قىزىلوردادا قۇرعاق تۇيە ءسۇتىن ءوندىرۋ قولعا الىنباق
بۇگىنگى تاڭدا اۋداندا تۇيە ءسۇتىن قابىلداۋ پۋنكتتەرىن قۇرۋ جۇمىستارى قولعا الىندى، دەپ حابارلايدى قازاقپارات ءتىلشىسى.
مۇنداي ورىن اۋدانعا قاراستى ارالقۇم ەلدى مەكەنىندە اشىلدى. باستاماشى - جەرگىلىكتى تۇرعىن بولات جاڭابايەۆ. جەرگىلىكتى كاسىپكەر وتكەن جىلى وسى ءىستى قولعا الۋعا بەل بۋىپ، ءسۇت قابىلداۋ پۋنكتىن اشۋ باعىتىندا الماتى قالاسىنداعى «نار» ج ش س- مەن كەلىسسوز جۇرگىزگەن. ناتيجەسىندە اتالعان ج ش س- ءنىڭ وكىلى عالىم كاپۋ ارالقۇم اۋىلىنا ارنايى قۇرىلعىلاردى جەتكىزىپ، شيكى تۇيە ءسۇتىن قابىلداۋدى باستاپ كەتتى.
اتاپ ءوتۋ قاجەت، جەرگىلىكتى جەردەن جينالعان ءسۇت ارنايى سالقىنداتقىش قوندىرعىسى بار اۆتوكولىكپەن قۇرعاق ءسۇت ءوندىرۋ زاۋىتىنا جونەلتىلەدى. وندىرىلگەن ءونىم الىس-جاقىن شەت ەلدەرگە ەكسپورتتالادى.
قازىرگى تاڭدا قابىلداۋ ورنىندا 3 ءسۇت قۇياتىن تسيستەرنا، 10 ءسۇت ساۋعىش ارنايى اپپارات، 3 ەلەكتر قۋاتىن بەرەتىن جانە ءسۇت قۇرامىن تەكسەرەتىن اپپارات پەن قوسىمشا ىدىستار ورنالاستىرىلعان. تۇيە ءسۇتىن قابىلداۋ پۋنكتى تولىعىمەن كۇشىنە ەنسە، بەس ادام تۇراقتى جۇمىسپەن قامتىلادى.