قازاقستاندا «ورالمان» تەرمينى «قانداس» دەپ الماستىرىلدى
«وزدەرىڭىز بىلەسىزدەر، پرەزيدەنت ءوزىنىڭ ۇستانىمىن ايتىپ، «ورالمان» تەرمينىنەن باس تارتىپ، «قانداس» دەگەن دۇرىس ەكەنىن بىلدىرگەن ەدى. سوندىقتان بۇگىن تالقىلانعان زاڭ جوباسىندا بۇل نورما كەلىسىلگەن. ەگەر دە الداعى ۋاقىتتا قۇجات قابىلدانسا، وندا «ورالمان» تۇسىنىگى «قانداس» سوزىنە الماستىرىلادى» ، - دەدى ۆەدومستۆو باسشىسى پارلامەنت ماجىلىسىندە تىلشىلەر ساۋالىنا جاۋاپ بەرە وتىرىپ. وسى ورايدا، مينيستر بۇل تەرمينگە قاتىستى قوعامداستىق تاراپىنان دا ۇسىنىستار بولعانىن ەسكە سالدى.
«مەن بۇل ۇسىنىستى قولدايمىن. جەكە ءوز باسىم قانداس باۋىرلارىمىز دەپ سويلەيمىن. ول ماعان كىشكەنە جاقىنداۋ. سوسىن بارلىق جەردە پايدالانىلعان «ورالمان» تەرمينى ەندى «قانداس» تەرمينى بولىپ جازىلادى» ، - دەدى ب. نۇرىمبەتوۆ.
ايتا كەتەيىك، بۇگىن پارلامەنت ءماجىلىسىنىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كوشى- قون پروتسەستەرىن رەتتەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى. زاڭ جوباسىندا قازاقستانعا كەلگەن ەتنيكالىق رەپاتريانتتار مەن قونىس اۋدارۋشىلار ءۇشىن قولايلى جاعدايلار جاساۋ ەسكەرىلگەن.
ەسكە سالا كەتەيىك، بيىل قىركۇيەك ايىندا مەملەكەت باسشىسى قاسىم- جومارت توقايەۆ «ورالمان» سوزىنەن باس تارتىپ، «قانداس» دەگەنىمىز ءجون بولاتىنىن ايتقان ەدى. «مەن بۇدان بۇرىن دا تاريحي وتانىنا كەلگەن قازاقتاردى «ورالمان» دەپ اتاۋدان باس تارتىپ، «قانداس» دەگەنىمىز ءجون بولادى دەگەن ەدىم. جەتى اتاسىن بىلەتىن حالىققا «قانداس» دەگەن ۇعىم جاراسادى»، - دەدى پرەزيدەنت.