قازاقستان مەن وزبەكستان پرەزيدەنتتەرى سۋ باسقان ايماقتاعى جاعدايدى تۇراقتاندىرۋ جۇمىستارىن تالقىلادى
قازاقستان پرەزيدەنتى قاسىم-جومارت توقايەۆ پەن وزبەكستان پرەزيدەنتى شاۆكات ميرزيەيەۆ ساردوبا سۋ قويماسى بوگەتىنىڭ بۇزىلۋ سالدارىنان قازاقستان مەن وزبەكستاننىڭ سۋ باسقان ايماقتارىنداعى جاعدايدى تۇراقتاندىرۋعا قاتىستى ەكى ەل ۇكىمەتتەرىنىڭ اتقارىپ جاتقان جۇمىستارىن ەگجەي- تەگجەيلى تالقىلادى.
مەملەكەتتەر باسشىلارى حالىقتى ەۆاكۋاتسيالاۋ جانە الەۋمەتتىك قولداۋ، ينجەنەرلىك جانە كولىك ينفراقۇرىلىمىن قايتا قالپىنا كەلتىرۋ سەكىلدى شۇعىل اتقارىلۋى ءتيىس ءبىرقاتار مىندەتتەردى شەشۋ بارىسىنداعى تاراپتاردىڭ تىعىز ءارى ۇيلەسىمدى جۇمىسىنا وڭ باعا بەردى. وزبەكستان باسشىسى باۋىرلاس حالىقتار اراسىنداعى قاتىناس دوستىق جانە تاتۋ كورشىلىك داستۇرگە نەگىزدەلگەنىن ايتىپ، كەز- كەلگەن قيىندىقتى بىرلەسىپ ەڭسەرۋگە بولاتىنىن اتاپ ءوتتى.
شاۆكات ميرزيەيەۆ وزبەكستان تاراپىنىڭ جان- جاقتى قولداۋ كورسەتەتىنىن، ونىڭ ىشىندە، ەركىن اقپارات الماسىپ، بوگەتتى قايتا قالپىنا كەلتىرۋ كەزىندە قازاقستاننىڭ مۇددەسى مەن حالىقارالىق قۇقىق قاعيداتتارىن ەسكەرىپ، اشىق جۇمىس جۇرگىزۋگە دايىن ەكەنىن جەتكىزدى. قاسىم-جومارت توقايەۆ شاۆكات ميرزيەيەۆكە وسىنداي قىسىلتاياڭ شاقتا وزبەكستاننىڭ كورسەتكەن قولداۋى مەن كومەگى ءۇشىن ريزاشىلىعىن ءبىلدىردى.
- ءبىز ءبىر وزەننىڭ بويىندا وتىرمىز. ءوزارا سەنىم مەن اشىقتىق نەگىزىندە عانا سۋ رەسۋرستارىن ءادىل، ءتيىمدى پايدالانۋعا قول جەتكىزەمىز جانە ترانسشەكارالىق سيپاتتاعى قاۋىپ پەن سىن- قاتەرلەردىڭ الدىن الۋعا مۇمكىندىگىمىز بولادى، - دەدى قازاقستان پرەزيدەنتى.
تاراپتار ترانسشەكارالىق وزەندەردىڭ رەسۋرستارىن بىرلەسىپ باسقارۋ جانە پايدالانۋ تەتىكتەرىن ودان ءارى جەتىلدىرۋ تۋرالى كەلىسىمگە كەلدى. وسى ورايدا ەكى ەل ۇكىمەتتەرىنە تۇراقتى ءارى جوعارى دەڭگەيدە جۇمىس ىستەيتىن ارنايى توپ قۇرۋ ماسەلەسىن ويلاستىرۋ جۇكتەلدى.
اڭگىمە سوڭىندا تاراپتار ءبىرىن-ءبىرى ۇلى وتان سوعىسىنداعى جەڭىستىڭ 75 جىلدىعىمەن قۇتتىقتادى. قاسىم-جومارت توقايەۆ پەن شاۆكات ميرزيەيەۆ بۇل مەرەكەگە ەرەكشە ءمان بەرىپ، قۇرمەتپەن قاراۋ كەرەك ەكەنىن اتاپ ءوتىپ، بارلىق ارداگەرلەر مەن تىل ەڭبەككەرلەرىنە شىن جۇرەكتەن زور دەنساۋلىق پەن ۇزاق عۇمىر، ال، باۋىرلاس قازاقستان مەن وزبەكستان حالىقتارىنا اماندىق پەن وركەندەۋ تىلەدى. تەلەفون ارقىلى سويلەسۋگە وزبەك تاراپى باستاماشى بولدى.