اقمولا وبلىسىنداعى ناۋقاستار كوروناۆيرۋستى قايدان جۇقتىردى

1 - ساۋىردەگى جاعداي بويىنشا اقمولا وبلىسىندا ۆيرۋس جۇقتىرعان ناۋقاستار سانى 16 عا جەتتى. سوڭعى انىقتالعان 5 ناۋقاستىڭ تورتەۋى بۇرىن كوروناۆيرۋس جۇقتىرعان ناۋقاستارمەن بايلانىستا بولعان، 1 ادام كوكشەتاۋ قالاسىنان تابىلدى. ەكى ناۋقاس 1984 -جىلى تۋعان ايەل مەن 2017 -جىلعى ءسابي - قوياندى اۋىلىنىڭ تۇرعىندارى. ولار 1979 -جىلى تۋعان قوياندى اۋىلىنىڭ تۇرعىنىنان ۆيرۋس جۇقتىرعان. ەر ادام ەلوردادا كوروناۆيرۋس ينفەكتسياسى زەرتحانالىق تۇردە راستالعان اداممەن جۇمىس بابىمەن بايلانىستا بولعان. 1962 -جىلى تۋعان ايەل مەن 2011 -جىلعى ءجاسوسپىرىم قوسشى اۋىلىندا تۇرادى. ولار نۇر- سۇلتان قالاسىنان كەلگەن تۋىس ايەلمەن كەزدەسكەن. بۇل ايەلدەن 26 - ناۋرىزدا كوروناۆيرۋس ينفەكتسياسى تابىلدى. ال 28 - ناۋرىزدا وسى وقيعا بويىنشا 3 ادام اۋرۋحاناعا جاتقىزىلدى. كوپبەيىندى وبلىستىق اۋرۋحانا جانىنداعى ەمحانانىڭ سانيتارلىق قىزمەتكەرى - 1962 -جىلى تۋعان كوكشەتاۋ تۇرعىنى جۇمىس بارىسىندا دەنە قىزۋىمەن جانە جرۆي بەلگىلەرىمەن تەراپيەۆتكە قارالعان. ايەلگە سول ساتتە COVID-19 تەستى جۇرگىزىلدى جانە ينفەكسيانىڭ بارى راستالدى. ونىمەن بايلانىستا بولعان تۇلعالار انىقتالىپ جاتىر.

ازىرگە 35 مەديتسينالىق قىزمەتكەر، 4 وتباسى مۇشەسى كارانتيندىك ستاتسيونارعا جاتقىزىلدى. كوپبەيىندى وبلىستىق اۋرۋحانادا كارانتين جاريالانىپ، ەپيدەميالىق تەكسەرۋ ءجۇرىپ جاتىر. پاتسيەنتتەر بۇگىن اقمولا وبلىستىق تۋبەركۋلەزگە قارسى ديسپانسەرىنىڭ ينفەكسيا بولىمىنە جاتقىزىلدى. جاعدايلارى قاناعاتتانارلىق. قازىرگى ۋاقىتتا وبلىستا 174 پاتسيەنت اۋرۋحانادا جاتىر. 13 ادام - اقمولا وبلىستىق تۋبەركۋلەزگە قارسى ديسپانسەرىندە، 2 ادام - نۇر- سۇلتان قالالىق فتيزيوپۋلمونولوگيا ورتالىعىندا، 94 پاتسيەنت - پروۆيزورلىق ورىندا، 65 ادام - كارانتيندىك ستاتسيوناردا جاتىر. ودان بولەك، 362 ادام ءۇي كارانتينىنە وقشاۋلانعان. ايتا كەتەيىك، ەلىمىزدە كوروناۆيرۋس ينفەكسياسىن جۇقتىرۋ بويىنشا بارلىعى 372 جاعداي تىركەلگەن.