا وتكەن «ماڭگىلىك سارىن» اتتى ءداستۇرلى مۋزىكا فەستيۆالىنە جانە 2019 -جىلى جەزقازعان قالاسىندا وتكەن كۇيشى كەتبۇعانىڭ 900 جىلدىعىنا ارنالعان حالقارالىق مەرەيتويعا شاقىرتۋمەن قاتىسقان. سونىمەن بىرگە بەيىلقان قالياكبار ۇلى 2019 -جىلى قىتايدىڭ ورتالىق سستv تەلەارناسىنىڭ ارنايى شاقىرۋىمەن بەيجىڭ قالاسىنا بارىپ، سىبىزعى كۇيلەرىن ەلدىڭ باستى تەلەارناسىنىڭ التىن قورىنا جازدىرعان.
«مەنىڭ ارعى اتالارىم دا سىبىزعىشى بولعان. ماعان دەيىن 6 ۇرپاق وسى ونەردى بويىنا دارىتقان ەكەن. سوندىقتان بۇل ونەر اتادان بالاعا مۇرا بولىپ جالعاسىپ كەلە جاتقان جادىگەر. مەندە وسى جالعاسقان ءداستۇردى ءۇزىپ الماۋ ءۇشىن بالام جۇماعازىعا ۇيرەتىپ، اماناتتاپ ءجۇرمىن. بالا كۇنىمدە اكەم ۇيگە ۇنەمى مىقتى سىبىزعىشىلاردى شاقىرىپ، سىبىزعى تارتتىراتىن. سول كەزدەن باستاپ قۇلاعىما سىبىزعى ءۇنى ابدەن جاتتالىپ، ءسىڭدى. كەيىن وسى ونەرگە ىقىلاسىم اۋىپ، اتاقتى كۇيشى بولەنحان شەتتىكباي ۇلىن ۇستاز تۇتتىم. قازىرگى كۇنى ۇيىمدە قۋرايدان، اعاشتان، جەزدەن، توت باسپايتىن بولاتتان جاسالعان نەشە ءتۇرلى سىبىزعىلار ساقتالعان. سولاردىڭ اراسىندا قۇندى جادىگەر رەتىندە ساقتاپ جۇرگەن، جاسالعانىنا ءبىر عاسىر بولعان ەرەكشە سىبىزعى دا بار. ونى ۇستازىم بولەنحان اتام ءبىر جولى كوشىپ كەلە جاتقاندا ماعان ىقىلاسى ءتۇسىپ، ات ۇستىنەن، تۇيەدەگى تەڭنەن سۋىرىپ الىپ قولىما ۇستاتقان بولاتىن. بۇل سىبىزعى ەكى جىل كەپتىرىلگەن قاتتى سارى اعاشتان جاسالعان. بۇنداي سىبىزعىنى كەزىندە ءىشى ويىلعان ەكى شاعىن اعاش ناۋانى ءبىر- بىرىنە قاراتىپ بەتتەستىرىپ، سىرتىنان قويدىڭ نەمەسە ەشكىنىڭ وڭەشىنىڭ قىزىلىن الىپ تاستاپ، اق پەردەسىمەن وراپ قاپتايتىن بولعان. مۇنداي اعاشتان جاسالعان سىبىزعىنى تارتاتىن كەزدە سۋعا سۋارىپ تارتادى. ۇيتكەنى ۇزىن ۋاقىت تۇرىپ، سۋسىزدانىپ قاڭسىپ قالعان اعاش جاقسى ءۇن شىعارا المايدى»، - دەيدى سىبىزعىشى.
اتالعان سۇحباتىندا بەيىلقان قالياكبار ۇلى، بۇرىندارى شاماسىنا قاراي قويشى دا، جىلقىشىدا جالعىز جۇرگەندە كوڭىلىنە مەدەۋ ەتىپ وسى سىبىزعىنى سەرىك ەتكەنى تۋرالى ايتادى. جىلقىنىڭ تاڭعى جۋساۋىندا جىلقىشىلار سىبىزعى تارتقاندا، جىلقى قۇلاعىن قايشىلاپ مۇلگىپ تىڭداپ تۇرىپ قالاتىن بولعان.
