بوكستان ۇلتتىق قۇرامانىڭ باس باپكەرى عالىمبەك كەنجەبايەۆ: ماقساتىمىز - وليمپياداعا سەگىز سالماقتا دا جولداما الۋ

- عالىمبەك قالي ۇلى، حالىقارالىق وليمپيادا كوميتەتىنىڭ جۇمىس توبى قىتايداعى قاۋىپتى كوروناۆيرۋسقا بايلانىستى 3-14- اقپان ارالىعىنا جوسپارلانعان 2020-جىلعى توكيو وليمپياداسىنا ازيا/تىنىق مۇحيتى ەلدەرى بوكسشىلارىن ىرىكتەۋ ءتۋرنيرىن وزگە ەلگە، ياعني يوردانيانىڭ اممان قالاسىنا اۋىستىرعانى بەلگىلى. بۇل شەشىم العاشقى جوسپارلارىڭىزعا كەرى اسەرىن تيگىزىپ جاتقان جوق پا؟

- حالىقارالىق وليمپيادا كوميتەتىنىڭ بۇل شەشىمىن وڭ قابىلدادىق. سەبەبى، ءارقاشان ادام دەنساۋلىعى باستى ورىندا بولۋ كەرەك. ءبىز دە، بوكسشىلارىمىزدىڭ باس اماندىعى مەن قاۋىپسىزدىگىن باستى نازاردا ۇستايمىز. سوندىقتان، اتالعان ءتۋرنيردىڭ ورنىن اۋىستىرعانى وتە دۇرىس بولدى.

- وليمپياداعا ىرىكتەۋ ءتۋرنيرىنىڭ وتەتىن ورنىمەن قاتار ۋاقىتى دا وزگەردى. ياعني العاشقى ۋاقىت اقپان ايىنىڭ باسى بولسا، ەندى 3-11- ناۋرىز ارالىعىنا تۋرا ءبىر ايعا ءارى سىرعىدى. بۇل ۋاقىت وزگەرىسى ەرتەڭ بايگەگە شاپقالى تۇرعان بوكسشىلارىمىزدىڭ كوڭىلىن سۋىتىپ، ارى قاراي جاتتىعۋىن جالعاستىرۋعا كەرى اسەر بەرىپ جاتقان جوق پا؟

- جوق، ەشقانداي كەرى اسەرى بولىپ جاتقان جوق. ءبىز، وسىعان دەيىن قالاي دايىندالىپ جاتساق، ارى قاراي دا سولاي جاتتىعۋىمىزدى جالعاستىرا بەرەمىز. ەلورداعا جينالىپ، جاتتىعۋدى باستاعالى ءبىراز كۇن بولىپ قالدى. ءبىزدىڭ قازىرگى بار ماقساتىمىز - ناۋرىزداعى وليمپياداعا ىرىكتەۋ تۋرنيرىندە بارلىق سالماق تۇرىنەن جولداما جەڭىپ الۋ. بىزدە دايىندىق ءۇشىن ناۋرىزعا دەيىن ءالى ءبىر اي ۋاقىت بار. وعان دەيىن ءبىز تاعى ءبىر جاتتىعۋ جيىنىن وتكىزىپ، دايىندىقتى ۇدەتە تۇسەمىز.

- ىرىكتەۋ تۋرنيرىنە بوكسشىلار تولىق قۇرامدا قاتىسادى عوي؟

- بۇيىرسا، تولىق قۇرامدا بارامىز دەپ وتىرمىز. قالايدا، سەگىز سالماق دارەجەسىنىڭ بارلىعىندا ليتسەنزياعا يەلىك ەتۋىمىز كەرەك. قازىر، وزدەرىڭىز دە جاقسى بىلەسىزدەر، ازيا بوكسىنىڭ قارقىنى جوعارى. سوندىقتان، بىزگە بوساڭسۋعا بولمايدى.

