قىتايمەن شەكاراداعى وتكىزۋ بەكەتتەرىندە سانيتارلىق- ەپيدەميولوگيالىق باقىلاۋ كۇشەيتىلدى

بۇل شارالار قىتايدىڭ ۋحان قالاسىنداعى كوروناۆيرۋستىڭ ورشۋىنە بايلانىستى قولعا الىندى. ۆيرۋس تارالۋىنىڭ الدىن الۋ ءۇشىن مينيسترلىك قىتايعا ساپاردان ۋاقىتشا باس تارتۋعا كەڭەس بەرەدى.

«التىنكول تەمىرجولى»، «نۇر جولى»، «قورعاس» ح ش ى و باقىلاۋ- وتكىزۋ بەكەتتەرىندە جانە ءۇرىمجى - الماتى پويىزدارىندا اۋرۋدىڭ الدىن الۋ شارالارى جۇرگىزىلۋدە.

ەسكە سالا كەتەيىك، «قورعاس» ح ش ى و 2020 -جىلدىڭ 2 - اقپانىنا دەيىن جابىق تۇر. وتكىزۋ بەكەتتەرىنىڭ قىتايدىڭ جاڭا جىل مەرەكەسىن تويلاۋعا بايلانىستى جابىلعان بولاتىن.

سونىمەن بىرگە بارلىق اۋەجايلار مەن تەمىرجول ۆوكزالدارىندا، اۆتوموبيل وتكەلدەرىندە، اسىرەسە ق ح ر- دان كەلگەن ادامدارعا (جولاۋشىلارعا، تاسىمالداۋشىلارعا، ەكيپاج مۇشەلەرىنە، بورتسەرىكتەرگە جانە باسقالارعا) مىندەتتى تەرمومەتريالىق تەكسەرۋ جۇرگىزىلەدى.

قازىرگى ۋاقىتتا مەملەكەتتىك شەكارانىڭ وتكىزۋ بەكەتتەرىندە ق ح ر- دان كەلگەن 19704 ادام تەكسەرۋدەن ءوتتى: الماتى جانە نۇر- سۇلتان حالىقارالىق اۋەجايلارىندا 17043 ادام، تەمىرجول ۆوكزالىندا - 161 ادام تەكسەرىلدى. ولاردىڭ اراسىندا دەنە قىزۋى كوتەرىلگەن جانە سىرقات بەلگىلەرى بار جولاۋشىلار بولمادى.

ايتا كەتەيىك، مەديتسينالىق ۇيىمداردا قاجەتتى ءدارى- دارمەكتەر مەن مەديتسينالىق ماقساتتاعى بۇيىمداردىڭ ءتىزىمى جاسالدى. جەرگىلىكتى دەنساۋلىق ساقتاۋ ورگاندارى جۇقپالى اۋرۋلار ستاتسيونارىنىڭ پاتسيەنتتەردى قابىلداۋعا دايىندىعىن جانە باسقا اۋرۋحانالارعا قوسىمشا توسەك ورىندارىمەن قامتاماسىز ەتتى. سونىمەن بىرگە، مەديتسينالىق قىزمەتكەرلەردىڭ تەوريالىق جانە پراكتيكالىق دايىندىعى پىسىقتالدى.

الەۋمەتتىك مەديتسينالىق ساقتاندىرۋ قورى نەگىزىندە 1406 جانە 87172768043 Call-ورتالىعى اشىلدى. وندا تۇرعىندار تاۋلىك بويى قوڭىراۋ شالىپ، الەمدەگى كوروناۆيرۋستىق اۋرۋ جاعدايى تۋرالى قاجەتتى اقپارات پەن الدىن الۋ شارالارى تۋرالى بىلە الادى.

ق ر دەنساۋلىق ساقتاۋ مينيسترلىگى اتالعان جاعدايدى تۇراقتى باقىلاۋىنا الدى.

ەسكە سالايىق، كەشە قر پرەزيدەنتى قاسىم- جومارت توقايەۆ قىتايدان قازاقستان اۋماعىنا كوروناۆيرۋستىڭ تارالۋىنا جول بەرمەۋ بويىنشا ناقتى ۇيىمداستىرۋ شارالارىن قابىلداۋدى تاپسىرعان بولاتىن.

قازىر قىتايدا پنيەۆمونيالىق ينفەكتسيانىڭ جاڭا ءتۇرى تاراپ جاتىر. سىرقاتقا شالدىققان جانە كوز جۇمعاندار سانى كۇن ساناپ ارتىپ كەلەدى. العاشقى ناۋقاستار تىركەلگەن كۇندەرى (15 - قاڭتار) ەسەپكە 41 ادام الىنعان بولاتىن.

سوڭعى مالىمەتتەر بويىنشا كوروناۆيرۋس اۋرۋىمەن اۋىرعاندار سانى 2,7 مىڭ ادامنان استى، 80 ادام ءولىمى تىركەلگەن. جاڭا كوروناۆيرۋستىق ينفەكسيامەن اۋىراتىن ادامداردىڭ كوپشىلىگى حۋبەي پروۆينتسياسىندا (1 423, 76-سى قايتىس بولعان). قازاقستانمەن شەكارالاس ق ح ر شىڭجاڭ- ۇيعىر اۆتونوميالىق اۋدانىندا (ش ۇ ا ر) 5 ادامنىڭ اۋرۋدى جۇقتىرعانى انىقتالدى.

قازاقستان كوروناۆيرۋستى زەرتحانالىق جاعدايدا انىقتاۋعا مۇمكىندىك بەرەتىن پرايمەرلەردى ساتىپ الۋدى باستادى.

ق ر دەنساۋلىق ساقتاۋ مينيسترلىگى ەلىمىزدە ينفەكسيا تىركەلمەگەنىن رەسمي ءمالىم ەتتى.

ق ر سىرتقى ىستەر مينيسترلىگىنىڭ اقپاراتىنشا، كارانتينگە جابىلعان قىتايدىڭ ۋحان قالاسىندا بۇگىندە قازاقستاننان 230 ستۋدەنت وقيدى. ولاردىڭ 98- ءى عانا قالادا قالىپ وتىر. قالعاندارى دەمالىستىڭ باستالۋىنا بايلانىستى قازاقستانعا جانە باسقا دا ەلدەرگە كەتىپ قالعان.

ەلىمىز وڭىرلەرىندەگى بارلىق اۋەجايلاردا پروفيلاكتيكالىق شارالار جانە وقۋ- جاتتىعۋ جۇمىستارى جۇرگىزىلۋدە.

اۆتور: ايجان سەرىكجان قىزى