«كيەلى ونەردىڭ سيقىرلى سازىن تولىق يگەرگەن نەلەر ءدۇلدۇل كۇيشىلەر نار ءيدىرىپ، كۇيمەن جىلقى قايىراتىنى تۋرالى اڭىز كوپ-اق! سولاردىڭ ءبىرى التايدان شىققان بەلگىلى گەنەرال دالەلقان سۇگىربايدىڭ اتاسى جىلقىشى اقتاي ۇلى ءارى بالۋان ءارى سىبىزعىشى بولعان.
جىلقى مالى سەرگەك، سەزىمتال جانۋار عوي! سول زاماندا ۇرى- قارى كوبەيىپ اۋىلعا مازا بەرمەي تۇرعان ءبىر كۇنى جىلقىشىنىڭ ءۇيىرلى جىلقىسىن دا ۇرىلار تىگەرگە تۇياق قالدىرماي قۋا جونەلەدى. جىلقى دۇبىرىنەن ويانعان سىبىزعىشى سىرتقا شىقسا جىلقى ءۇيىرى ىرگەدەگى سارىبەلدەن اسىپ بارا جاتادى.
مۇنى كورگەن جىقاڭ سىبىزعىسىن الا سالىپ، «اتتەڭ، اناۋ ءبىر سارىبەلگە جەتسەم-اۋ!» دەپ جاياۋ ۇمتىلادى. جىقاڭ سارىبەلگە كوتەرىلىپ، سىبىزعىسىن قولىنا الىپ قۇيقىلجىتىپ كۇي تارتقاندا جىلقىلارى كەرى بۇرىلىپ، ۇرىلاردىڭ ىرقىنا باعىنباي قاشادى... جىلقىشى اقتاي ۇلىنىڭ «اتتەڭ سارىبەل» اتتى كۇيى وسىلاي ومىرگە كەلگەن دەيدى.
ال بەلگىلى سىبىزعىشى اقىمجان بولدىرعان ۇلى سىبىزعى تارتقاندا دا داۋىسىنا ۇيىعان جىلقىلار ءۇيدى اينالا مۇلگىپ تۇراتىن بولعان. بالا كۇنىمدە وسىنداي كۇيدىڭ ەرەكشە قاسيەتتەرى تۋرالى اڭگىمەلەردى كوپ ەستىپ ءوستىم. اكەم جىلقىشى بولاتىن، مەن اكەمە كومەكتەسىپ جىلقى كۇزەتىنە شىعاتىنمىن. سودان وسى اڭگىمەلەردى ەستىگەن سوڭ مەن دە سىبىزعىمدى الىپ، قالىڭ جىلقىنىڭ ورتاسىنا بارىپ بىلگەن كۇيىمدى تارتامىن. جىلقىلار راسىندا دا قۇلاعىن قايشىلاپ ەلەڭدەپ، نازارىن بۇرىپ تۇراتىن. كەيىن ەسەيگەن كەزىمدە اسپانتەكشە دەگەن جەرگە بارسام قالىڭ جىلقى جايىلىپ ءجۇر ەكەن، مەن سىبىزعىمدى الىپ تارتىپ ەدىم، سازدا جاتقان ءبىر توپ جىلقى شاۋىپ جانىما كەلدى، كۇي اياقتاعان سوڭ جايىلىپ ءوز الدىنا كەتتى. وسىنداي كوزىم كورگەن، ەستىگەن دۇنيەلەرىم سىبىزعىنىڭ ۇنىندە ءبىر كەرەمەت سىر جاتقانىنا مەنى تولىق يلاندىردى»، - دەيدى بەيىلقان قالياكبار ۇلى.
