وزبەكستان پرەزيدەنتى تۇركىستان وبلىسىنداعى اپات سالدارىن جويۋعا كومەك بەرۋگە دايىن ەكەندىگىن ايتتى

وزبەكستان پرەزيدەنتى باسپا ءسوز قىزمەتىنىڭ مالىمەتىنشە، 27- ساۋىرگە قاراعان ءتۇنى اپات كەزىندە بۇحارا مەن سىرداريا وبلىستارىنداعى 38 مىڭنان استام ۇيگە، 847 الەۋمەتتىك نىسان مەن ەگىستىكتەرگە زالال كەلگەن.

«ءبىز تابيعي اپاتتىڭ زاردابىن جويۋ ءۇشىن بارلىق قاجەتتى شارالاردى قولدانۋدامىز. ۇكىمەتتىك كوميسسيا تاۋلىك بويى جۇمىس ىستەپ تۇر. بۇگىنگە دەيىن الەۋمەتتىك نىسانداردىڭ 70 پايىزى جانە ۇيلەردىڭ 20 پايىزىنىڭ شاتىرلارى جابىلعان. سونىمەن قاتار، 5000 شاقىرىم ەلەكتر جەلىسى، 1100 ترانسفورماتور جوندەلگەن... وكىنىشكە وراي، وسى ۋاقىتقا دەيىن تابيعي اپات سالدارىنان 4 ازاماتىمىز قايتىس بولدى، 1 ادام حابار-وشارسىز كەتتى. قازا بولعانداردىڭ وتباسى مەن جاقىندارىنا قايعىرىپ كوڭىل ايتامىن»، - دەدى شاۆكات ميرزيايەۆ بۇحارا مەن سىرداريادا بولعان اپاتقا قاتىستى جيىندا.

ونىڭ ايتۋىنشا، سۋ قويماسىندا بولعان جاعدايعا بايلانىستى حالىقارالىق ساراپشىلاردى تارتا وتىرىپ، بارلىق بوگەتتەرگە تەرەڭ ساراپتاما جۇرگىزىلمەك.

«وكىنىشكە وراي، ساردوباداعى اپات سالدارىنان كورشىلەس قازاقستان رەسپۋبليكاسى تۇركىستان وبلىسىنىڭ ماقتارالى اۋدانىنداعى ەلدى مەكەندەردى دە سۋ باستى. ءبىز قازاقستان پرەزيدەنتى قاسىم-جومارت توقايەۆپەن تەلەفون ارقىلى سويلەسىپ، بۇل ماسەلەنى ءوزارا تۇسىنىستىكپەن، اشىق ءارى كەڭىنەن تالقىلادىق. كەشە تۇركىستان وبلىسىنىڭ اكىمى ءومىرزاق شوكەيەۆ باستاعان دەلەگاتسيا وقيعا ورنىنا بارىپ، جاعدايدى جان-جاقتى زەرتتەدى»، - دەدى بەينەكونفەرەنتسيادا وزبەكستان پرەزيدەنتى شاۆكات ميرزيايەۆ.

«بۇل تەحنوگەندىك كۇتپەگەن اپات تەك ءبىزدىڭ تۇرعىندارعا عانا ەمەس، سونىمەن بىرگە كورشى قازاق باۋىرلارىمىزعا دا ۇلكەن زيان كەلتىرگەنى وتە ۇياتتى بولدى. ولاردىڭ مەكەندەيتىن جەرىنە جانە ەگىستىك القاپتارىنا زيان كەلتىرىلگەنىنە دە وكىنەمىز»، - دەدى وزبەكستان پرەزيدەنتى.

ونىڭ ايتۋىنشا، ۇكىمەت، ءتيىستى مينيسترلىكتەر مەن ۆەدومستۆولار، جەرگىلىكتى بيلىك ورگاندارى، باسقا دا شەنەۋنىكتەر مەن ساراپشىلار وزدەرىنىڭ قازاقستاندىق ارىپتەستەرىمەن بىرگە تابيعي اپاتتاردىڭ سالدارىن جويۋ ءۇشىن تىعىز جۇمىس ىستەيتىن بولادى.

«سونداي-اق، ءبىز تابيعي اپاتتىڭ سالدارىن جويۋدا قازاقستاندىق باۋىرلارىمىزعا قاجەتتى كومەك كورسەتۋگە دايىن ەكەنىمىزدى بىلدىردىك. ءبىز بۇل قيىندىقتاردى حالقىمىزبەن بىرگە، ءوزارا ىنتىماقتى تۇردە جەڭەتىنىمىزگە سەنىمدىمىن»، - دەدى وزبەكستان پرەزيدەنتى.