وسكەمەن مەن سەمەي تۇرعىندارى ۇيدەن شىعۋ ءۇشىن پ ي ك- تەن رۇقسات قاعازىن الادى

رۇقسات قاعازىنىڭ 2 ءتۇرى بار. ءبىرىنشى ءتۇرى - قالالاردىڭ تىنىس-تىرشىلىگىن قامتاماسىز ەتەتىن ۇيىم قىزمەتكەرلەرى، جۇمىس ىستەيتىن ازاماتتارعا ارنالعان.

ەكىنشى ءتۇرى - ءاربىر وتباسىنا بەرىلەدى. ول ارقىلى اپتاسىنا 3 رەت ساۋدا ورىندارىنا، ءدارىحانالارعا، بانكتەر مەن مەديتسينا مەكەمەلەرىنە بارۋعا بولادى.

رۇقسات قاعازىنىڭ جاسىل ءتۇسى - جۇپ كۇنى، اق ءتۇسى - ايدىڭ تەك تاق كۇندەرىندە شىعۋعا مۇمكىندىك بەرەدى.

«رۇقسات قاعازى ءار پاتەرگە بىرەۋدەن بەرىلەدى. الايدا ءار ادام مىندەتتى تۇردە وزىمەن بىرگە جەكە كۋالىگىن دە الىپ ءجۇرۋى كەرەك. رۇقسات قاعازىنىڭ جارامدىلىق مەرزىمى - 1 اي. كوپقاباتتى ۇيدە تۇراتىندار اتالمىش قاعازدى الۋ ءۇشىن 1- ساۋىردەن باستاپ پ ي ك- كە جانە كوندومينيۋمعا جۇگىنۋلەرى ءتيىس. ال جەر ءۇي تۇرعىندارى جەرگىلىكتى باسقارۋ كوميتەتتەرىنە بارۋى قاجەت»، - دەدى وسكەمەن قالاسىنىڭ اكىمى جاقسىلىق ومار وڭىرلىك كوممۋنيكاتسيالار قىزمەتىندە وتكەن ونلاين-بريفينگ بارىسىندا.

ەستەرىڭىزگە سالا كەتسەك، وسىعان دەيىن 2- ساۋىردەن باستاپ وسكەمەن مەن سەمەيدە قوسىمشا شەكتەۋلەر ەنگىزىلەتىندىگى حابارلانعان.