سونىمەن بىرگە، سىبىزعىشى وسى جادىگەر ونەردىڭ قىرى مەن سىرىن جاستارعا ۇيرەتۋدەن جالىقپايتىنىن جانە ونى بولاشاق ۇرپاققا اماناتتاپ كەتۋ ەڭ ۇلكەن ارمانى ەكەنىن ايتقان. «ماعان كەلىپ وسى ونەردى ۇيرەنۋگە قۇلىق تانىتىپ، تالپىنىپ جۇرگەن جاستار كوپ ەمەس، ءبىراق بار. تىپتەن وزگە ۇلتتاردىڭ ازاماتتارى دا قىزىعىپ جاتادى.
سونداي جىگىتتىڭ ءبىرى شاڭحايدان ارنايى ىزدەپ كەلدى. ول مەنىڭ سىبىزعى تارتقانىمدى الەۋمەتتىك جەلىلەردەن تاۋىپتى. سودان 15 كۇن جاتىپ سىبىزعىنىڭ ءبىراز قىر-سىرىن مەڭگەرىپ، نەگىزىن قالاپ، ارى قاراي ءوزى ۇيرەنەتىن بولىپ اۋىلىنا قايتتى.
ودان باسقا تاعى ءبىر ەۆرەي ۇلتىنىڭ ازاماتى دا سىبىزعىنىڭ سيقىرلى ۇنىنە ءتانتى بولىپ ۇيرەنەمىن دەپ كەلدى.
ۇلتىمىزدىڭ وسىنداي قازىنالى ءتول ونەرىن بالاما عانا ەمەس، ۇلتىمىزدىڭ باسقادا جاستارىنا ۇيرەتسەم دەپ كوپ ارمانداۋشى ەدىم. سول ارمانىم ورىندالىپ جەرگىلىكتى بيلىكتىڭ قولداۋىمەن اۋدانىمىزداعى مەكتەپتە سىبىزعى سىنىبى اشىلدى. سوندا 2014-2018 -جىلدار ارالىعىندا بالالارعا بىلگەنىمدى ۇيرەتىپ، ساباق بەردىم»، - دەيدى.
راسۋل كۋشەربايەۆ: ءارقاشان قازاق ەكەنىمدى ماقتانا ايتىپ، قۋانىپ جۇرەم - «ءوزا» اقپاراتتىق اگەنتتىگى
وزبەكستاننىڭ «ءوزا» مەملەكەتتىك اقپاراتتىق اگەنتتىگىندە وزبەكستان رەسپۋبليكاسى «ولي ماجليس» زاڭ شىعارۋشى پالاتاسىنىڭ دەپۋتاتى، تاشكەنت وبلىسىنىڭ «قوساعاش» اۋىلىندا تۋىپ- وسكەن قانداسىمىز راسۋل كۋشەربايەۆتىڭ سۇحباتى جارىق كوردى.
اتالعان سۇحباتتا، جۋرناليست نۇرعيسا كامالبەك «وليي ماجليس» زاڭ شىعارۋشى پالاتاسىنىڭ دەپۋتاتى راسۋل كۋشەربايەۆتى تاعى ءبىر مەرزىمگە دەپۋتات بولۋىمەن قۇتتىقتاي وتىرىپ، سايلاۋدان بۇرىن العا قويعان ماقساتتارى مەن بولاشاقتاعى جۇمىس جوسپارلارى تۋرالى وي ءبولىسۋىن سۇراعان. ءبىز تومەندە وسى كولەمدى سۇحباتتى ىقشامداپ ۇسىنىپ وتىرمىز.
