تەمىرجولشىلار الماتى- پەتروپاۆل پويىزىن دەر كەزىندە توقتاتىپ، اپاتتىڭ الدىن الدى
وتپەدەن 200 مەتر قاشىقتىقتا رەلستە جۇك كولىگى تۇرىپ قالعان، دەپ حابارلايدى قازاقپارات «ق ت ج - جۇك تاسىمالى» ا ق باسپا ءسوز قىزمەتىنە سىلتەمە جاساپ.
وتپە بويىنشا كەزەكشى بولات بەكبەرگەنوۆ دەر كەزىندە بوگەگىش دابىلىنىڭ تۇيمەشەسىن اعىتىپ، ورىن العان قاۋىپتى ماشينيستكە ەسكەرتىپ ۇلگەردى.
بەلگىلى بولعانداي، جۇك كولىگى تەمىر جول ۇستىنە شىعىپ، تەحنيكالىق اقاۋىنا بايلانىستى كەنەتتەن سول جەردە تۇرىپ قالعان. وتپە بويىنشا كەزەكشى مەن قاراعاندى لوكوموتيۆ پايدالانۋ دەپوسىنىڭ لوكوموتيۆ بريگاداسى - ماشينيست ۆياچەسلاۆ كوزلوۆ پەن ونىڭ كومەكشىسى مەيرام وحانوۆتىڭ ۇيلەسىمدى جۇمىسىنىڭ ارقاسىندا پويىز اۆتوموبيلگە سوعىلمادى.
وقىس وقيعا سالدارىنان پويىز ەكى ساعاتقا كەشىكتى.
ايتا كەتەر بولساق، 2019 -جىلى تەمىرجول وتپەلەرىندە 30 جول-كولىك وقيعاسى تىركەلگەن. ولاردىڭ باستى سەبەبى - جۇرگىزۋشىلەردىڭ جول ەرەجەسىن بۇزۋى.