بەردىبەك ساپاربايەۆ تاراز قالاسى اكىمىنىڭ جۇمىسىن سىنعا الدى

كەزدەسۋگە ءماسليحات دەپۋتاتتارى، ۇلتتىق پالاتا، قوعامدىق بىرلەستىكتەر مەن قۇقىق قورعاۋ ورگاندارىنىڭ وكىلدەرى قاتىستى، دەپ حابارلايدى قازاقپارات وبلىس اكىمدىگىنىڭ رەسمي سايتىنا سىلتەمە جاساپ.

باس قوسۋدا تاراز قالاسىنىڭ اكىمى ايتقازى قارابالايەۆ وبلىس ورتالىعى تۇرعىندارىنىڭ بارلىق قولجەتىمدى بايلانىس ارنالارى، سونىڭ ىشىندە الەۋمەتتىك جەلىلەر ارقىلى تۇسكەن حابارلامالارىندا ەسكەرتىلگەن كوپتەگەن كەمشىلىكتەرگە قاتىستى جاۋاپ بەرۋگە ءماجبۇر بولدى.

قالا تۇرعىندارى قالالىق قىزمەتتەر مەن تىكەلەي تاراز اكىمدىگىنىڭ جۇمىسىنا بايلانىستى 16 مىڭنان استام ءوتىنىش جولداعان. الەۋمەتتىك جەلىلەردە بەردىبەك ساپاربايەۆتىڭ اتىنا قالالىق اكىمدىكتىڭ قىزمەتىنە قاتىستى 178 ءوتىنىش كەلىپ تۇسسە، ونىڭ 33 ءى عانا ورىندالعان.

تۇرعىنداردى نەگىزىنەن قوعامدىق كولىك جۇمىسىنىڭ ناشارلىعى، اۆتوبۋس ايالدامالارىنىڭ جاي-كۇيى، جول جامىلعىسى، قوقىستىڭ، اشىق ليۋكتەردىڭ كوپتىگى، اعاشتاردى زاڭسىز كەسۋ جانە تاعى باسقا دا تۇيتكىلدى ماسەلەلەر تولعاندىرۋدا.

- قالالىقتار وزدەرىن تولعاندىرعان جايتتارعا وراي وبلىستىق اكىمدىككە قوڭىراۋ شالىپ، الەۋمەتتىك جەلىلەر ارقىلى دابىل قاعۋدا. سەبەبى ۇيىمداستىرۋ جۇمىستارى ءالسىز، ءتيىستى باقىلاۋ جوق، - دەدى ايماق باسشىسى.

جولاۋشىلار كولىگىنىڭ تۇراقسىز قوزعالىسى، ەسكى جانە تار اۆتوبۋستاردىڭ لاس جانە ىڭعايسىز سالوندارى، جۇرگىزۋشىلەر مەن كوندۋكتورلاردىڭ مادەنيەتسىزدىگى قالا تۇرعىندارىنىڭ كوپتەن بەرى كوتەرىپ كەلە جاتقان باستى ماسەلەلەرىنىڭ ءبىرى.

- تاراز قالاسى اكىمىنە ادامداردىڭ قاجەتتىلىكتەرىن ەسكەرە وتىرىپ، مارشرۋتتاردى جۇيەلەندىرۋ، جاڭا، سىيىمدى اۆتوبۋستار ساتىپ الۋ ماسەلەسىن شەشۋ، ەلەكتروندى بيلەتتەندىرۋ مەن GPS- باقىلاۋدى ەنگىزۋ بويىنشا تاپسىرمالار جۇكتەلگەن بولاتىن. وكىنىشكە وراي، ءالى كۇنگە بىردە-ءبىر تاپسىرما ورىندالمادى، - دەپ اتاپ ءوتتى بەردىبەك ساپاربايەۆ.

تاعى ءبىر ماسەلە - تارازدىڭ اباي، قويگەلدى، بەيبىتشىلىك جانە باسقا دا ورتالىق كوشەلەرىنە قاتىستى بولىپ وتىر. ولاردى جوندەۋ جۇمىستارى ناۋرىز ايىندا باستالۋى ءتيىس بولعانىمەن، جوسپار ورىندالماعان.

- تاراز اكىمدىگى ۇيىقتاپ وتىر، قاشان وياناتىنى بەلگىسىز، - دەدى بەردىبەك ساپاربايەۆ.

وبلىس اكىمىنىڭ سوزدەرى شۇڭقىرلار، ارىق-جىرالار كورىنىس تاپقان سلايدتارمەن سۇيەمەلدەندى. تارازدى سانيتارلىق تازالاۋ جۇمىستارى دا سىن كوتەرمەيدى، قالانىڭ ءار بۇرىشتارىندا قوقىس ۇيىندىلەرى جينالىپ قالعان.

ايتقازى قارابالايەۆ تارازدىقتار كارانتين كەزىندە ۇيدە وتىرىپ، قالدىقتاردى كوپ شىعارىپ جاتقاندىعىن ايتىپ، اقتالۋعا تىرىستى. - مۇنداي جاعدايدا ءتيىستى قىزمەتتەردىڭ اينالىم سانىن ارتتىرىپ، قوقىس كونتەينەرلەرىن ءجيى تازالاپ وتىرۋ كەرەك، - دەدى ايماق باسشىسى.