«- سايلاۋدان بۇرىن ءوز الدىڭىزعا قويعان جوسپارىڭىز جايىندا بولىسكەنىڭىزدە مونوپولياعا قارسى تۇرۋ، ميگرانتتار ماسەلەسى، ينۆەستورلارعا قولايلى ورتا جاراتۋ، ءتۇرلى الەۋمەتتىك ماسەلەلەر، سوت جۇيەسى سىندى وزبەكستانداعى وتە نازىك پروبلەمالاردى شەشۋدى قولعا الامىن دەدىڭىز. مۇنىڭ ءبارى سىزگە قيىندىق تۋدىرماي ما؟
- ارينە بۇلاردىڭ بارلىعىن جالعىز ءوزىم ىستەي الامىن دەۋ اقىلعا قونىمسىز. ول مۇمكىن دە ەمەس. بۇل كوپشىلىكپەن قويان- قولتىق ارالاسا بىرىگىپ جاسايتىن ماسەلە. ەڭ ماڭىزدىسى مەن ءوزىمنىڭ قاي جاقتا ەكەنىمدى انىق كورسەتىپ، وسى جولدا بەلسەندى تۇردە ارەكەت جاساماقپىن. مۇنىمدى قۇپتايتىندار كوبەيىپ ولار كومەكتەسەر بولسا، ول سونشالىقتى ناتيجەلى بولماق. ەڭ اۋەلى بۇل تۇرعىدان قازىرگى كەزدە جەمقورلىق پەن مونوپوليا ماسەلەسىنە كوپ كوڭىل بولمەكپىن. ءدال وسى ماسەلە ەل وركەندەۋى مەن حالىقتىڭ جايباراقات ومىرىنە كەدەرگى بولۋدا. سەنىمىم كامىل ءبىز وسى قوعامدا مۇنداي الاۋىزدىققا جول بەرمەيتىن بولساق، وندا جەمقورلار مەن مونوپوليستەر ەلدەن ءوز بەتىنشە كەتە باستايدى نەمەسە جوعالادى.
- كەلەشەكتە «ولي ءماجليستىڭ» پرينتسپتەرى وزگەرىپ، قاندايدا ءبىر وزگەشەلىك بولاما؟
- بىلمەدىم. بۇل جونىندە ناقتى ءبىر نارسەنى كەسىپ ايتۋ قيىن. سەبەبى قازىرگى ۋاقىتتا وليي ءماجليستىڭ تاجىريبەلىك پرينتسپتەرى تولىقتاي نەنى قامتيتىنىن وزىمدە انىق بىلە بەرمەيمىن. سوندىقتان بۇل ماسەلەدە ناقتى بىردەڭە ايتالمايمىن.
- كەيدە سىرتتاي ەستىپ جاتامىز قازاق ازاماتتاردىڭ جۇمىس ورنىندا وسۋىنە جول بەرمەيتىن نەمەسە قوعامدىق ورتادان الاستاتۋ سىندى سوزدەر ايتىلادى. وسى شىندىققا سايا ما؟
- مۇنى نەگىزى وي ورەسى تومەن، كوزقاراسى تار كىسىلەر، ادامدار اراسىندا الاۋىزدىق وياتۋ ءۇشىن ايتاتىن بولۋ كەرەك. سەنىمدى تۇردە ايتاتىنىم مەملەكەتتىك دەڭگەيدە نەمەسە ساياساتتا، ديپلوماتيادا جالپى قوعامدىق جۇمىستاردا بولسىن مۇنداي كوزقاراس جوق. ءاربىر ۇلت وكىلى بارلىق ازاماتتارعا ءتان مۇمكىندىكتەرگە يە.
- جازۋشى بەگابات ۇزاقوۆتىڭ اكتەر سەيدوللا مولداحانوۆتان العان سۇحباتىندا، سەيدوللا اعا ءوزىنىڭ ۇلتىن سۇراعاندارعا «قازبەكپىن» دەپ ءازىلدى شىنى ارالاس جاۋاپ قايىرادى ەكەن. سىزدە دە وسى سەكىلدى جاعداي بولىپ تۇرا ما؟
- كىم ءبىلسىن، ءبىراق ءوز باسىم ۇلتىمدى سۇراعاندارعا ءارقاشان قازاق ەكەنىمدى ماقتانا ايتىپ قۋانىپ جۇرەم. وزبەكستان كوپ ۇلتتى ەل عوي. بۇل مەكەن وسىنداعى بارلىق ۇلت پەن ۇلىسقا بىردەي. ال ەل مەن حالىق وركەندەۋى جولىندا ايانباي تەر توگۋ، كەلەشەك ۇرپاق ءۇشىن ۇلى ىستەر جاساۋ ۇلت تاڭدامايدى.
