07:31, 14 - ءساۋىر 2020 | GMT +6
الەمدەگى ەڭ ۇلكەن ۇشاق تاعى دا الماتىعا قوندى
الماتى. قازاقپارات - الەمدەگى ەڭ ۇلكەن جۇك ۇشاعى ان-225 «مريا» تاعى دا الماتىعا جانارماي قۇيۋ ءۇشىن قوندى، دەپ حابارلايدى قازاقپارات ءتىلشىسى قالا اۋەجايىنىڭ باسپا ءسوز قىزمەتىنە سىلتەمە جاساپ.
بۇل جولى بورت قىتايدان سالماعى 102 توننا بولاتىن رەكوردتىق جۇكپەن - ۇشىپ كەلدى. ۇشاققا مەديتسينالىق ماقساتتاعى بۇيىمدار جانە COVID-19 قارسى قۇرال-جابدىقتار تيەلگەن. بۇل تۋرالى ۋكراينالىق ب ا ق حابارلادى. ول الماتىدان پولشا استاناسىنا ۇشادى. ۆارشاۆادا 14-ءساۋىر كۇنى تاڭعى ساعات 09:30 شاماسىندا بولۋى ءتيىس.
ەسكە سالساق، بۇعان دەيىن دە الماتى اۋەجايىنا الەمدەگى ەڭ ۇلكەن ان-225 «مريا» ۇشاعى كەلىپ قونعانى تۋرالى حابارلاعان بولاتىنبىز. مريا ۇشاعى 1988 -جىلى كييەۆتە جاسالعان. الەمدە مۇنداي ۇشاق ازىرگە بىرەۋ-اق.