- يوردانياداعى ىرىكتەۋ جارىسىنا باراتىن بوكسشىلار ءتىزىمى بەلگىلى بولدى ما؟

- توكيو وليمپياداسىنا جولداما تاراتاتىن ەكى تۋرنير بار. ونىڭ العاشقىسى - وسى يوردانيانىڭ اممان قالاسىندا وتەتىن تۋرنير. ەكىنشىسى، مامىر ايىندا پاريجدە وتەتىن الەمدىك ىرىكتەۋ ءتۋرنيرى. ءبىز، بارىنشا اممان قالاسىندا جولداما الۋعا كۇش سالىپ جاتىرمىز. سوندىقتان، ءبىرىنشى تۋرنيرگە ەڭ مىقتى دەگەن بوكسشىلاردى الىپ بارامىز. الايدا، ازىرگە كىمدەردىڭ باراتىنىن ايتۋ ەرتەرەك. سەبەبى، جاتتىعۋ بارىسىندا كەيدە ويلاماعان جاعدايلار ورىن الۋى ىقتيمال. ياعني سەنىپ وتىرعان ءبىر بوكسشىمىز جاراقات الىپ قالىپ، تاڭداۋ ەكىنشى ءنومىرلى بوكسشىعا ءتۇسۋى دە مۇمكىن. سول سەبەپتى، ءدال قازىر ناقتى كىمدەردىڭ باراتىنىن ايتا المايمىز.

- وسىعان دەيىن، كاسىپقوي بوكسشىلاردى وليمپياداعا قاتىستىرۋ، قاتىستىرماۋ جونىندە پىكىرتالاس بولىپ جاتقانىن ەستىگەن ەدىك. بۇل ماسەلە جونىندە نە ايتار ەدىڭىز؟

- ول ماسەلە تولىعىمەن شەشىلگەن جوق. حالىقارالىق وليمپيادا كوميتەتى قاراستىرىپ جاتىر. كاسىپقوي رينگتە تەك 15 جەكپە-جەك وتكىزگەن، ءالى دە اتاق-داڭقى شىقپاعان بوكسشىلارعا قاتىسۋعا رۇقسات بەرەدى دەپ ەستىدىم. ءبىراق، بۇل ناقتى شەشىم ەمەس. سوندىقتان، بىردەڭە ايتا المايمىن.

- ال ءوزىڭىزدىڭ جەكە كوزقاراسىڭىز قالاي؟ نەگىزى، كاسىپقوي بوكسشىلاردى قاتىستىرعان دۇرىس پا؟

- مەنىڭ ويىمشا، بەلگىلى ءبىر تيتۋلعا يە بولعان كاسىپقوي بوكسشىلاردى وليمپياداعا قاتىستىرۋدىڭ كەرەگى جوق. ولاردىڭ دايىندىعى، جۇدىرىقتاسۋ تەحنيكاسى وزگەشە بولادى. ال اۋەسقوي بوكسشىلاردا باسقاشا. كاسىپقويلار جىلىنا 3-4 نەمەسە، 5-6 رەت قانا شارشى الاڭعا شىعادى. بىزدە اي سايىن، ءار ءتۇرلى جارىستار وتەدى. جىل بويى شارشى الاڭعا شىعامىز. ەگەر، كاسىپقويلاردى قاتىستىراتىن بولسا، ولارمەن ارنايى كەلىسىمشارت جاساپ، وقۋ-جاتتىعۋدى بىرگە وتكىزۋىمىز كەرەك. مەنىڭ ويىمشا، كاسىپقوي رينگتە جۇرگەن بوكسشىلار اۋەسقويعا كەلە بەرمەيدى. ال، اۋەسقويلار كاسىپقويعا تەز كەتىپ قالادى.

- اڭگىمەڭىزگە راحمەت! ساتتىلىك تىلەيمىز...

فوتو: olympic.kz

اۆتور: كۇنسۇلتان وتارباي