ەۋرازيا تۇركولوگتارى سوزدىگىنىڭ ەكىنشى تومى جارىق كوردى - T RT
ەۋرازيا تۇركولوگتارى سوزدىگىنىڭ قازاقستان مەن قىرعىزستان تۇركولوگتارىن قامتىعان ەكىنشى تومى وقىرماندارىنا ۇسىنىلدى. كىتاپتى تۇرىكسوي ۇيىمى مەن تۇركيا رەسپۋبليكاسى تۇرىك تاريحى مەكەمەسى باسىپ شىعاردى، دەپ جازادى تۇركيا راديو تەلەۆيزيا پورتالى.
اتالعان ب ا ق- تىڭ جازۋىنشا، 2011 -جىلى تۇرىكسويدىڭ باستاماسىمەن قولعا الىنعان جۇمىس شەڭبەرىندە پروفەسسور الەكساندر كولەسنيكوۆ پەن يلياس كامالوۆ دايىنداعان رەسەي تۇركولوگتارىن قامتىعان تۋىندىلاردىڭ جالعاسى سانالاتىن وسى ەڭبەكتە تاريح، ءتىل، ادەبيەت، ارحەولوگيا جانە سوتسيولوگيا سالاسىنداعى 340 عالىم ورىن العان.
التاي ايماعىناداعى تۋريستىك نىساندار كەلۋشىلەرگە اشىلدى - «التاي اقپارات» سايتى
التاي جەرى كوز اربايتىن كوركەم تابيعات كورىنىستەرىنە وتە باي. ونداعى اسقار تاۋلار، ءمولدىر وزەندەر، جاسىل ورماندار جانە ەرەكشە ۇلتتىق سالت-ءداستۇر مادەنيەتى كەلۋشىلەردى وزىنە باۋرايدى، دەپ جازادى kz.ts.cn/altai سايتى.
«التايدا وزەن دە، كول دە كوپ. ولار باسىن تاۋداعى قار سۋىنان، مۇزدىقتاردان الادى. ەڭ ۇلكەنى ەرتىس وزەنى. قاراتوقتىنىڭ كولى، قاناس كولى، ۇلىڭگىر، ۇشكول سەكىلدى تابيعاتى ەرەكشە تۋريستىك ورتالىقتار بار. سونىمەن بىرگە باتىس سولتۇستىگىندەگى ەڭ ۇلكەن تابيعي اققايىڭ ورمان بەلدەۋىندە قوناقتار ەرەكشە قىزىعىپ تاماشالايدى. اقتۇبەك كەرىشىن، اسقار شىڭعا جارماسا وسكەن ورماندى ءامىرسانا شوقىسىن، سونداي ـ اق ميلليونداعان جىلدار بوران- شاشىننىڭ جەمىرۋى ارقىلى قالىپتاسقان عاجايىپ تاستى سايدىڭ كورىنىستەرى ادامدى تامسانتپاي قويمايدى. ال التاي وڭىرىندە وسەتىن قىزعالداق، جاۋجۇمىر، بۇعىءشوپ، سابىن اعاش، قىزىل قاسىق، راۋشانگۇل سەكىلدى تاۋ گۇلدەرى كوزدىڭ جاۋىن الادى»، - دەپ جازادى «التاي اقپارات» سايتى.
سونىمەن بىرگە، اتالعان سايت التايدىڭ وسى اسەم كورىنىستەرىنەن فوتورەپورتاج ۇسىنعان.
