بەسىكتى نەگە قاراۋسىز قالدىرۋعا بولمايدى؟
نۇر-سۇلتان. قازاقپارات - قازاق ەشقاشان ءسابي جاتاتىن بەسىكتى، ءسابيدىڭ جۋىلعان كىرىن دالاعا تاستاماعان.
بەسىكتى قاسيەتتى ساناعان، اياقپەن باسپاعان، يەسىز تاستاماي، بيىك جەرگە ءىلىپ قويعان. ويتكەنى، بەسىكپەن ۇرپاعىڭ وسەدى، اۋلەتىڭ كوركەيەدى دەپ جازادى «زامانا» باسىلىمى.
ءبىزدىڭ حالقىمىز ومىرگە كەلگەن جاس نارەستەنى پەرىشتەگە بالاعان، سوندىقتان دا بەسىكتى تازا ۇستاعان. جىن-شايتان جولاماسىن دەپ الاستاپ، قاسقىردىڭ ءتىسىن، تىرناعىن ءىلىپ، ۇكى قاداعان. بەسىكتىڭ كەرەك جابدىقتارىن كىرلەتپەگەن.
قازاق ءۇشىن بەسىك - كيەلى، قاسيەتتى زات. وعان قاتىستى ىرىمدار مەن تىيىمدار كوپ بولعان. ءارقايسىنىڭ ءوز ءمان-ماعىناسى، ورنى بار. بوس بەسىكتى تەربەتپەيدى. نانىم-سەنىم بويىنشا بوس بەسىككە ءىبىلىس بالاسىن جاتقىزادى دەپ ايتىلادى.
سونداي-اق بوس بەسىكتى ەشۋاقىتتا جابۋسىز قالدىرماعان. ۇستىنە اق ماتا جاۋىپ، ەڭ بولماعاندا ۇرشىعىنا ورامال بايلاپ قويۋ قاجەت. بالا وسكەن سوڭ بەسىكتى مىندەتتى تۇردە تورگە، ماڭدايشاعا ءىلىپ قويعان.
بەسىكتىڭ تەرىس جاعىنا وتىرمايدى. بەسىكتى ساۋدالامايدى. ايتقان باعاسىنا ساتىپ الادى. بەسىك جاسايتىن شەبەرلەر ىنساپتى بولۋى ءتيىس. كيەلى دۇنيەنىڭ باعاسىن كوتەرمەگەن، ساۋدالاسپاعان. سونداي-اق حالقىمىز بالاسىنىڭ بەسىگىن بىرەۋ سۇراسا، ارنايى ىرىم-جورالعى جاساپ، جاقسىلىققا بالاپ، تەك سودان كەيىن عانا جاقىن تۋىستارىنا عانا بەرەتىن بولعان.
قازاق حالقى شاڭىراقتى، بەسىكتى، تابالدىرىقتى قاسيەت تۇتقان. ال قاراۋسىز، كىرە بەرىستە قالعان ءسابي ارباسىنا شاڭ-توزاڭ تۇسەدى، شىبىن-شىركەي قونادى، ءتۇرلى جاندىكتەر ءتۇسىپ كەتەدى، كىرە بەرىستە تۇندە نەشە ءتۇرلى بوگدە ادامدار كىرىپ ءجۇرۋى دە مۇمكىن.