اقتوبەدە ءبىر قورا قويدى ۇرلاپ، سويىپ العان توپ ۇستالدى

اۋدانداعى سارىبۇلاق اۋىلى تۇرعىنىنىڭ قوراسىنان 113 باس قويدىڭ ۇرلانعانى انىقتالىپ، جەدەل تەرگەۋ توبى ىزىنە ءتۇستى.

«قويدى اۋدان ورتالىعىنا ايداپ كەتكەنى بەلگىلى بولدى. ىزدەستىرۋ شاراسى كەزىندە قوبدا اۋىلىنىڭ شەتىندە ورنالاسقان ۇيلەردىڭ بىرىندە 5 قاساپشىنىڭ جۇرگەنى انىقتالدى. ولار قويدى باۋىزداپ، 23 ىن سويىپ ۇلگەرگەن. الدىن الا بولجام بويىنشا، كۇدىكتىلەر قوي يەسىنىڭ ۇيىندە جوق ەكەنىن پايدالانىپ، 40 شاقىرىم جەردەگى اۋدان ورتالىعىنا اكەلگەن»، - دەدى وبلىستىق پ د باسپا ءسوز قىزمەتىنىڭ جەتەكشىسى ەربولات سارقۇلوۆ.

ايتا كەتەيىك، قىلمىستىق كودەكستىڭ «ۇرلىق» بابى بويىنشا تەرگەۋ باستالدى. كۇدىكتىلەر قوبدا مەن سارىبۇلاق اۋىلىنىڭ تۇرعىندارى بولىپ شىقتى. ولار ۋاقىتشا ۇستاۋ يزولياتورىنا قامالدى. قازىر كۇدىكتىلەردىڭ وسىعان ۇقساس قىلمىستارعا قاتىسى بار-جوعى تەكسەرىلىپ جاتىر.

اۆتور: التىناي ساعىندىقوۆا