19:52, 27 - قاڭتار 2020 | GMT +6
قىتايداعى كوروناۆيرۋستىڭ سەبەبى انىقتالدى
نۇر-سۇلتان. قازاقپارات – قىتاي عالىمدارى كوروناۆيرۋستىڭ جاڭا ءتۇرىنىڭ پايدا بولۋ سەبەپتەرىن انىقتادى. بۇل تۋرالى قىتاي حالىق رەسپۋبليكاسىنىڭ ورتالىق تەلەارناسى مالىمدەدى.
ماماندار ۋحانداعى تەڭىز ونىمدەرى بازارىنان الىنعان سىنامالاردى زەرتتەۋدەن وتكىزدى. ونىڭ قاتارىندا جابايى اڭدار دا بولىپتى. زەرتتەۋ ناتيجەسى بويىنشا 585 سىنامانىڭ 33-نەن كوروناۆيرۋستىڭ جاڭا ءتۇرى ۆيرۋستىق نۋكلەين قىشقىلى انىقتالعان. وسىعان وراي ماماندار ەپيدەميانىڭ تاراۋىنا جابايى اڭ ساۋداسى اسەر ەتۋى مۇمكىن دەگەن قورىتىندىعا كەلىپ وتىر.
ەسكە سالا كەتەيىك، «تۋريستىك قامقور» كورپوراتيۆتىك قورىنىڭ دەرەگى بويىنشا قىتايدا مىڭعا جۋىق قازاقستان ازاماتى ءجۇر. ولاردىڭ دەنى حاينان ارالىنىڭ تۋريستەرى. ەلىمىزدىڭ سىرتقى ىستەر مينيسترلىگىندە ازاماتتارىمىزدى ەلگە قايتارۋ شارالارى قولعا الىنىپ جاتىر.