كوروناۆيرۋس: الماتىلىق دارىگەردىڭ تەست ناتيجەسى باسقا بىرەۋمەن اۋىسىپ كەتكەن

ۆيتسە-مينيستر بۇل تۋرالى Facebook پاراقشاسىندا جازدى.

«وكىنىشكە قاراي، بۇگىن الەۋمەتتىك جەلىدە تاراعان ارىپتەستەرىمنىڭ ۆيدەوسى كوپشىلىكتى قايران قالدىردى. مينيستر وسىعان بايلانىستى الماتىدا ءىس ساپاردا جۇرگەن ماعان دارىگەرلەرمەن كەزدەسىپ، ماسەلەنى وبەكتيۆتى تۇردە شەشۋدى تاپسىردى. كەزدەستىم، سويلەستىم. جاعداي مىناداي: دارىگەرلەردىڭ قاۋىپسىزدىگى ءۇشىن مينيسترلىك ولاردى ءجيى-ءجيى كوروناۆيرۋسقا تەستىلەۋدەن وتكىزۋ جونىندە شەشىم قابىلداعان. الايدا بۇگىن كەزدەيسوق جاعداي ورىن الىپ، ەكى دارىگەردىڭ اتى-ءجونى بىردەي بولىپ شىقتى. ونىڭ ۇستىنە بازادا ەكەۋى ءبىر اۋرۋحانادا جۇمىس ىستەيدى دەپ تۇر. ءسويتىپ تەستىلەۋ ناتيجەسىن جاريالايتىن كەزدە قاتە كەتكەن. ءبىز وقيعانىڭ ءمان-جايىن انىقتادىق، ەندى ءبارى ءوز ورنىنا كەلدى. سوڭىندا ايتەۋىر ەشكىم زارداپ شەككەن جوق. داۋ-داماي شەشىلدى»، - دەيدى ۆيتسە-مينيستر.

ونىڭ ايتۋىنشا، مينيسترلىك بۇل ىستەن قورىتىندى شىعارىپ، بۇدان بىلاي تەستىلەۋ ناتيجەسىن بەرەتىن كەزدە قوسىمشا تەكسەرۋ جۇرگىزىلەدى.

«ادام فاكتورىن بارىنشا ازايتامىز. جاعدايدى پايدالانىپ، ارىپتەستەرىمە العىس ايتىپ، قولداۋ كورسەتكىم كەلەدى. تەزىرەك قاتارعا قوسىلىپ، حالىققا كومەك كورسەتە بەرىڭىزدەر. ارىپتەستەر، بۇگىنگى كۇنى سىزدەردىڭ بىرلىگىڭىز بارىنەن ماڭىزدى»، - دەپ جازادى كامالجان نادىروۆ.

ايتا كەتەيىك، كەشە الماتىلىق 110 دارىگەردىڭ جاپپاي كوروناۆيرۋس جۇقتىرعانى تۋرالى جازعان بولاتىنبىز. ولاردىڭ كەيبىرى «كوكتەم» شيپاجايىنا كارانتينگە جاتقىزىلعان.

مەدقىزمەتكەرلەر ۆيدەو ۇندەۋ ءتۇسىرىپ، ءمينيستردىڭ اتالمىش جاعدايعا نازار اۋدارۋىن وتىنگەن بولاتىن. كەشە كەشكىسىن ورتالىق اۋرۋحاناداعى جاپپاي كوروناۆيرۋس جۇقتىرۋ دەرەگىن تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتى باسشىسىنىڭ ورىنباسارى نۇرحان ءسادۋاقاسوۆ تەكسەرەتىنى بەلگىلى بولدى.

وسى جاعدايدان كەيىن الماتى قالالىق ورتالىق اۋرۋحاناسىنىڭ باس دارىگەرى الماس دجۋۆاشيەۆ قىزمەتىنەن بوساتىلدى.