سىرتقى ىستەر مينيسترلىگى قىتايداعى قازاقستان ازاماتتارىنىڭ ناقتى سانىن انىقتاپ جاتىر
«قازىرگى ۋاقىتتا قازاقستان ازاماتتارى قىتايدىڭ ونداعان قالالارىندا ءجۇر. ولاردىڭ كوپشىلىگى ءتۇرلى سەبەپتەرمەن كونسۋلدىققا تىركەلمەيدى. ق ر سىرتقى ىستەر مينيسترلىگى قازاقستاننىڭ بەيجىڭدەگى ەلشىلىگى ارقىلى قىتايدىڭ مەملەكەتتىك ورگاندارىمەن بىرلەسىپ، قحر- داعى قازاقستان ازاماتتارىنىڭ ناقتى سانىن انىقتاپ جاتىر»، - دەپ حابارلادى ق ر س ءى م.
قازىر تەك قازاقستان عانا ەمەس، الەمنىڭ باسقا ەلدەرىنىڭ دە ءوز ازاماتتارىن ەۆاكۋاتسيالاۋ مۇمكىندىگىن قاراستىرىپ جاتقانىن اتاپ ءوتتى.
«ۋحان قالاسىنا كارانتين ەنگىزىلۋىنە بايلانىستى قوعامدىق كولىكتەر مەن حالىقارالىق اۆتوبۋس، تەمىرجول جانە اۋە قاتىناسى توقتاتىلدى. وقيعا اينالاسىندا ماسەلەنى ۋشىقتىرماۋدى سۇرايمىز. ەلىمىزدىڭ ۇكىمەتى ۆيرۋستىڭ قازاقستان اۋماعىنا ەنۋىن شەكتەۋ بويىنشا بارلىق قاجەتتى شارالاردى قابىلداپ جاتىر»، - دەلىنگەن حابارلامادا.
قىتايداعى قازاقستان ەلشىلىگىنىڭ اقپاراتىنا سايكەس، 2020 -جىلعى 27 - قاڭتارداعى جاعداي بويىنشا، ق ح ر اۋماعىندا انىقتالعان كوروناۆيرۋستىڭ جاڭا تۇرىنەن تۋىنداعان اۋرۋ پاتسيەنتتەردىڭ اراسىندا ق ر ازاماتتارى جوق.
«قىتايدىڭ دەنساۋلىق ساقتاۋ ورگاندارى دا وسى ۆيرۋستىڭ ق ح ر- دان تىس جەرلەرگە كەڭىنەن تارالۋىن بولدىرماۋ ءۇشىن ءتيىستى شارالار قابىلداۋدا. قوسىمشا قابىلداناتىن شارالار تۋرالى دەر كەزىندە جاريالاپ وتىرامىز. قازىرگى ۋاقىتتا ۇكىمەتتە وتكەن كەڭەستە ءبىزدىڭ ازاماتتارىمىزدىڭ ەپيدەميولوگيالىق قاۋىپ- قاتەرلەردى جويعانشا ق ح ر- عا شىعۋىن شەكتەۋ تۋرالى بەرىلگەن ۇسىنىمدارىن قايتا اتاپ وتكىمىز كەلەدى جانە كارانتين سەبەبىنەن جەرگىلىكتى بيلىك تاراپىنان وقشاۋلانباعان قالالارداعى ازاماتتارعا وتانىنا ورالۋ مۇمكىندىگىن قاراستىرۋدى ۇسىنامىز»، - دەيدى مينيسترلىك.
قازاقستاننىڭ بەيجىڭدەگى ەلشىلىگى مەن شاڭحاي جانە گونكونگ قالالارىنداعى باس كونسۋلدىقتاردىڭ ق ح ر ازاماتتارى ءۇشىن ۆيزالار بەرۋ جۇمىسى شتاتتىق رەجيمدە جۇرگىزىلۋدە. شەكتەۋ قازاقستان ارقىلى ترانزيتپەن ۇشاتىن قىتاي ازاماتتارى ءۇشىن 72 ساعاتتىق ۆيزاسىز رەجيمگە عانا قاتىستى بولماق.
اۆتور: ايجان سەرىكجان قىزى