شىمكەنتتە كوروناۆيرۋستان قايتىس بولعان ناۋقاسقا قاتىستى دەرەكتەر شىقتى
«1968 -جىلعى ناۋقاس شىمكەنت قالاسى، اباي اۋدانىنىڭ تۇرعىنى. 20-ساۋىردە شىمكەنت قالاسىنداعى جۇقپالى اۋرۋلار اۋرۋحاناسىنىڭ رەانيماتسيالىق بولىمىنە جاتقىزىلدى. اۋرۋحاناعا تۇسكەن كەزدە، ناۋقاستىڭ جاعدايىنىڭ اۋىر بولۋىنا بايلانىستى ول جاساندى تىنىس الۋ اپپاراتىنا قوسىلدى. ناۋقاستا ديلاتاتسيالىق كارديوميوپاتيا، جۇرەكشە فيبريللياتسياسى، ارتەريالىق گيپەرتەنزيا، سوزىلمالى جۇرەك جەتىسپەۋشىلىگى، قانت ديابەتى سياقتى ىلەسپە اۋرۋلارى بولدى»، - دەلىنگەن حابارلامادا.
سونداي-اق وندا ەمدەۋ حاتتامالارىنا سايكەس، ناۋقاسقا بارلىق قاجەتتى ەمدەۋ شارالارى جۇرگىزىلگەندىگى ايتىلادى. بىرنەشە رەت رەسپۋبليكالىق ماماندارمەن كەڭەس وتكىزىلدى. «جۇرگىزىلگەن رەانيماتسيالىق ءىس-شارالارعا قاراماستان، 23-ساۋىردە ساعات 20:30-دا ناۋقاس قايتىس بولدى. ناۋقاسپەن بايلانىستا بولعان بارلىق ازاماتتار وقشاۋلانىپ، كارانتينگە الىندى»، - دەپ حابارلادى جەدەل شتابتان.
وسىعان دەيىن شىمكەنتتە كوروناۆيرۋستان 1 ادامنىڭ قايتىس بولعاندىعى حابارلاندى.