وزبەكستاندىق دارىگەرلەر كوروناۆيرۋسقا قارسى كۇرەستە كومەكتەسۋ ءۇشىن تاجىكستانعا اتتاندى - «ءوزا» اقپاراتتىق اگەنتتىگى
8-مامىردا ءبىر توپ وزبەكستاندىق دارىگەرلەر كوروناۆيرۋسقا قارسى كۇرەستە ءوز تاجىريبەسىمەن ءبولىسىپ، كومەكتەسۋ ءۇشىن كورشى تاجىكستان ەلىنە اتتاندى، دەپ حابارلايدى وزبەكستاننىڭ ء«وزا» مەملەكەتتىك اقپاراتتىق اگەنتتىگى.
اتالعان ب ا ق- تىڭ دەرەگىنشە، قازىرگى ۋاقىتتا تاجىكستاندا كوروناۆيرۋسپەن اۋىرعان ناۋقاستار سانى 461 كىسىگە جەتىپ، 12 ازامات ىندەتتەن كوز جۇمعان. ال وزبەكستاندا ۆيرۋس راستالعان جالپى جاعداي 2324. ونىڭ 1748 ى ساۋىققان بولسا، 10 ناۋقاس قايتىس بولعان. قازىردە رەسپۋبليكالىق اۋرۋحانالاردا 566 ناۋقاس ەمدىك باقىلاۋعا الىنعان.
و س ك: موڭعوليانىڭ پارلامەنت سايلاۋىنا 15 پارتيا، 4 كواليتسيا تۇسەدى - KAZNEWS
موڭعوليانىڭ ورتالىق سايلاۋ كوميسسياسى پارلامەنت سايلاۋىنا تۇسەتىن پارتيالاردى تىركەدى. بۇل تۋرالى و س ك- نىڭ باسپا ءسوز قىزمەتى حابارلادى، دەپ جازادى موڭعوليالىق KAZNEWS اقپاراتتىق پورتالى.
«زاڭ اياسىندا 2020 -جىلعى پارلامەنت سايلاۋىنا قاتىسۋ ءۇشىن 15 پارتيا، بىرنەشە پارتيادان قۇرىلعان 4 وداق (كواليتسيا) سايلاۋ باعدارلاماسى مەن رەسمي قۇجاتتارىن ورتالىق سايلاۋ كوميسسياسىنا وتكىزگەن. ورتالىق سايلاۋ كوميسسياسى بارلىعىنىڭ قۇجاتتارىن تەكسەرىپ، قانداي ءبىر ولقىلىقتار جوق دەپ شەشىپ، ولاردى سايلاۋ دوداسىنا قاتىستىرۋعا شەشىم قابىلدادى»، - دەپ حابارلايدى KAZNEWS.
قازاقستاندا مەديتسينا قىزمەتكەرلەرىنىڭ قۇرمەتىنە تۇرعىن ۇيلەردىڭ قاسبەتىنە سۋرەت سالىنادى - «فارس» اقپارات اگەنتتىگى
كوروناۆيرۋسپەن كۇرەسىپ جاتقان دارىگەرلەر مەن مەدبيكەلەردىڭ سۋرەتتەرى نۇر- سۇلتان قالاسىنداعى تۇرعىن ۇيلەردىڭ قاسبەتىنە سالىنادى. بۇل ءىستى نۇر-سۇلتان قالاسىنىڭ شىعارماشىلار قاۋىمداستىعى اتقارادى، دەپ جازادى «فارس» اقپارات اگەنتتىگى.
«نۇر- سۇلتان قالاسىنىڭ شىعارماشىلار قاۋىمداستىعىنىڭ باسشىسى كريستينا بەكمۋرزايەۆا بۇل تۋرالى: «بۇل سۋرەتتەر ارقىلى مەديتسينا سالاسىنىڭ قىزمەتكەرلەرىنە ريزاشىلىق بىلدىرگىمىز كەلەدى. ءبىز ولاردىڭ بارلىعىن قاھارمان دەپ سانايمىز»، - دەدى دەپ جازادى parstoday.com .
اۆتور: باقىتجول كاكەش