جامبىل وبلىسىندا كوروناۆيرۋستان كوز جۇمعان ناۋقاس جۇك كولىگىنىڭ جۇرگىزۋشىسى بولعان

61 جاستاعى ەر ادام پاۆلودار وبلىسىنىڭ تۇرعىنى. ول الىسقا قاتىنايتىن جۇك كولىگىنىڭ جۇرگىزۋشىسى بولىپ جۇمىس ىستەگەن.

20- ناۋرىز بەن 18- ءساۋىر ارالىعىندا رەسەي، بەلارۋس، پولشا، چەحيا جانە قىرعىز رەسپۋبليكالارىندا بولعان.

الگوريتمگە سايكەس مەملەكەتتىك شەكارانى كەسىپ ءوتۋ كەزىندە ودان COVID-2019 عا الىنعان زەرتحانالىق تالداۋ وڭ ناتيجە كورسەتكەن. 19- ساۋىردە ناۋقاستىڭ دەنە قىزۋى جوعارلاپ، قالتىراۋ، السىزدىك پەن قۇرعاق جوتەلگە قاتىستى شاعىممەن اۋرۋحاناعا جاتقىزىلعان.

دياگنوستيكا بارىسىندا، تىنىس الۋ جەتكىلىكسىزدىگى بار ەكى جاقتى پوليسەگمەنتارلى پنيەۆمونيانىڭ اسقىنۋىمەن كوروناۆيرۋس ينفەكتسياسى راستالعان.

ەمدەۋ شارالارى جانە ناۋقاستى باقىلاۋ نۇر-سۇلتان قالاسىنداعى ك ۆ ي بويىنشا احۋالدىق ورتالىقتىڭ ماماندارىمەن ونلاين رەجيمدە كەلىسىلىپ وتىردى. 23- ساۋىردەن باستاپ ناۋقاستىڭ جاعدايى قوسىمشا اۋرۋلارىنا بايلانىستى ناشارلاي تۇسكەن.

قوسىمشا اۋرۋلارى: جۇرەك زاقىمدالۋىمەن گيپەرتونيالىق اۋرۋ، سوزىلمالى برونحيت جانە 2 دارەجەلى سەمىزدىك.

قارقىندى ەمدەۋ شارالارىنا قاراماستان، كوپتەگەن مۇشەلەر قىزمەتىنىڭ جەتكىلىكسىزدىك بەلگىسى جوعارىلادى. 4- مامىردا ساعات 01.20 دا رەانيماتسيالىق ءىس-شارالار ناتيجەسىز بولىپ، ناۋقاستىڭ جۇرەگى توقتادى.

ەسكە سالا كەتسەك، 4- مامىردا ساعات 22:20 دا جامبىل وبلىسىندا 1، قاراعاندى وبلىسىندا 1 ناۋقاس كوروناۆيرۋستان كوز جۇمعانى حابارلاندى.