الماتىدا تاۋ بوكتەرىنىڭ ءبىر بولىگى وپىرىلىپ ءتۇستى

None
None
الماتى. قازاقپارات - الماتىنىڭ تاۋلى اۋدانىندا كوشكىن بولدى، دەپ حابارلايدى قازاقپارات ءتىلشىسى.

مەدەۋ اۋدانىنداعى كەرەي-جانىبەك حاندار كوشەسىنىڭ بويىندا، «تاۋ-كۇنى» وقۋ-ساۋىقتىرۋ كەشەنىنىڭ اۋماعىندا توپىراق كوشكىنى ءجۇردى. 7200 تەكشە مەتر توپىراق پەن تاۋ جىنىسى وزەن ارناسىن بوگەمەي، كىشى الماتى كانالىنا ءتۇستى. وقىس وقيعادان ەشكىم زارداپ شەكپەدى.

«كوشكىن 14-15- ساۋىردە جاۋاعان جاڭبىردىڭ سالدارىنان بولدى. «قازسەلقورعاۋ» ر م ق ك مالىمەتىنشە، كوشكىن قاۋپى ءالى دە ساقتالادى. كەشەن اۋماعىندا ورنالاسقان سپورت زال، باسسەين جانە عيماراتتار قيراۋى مۇمكىن»، - دەپ حابارلايدى قالالىق ت ج د.

الماتى قالالىق توتەنشە جاعدايلار دەپارتامەنتىنىڭ قىزمەتكەرلەرى قايتا كوشكىن بولۋى ىقتيمال ۋچاسكەلەردى انىقتادى.

سول اۋماقتىڭ اينالاسى جولاق لەنتامەن قورشالدى. سونداي-اق، مەكەمە يەسىنە قاۋىپتى ايماققا ادامداردى جىبەرمەۋگە جانە عيماراتتارعا كىرۋگە شەكتەۋ قويۋ تۋرالى حابارلاما جىبەرىلدى.

جالپى الماتى اۋماعىندا 41 قاۋىپتى ۋچاسكە بار. وتكەن جىلى الماتى قالاسىنىڭ توتەنشە جاعدايلار دەپارتامەنتىنە، قالاداعى قاۋىپتى اۋدانداردى قۇجاتتاندىرۋ ءۇشىن بيۋجەتتەن 35 ميلليون تەڭگە ءبولىندى.

قازىر سول جۇمىستار جۇرگىزىلۋدە. بيىلعى ناۋرىز ايىنان باستاپ مەدەۋ جانە بوستاندىق اۋداندارىندا جالپى كولەمى 7220 تەكشە مەتر 4 كوشكىن تىركەلدى: «يۋبيلەينىي» شاعىن اۋدانىنداعى سۇلۋساي تاس جولىندا (كولەمى 15 تەكشە مەتر)؛ كۋرورتنايا كوشەسى، 75 (كولەمى 3 تەكشە مەتر)؛ بوستاندىق اۋدانىنداعى مجۇمابايەۆ كوشەسى 21- ءۇي (كولەمى 2 تەكشە مەتر)؛ «تاۋ-كۇنى» وقۋ-ساۋىقتىرۋ كەشەنىنىڭ اۋماعىندا (كولەمى 7200 تەكشە مەتر).

مامانداردىڭ ايتۋىنشا، كوشكىنىڭ باستى سەبەبى - نوسەر جاۋىن سالدارىنان توپىراقتىڭ ىلعالدانۋى، سۋ قۇبىرلارى مەن سەپتيكتەردىڭ جارىلۋىنان بولادى.

سوڭعى جاڭالىقتار