جامبىل وبلىسىندا قوعامدىق كولىك تولىعىمەن توقتايدى

بۇل تۋرالى وبلىسى اكىمىنىڭ ءبىرىنشى ورىنباسارى بەكبولات ورىنبەكوۆ مەن وبلىستىق تاۋارلار مەن كورسەتىلەتىن قىزمەتتەردىڭ ساپاسى جانە قاۋىپسىزدىگىن باقىلاۋ دەپارتامەنتى باسشىسىنىڭ ورىنباسارى عازيز نادۋيەۆتىڭ قاتىسۋىمەن و ك ق- ءنىڭ اقپارات الاڭىندا وتكەن بريفينگتە ايتىلدى، دەپ حابارلايدى قازاقپارات.

سپيكەرلەر 17- ساۋىردەن باستاپ جامبىل وبلىسى بويىنشا كارانتيندىك شارالار قاتاڭ كۇشەيتىلگەن رەجيمگە وتەتىنىن جەتكىزدى.

ول ق ر باس مەملەكەتتىك سانيتارلىق دارىگەردىڭ 2020-جىلعى 14- ساۋىردەگى قاۋلىسىنا سايكەس جۇزەگە اسىرىلادى.

«اتالعان ىندەتپەن تىركەلگەندەر سانىنىڭ ارتۋىنا بايلانىستى قاجەتسىز ءجۇرىستى ازايتۋ ءۇشىن اتالعان شەكتەۋدى ءبىز كۇشەيتەتىن بولامىز. وڭىردەگى كاسىپورىندار جۇمىسىنا، ازىق-تۇلىك تاسىمالداۋ مەن وتكەرۋگە قاتىستى دا باقىلاۋ كۇشەيتىلمەك. وسى رەتتە ەسكەرە كەتەتىن ءبىر جايت - كەز كەلگەن جەردە سانيتارلىق ساقتىقتى، اسىرەسە كەزەكتە تۇرعاندا ارا قاشىقتىق ساقتاپ، الدىن الۋ شارالارىنا مۇقيات بولعان ابزال»، - دەدى عازيز نادۋيەۆ.

ال وبلىس اكىمىنىڭ ءبىرىنشى ورىنباسارى بەكبولات ورىنبەكوۆ كۇشەيتىلگەن تالاپتارعا توقتالىپ ءوتتى.

«وڭىردە كارانتين شارالارى قاتاڭداتىلماق. ەڭ الدىمەن، تاراز قالاسى مەن وبلىس كولەمىندە قوعامدىق كولىكتەردىڭ جۇمىستارى تولىق توقتاتىلادى. بۇل ماسەلە بويىنشا وڭىردەگى 442 اۆتوبۋستىڭ 43 باعىتپەن جۇمىس جاساعان كەزىندە ولاردىڭ سانىن 10 باعىتقا ازايتتىق. الايدا تاسىمالداۋمەن اينالىسقان قالعان اۆتوبۋستار اۋەلى ءجۇرۋ ءتارتىبىن ساقتامادى. اۆتوبۋسپەن قاتىنايتىن تۇرعىنداردىڭ سانى كۇرت كوبەيۋىنە بايلانىستى وسىنداي قادامعا بارۋىمىزعا تۋرا كەلدى»، - دەدى ب. ورىنبەكوۆ.

ول جەڭىل كولىك پەن تۇرعىنداردىڭ قوزعالىسىنا قاتىستى دا تالاپتىڭ كۇشەيەتىنىن ايتتى.

«قالا مەن وبلىس دەڭگەيىندە جەڭىل كولىكتىڭ سانى كوبەيدى، ونىڭ ىشىندە ەكى جۇرگىزۋشىنىڭ بىرىندە انىقتاماسى بار. ءتىپتى اۋىل اكىمىنىڭ انىقتاماسى دا كەزدەسەدى. وسىنىڭ ءبارىن ەسكەرە كەلىپ، وڭىردەگى 38 بلوك بەكەتتە 17- ءساۋىر كۇنى تاڭعى ساعات 8.00 دەن باستاپ ونداي انىقتامانىڭ كۇشى جويىلاتىندىعىن ءمالىم ەتەمىز. بۇل ماسەلە قالاي شەشىمىن تابادى؟ ول ءۇشىن ءبىز 14 مىڭنان استام كولىك پەن ادام سانى ەنگىزىلگەن «سەرگەك» بازاسى مەن پلانشەتتەرگە باسقارما باسشىلارىمەن، قالا-اۋدان اكىمدەرىمەن، باسقا دا مەملەكەتتىك قىزمەتشىلەرمەن كەلىسە وتىرىپ، تولىق تازالاۋ جۇمىسىن جۇرگىزەمىز. حالىقتىڭ قالا ىشىندەگى قوزعالىسى قازىر ەشقانداي سىن كوتەرمەيدى. وسىعان بايلانىستى جەرگىلىكتى پوليتسيا قىزمەتى مەن اسكەريلەر بىرلەسە وتىرىپ، كۇندىزگى ۋاقىتتا ناقتى شارالار قابىلدايتىن بولادى»، - دەدى وبلىس اكىمىنىڭ ءبىرىنشى ورىنباسارى.

مۇنداي شەشىمدەردى تاراز قالاسى مەن اۋدان اكىمدەرى ءوز ايماقتارىندا دا قابىلداۋى قاجەت.