عىلىمي ديسسەرتاتسيا قورعاۋعا قويىلاتىن جاڭا تالاپتار قانداي - مينيستر جاۋابى

ءمينيستردىڭ ايتۋىنشا، عىلىمي قىزمەتتىڭ نەگىزگى ناتيجەلەرىن جاريالاۋ ءۇشىن ءبىلىم جانە عىلىم سالاسىنداعى باقىلاۋ كوميتەتى ۇسىنعان عىلىمي باسىلىمداردىڭ تىزبەسىنە كىرەتىن جۋرنالدارعا قويىلاتىن تالاپتاردى وزگەرتۋ بولىگىندە ق ر ءبىلىم جانە عىلىم مينيسترلىگىنىڭ 20№ بۇيرىعىنا وزگەرىستەر ەنگىزۋ تۋرالى بۇيرىق جوباسى ازىرلەنىپ، شەشىم قابىلدانعان.

«بۇگىندە وعان كونتەنتتىڭ جوعارى ساپاسىن ءاردايىم قامتاماسىز ەتە المايتىن بەلگىلى ءبىر ولشەمدەر بويىنشا ىرىكتەلگەن 177 وتاندىق باسىلىم كىرەدى. وسىعان بايلانىستى، ءبىز Scopus جانە Web of Science سياقتى دەرەكتەر قورىنىڭ تالاپتارىنا سايكەس وسى جۋرنالدارعا قويىلاتىن تالاپتارىمىزدى بەيىمدەۋ بويىنشا جۇمىستى باستادىق.

بۇل، مىسالى، قوسارلانعان جاسىرىن رەتسەنزيالاۋ، انىق رەداكتسيالىق ساياسات، قابىلدانعان ماقالالاردىڭ جۋرنالدىڭ تاقىرىپتىق باعىتىنا سايكەستىگى، شەتەلدىك رەتسەنزەنتتەر، بارلىق جاريالاۋ ءۇردىسىنىڭ ترانسپارەنتتىلىگى، كۇشتى رەداكتسيالىق القا، اۆتورلىق قۇقىقتى قورعاۋ جانە ت. ب. وسى تالاپتار 1-1,5 جىل ىشىندە كەزەڭ-كەزەڭمەن وسى تىزبەگە كىرەتىن بارلىق وتاندىق عىلىمي جۋرنالدارعا قولدانىلادى.

وسى ورايدا باسىلىمداردىڭ سانى قىسقارادى دەپ كۇتىلۋدە، ساپالى كونتەنت ءۇشىن باسەكەلەستىك ارتادى جانە بۇل جالپى العاندا حالىقارالىق دەڭگەيدەگى عىلىمي باسىلىمداردى شىعارۋدىڭ كاسىبي اكادەميالىق مادەنيەتىن قالىپتاستىرۋعا قىزمەت ەتەدى»، - دەپ جازادى مينيستر facebook پاراقشاسىندا.

اسحات ايماعانبەتوۆتىڭ ايتۋىنشا، مينيسترلىك Scopus جانە Web of Science حالىقارالىق بازالارىنىڭ قاتارىنا ەنۋى ءتيىس ءبىرقاتار عىلىمي جۋرنالداردى قارجىلىق قولداۋعا كونكۋرس جاريالاۋدى جوسپارلاپ وتىر. كوبىنەسە وتاندىق عىلىمي جۋرنالداردىڭ جوو مەن عىلىمي ۇيىمداردىڭ باسشىلارى نازارىنان تىس قالىپ جاتاتىندىعى قۇپيا ەمەس، كەيبىر جەرلەردە قارجىلىق قولداۋ جەتكىلىكسىز. مينيسترلىك تاراپىنان جەكەلەگەن جۋرنالداردى ىرىكتەۋ جانە قولداۋ ولاردىڭ ساپاسى مەن بەدەلىن ارتتىرۋعا مۇمكىندىك بەرەدى.

«ق ر بعم 127№ بۇيرىعىنا سايكەس، دوكتورانتقا قورعاۋعا شىعۋ ءۇشىن مىندەتتى تۇردە 7 ماقالا جاريالاۋ كەرەك، بۇل رەتتە ساپاسى بويىنشا ەرەكشە تالاپتار قويىلمايدى.

ناتيجەسىندە باستى نازار تەك ساندىق كورسەتكىشكە اۋدارىلىپ، ماقالالار ساپاسى كۇماندى جۋرنالداردا جاريالانا باستايدى. كەيىن عالىمدارىمىزدىڭ ماقالالارى حالىقارالىق بازالاردان شىعارىلعان بەلگىسىز ءبىر جۋرنالداردا باسىلىپ شىققاندا تاڭ قالىپ جاتامىز. البەتتە، قالىپتاسقان بۇل ءداستۇردى وزگەرتۋ كەرەك. ياعني، سۇرانىسقا يە ەمەس «ءالسىز» جۋرنالداردا ماقالالاردىڭ كوپ جاريالانۋىنا قاراعاندا، بەدەلدى جۋرنالداردا ساپالى جاريالانىمدار از شىققانى جاقسىراق دەپ انىق ايتۋعا بولادى. دەگەنمەن، بار ەرەكشەلىكتى ەسكەرە وتىرىپ، الەۋمەتتىك- گۋمانيتارلىق عىلىمداردىڭ دامۋ دەڭگەيىنە سايكەس كەلەتىن گۋمانيتارلىق جانە الەۋمەتتىك ماماندىقتار ءۇشىن جەكەلەگەن تالاپتار قالىپتاستىرىلاتىن بولادى»، - دەيدى ول.

سونىمەن قاتار، ماگيسترلىك جانە دوكتورلىق ديسسەرتاتسيالار جەتەكشىلەرىنە قويىلاتىن تالاپتار دا وزگەرەدى.

ەسكە سالساق، بۇعان دەيىن اسحات ايماعامبەتوۆ عىلىمدى باسقارۋ جۇيەسىندە قانداي وزگەرىستەر بولاتىنىن ايتقان ەدى.