مينسكىدە قازاق كينوسىنىڭ فەستيۆالى وتەدى
مادەني ءىس-شارا بارىسىندا قالا تۇرعىندارى مەن قوناقتارىنىڭ نازارىنا ءار ءتۇرلى جانردا تۇسىرىلگەن وتاندىق كينوتۋىندىلار ۇسىنىلادى.
فەستيۆالدى قازاقستان رەسپۋبليكاسىنىڭ بەلارۋس رەسپۋبليكاسىنداعى ەلشىلىگىنىڭ قولداۋىمەن ق ر مادەنيەت جانە سپورت مينيسترلىگى جانە «قازاق فيلم» كينوستۋدياسى ۇيىمداستىرىپ وتىر. ايتا كەتسەك، بۇل ءىس-شارا بەلارۋس رەسپۋبليكاسىنىڭ پرەزيدەنتى الەكساندر لۋكاشەنكونىڭ الداعى قازاقستانعا جوسپارلانعان رەسمي ساپارى قارساڭىندا وتكىزىلىپ وتىر.
18 -قازاندا فەستيۆالدىڭ اشىلۋ سالتاناتىندا قازاقتىڭ تەنور داۋىستى ءبىرتۋار ءانشىسى امىرە قاشاۋبايەۆتىڭ ءومىرى تۋرالى باياندايتىن «امىرە» فيلمى كورسەتىلەدى. سونداي-اق ءىس- شارا بارىسىندا «قازاق فيلم» كينوستۋدياسىنىڭ باسقا دا تۋىندىلارى - رۇستەم ابدىراشيەۆتىڭ «قازاق حاندىعى. التىن تاق»، اقان ساتايەۆتىڭ «اناعا اپارار جول»، فارحات ءشارىپوۆتىڭ «قىزعىلت قويان تۋرالى حيكايا، ەرمەك تۇرسىنوۆتىڭ «شال» جانە «شىراقشى» فيلمدەرى ۇسىنىلادى. ال كىشكەنتاي كورەرمەندەر تولىقمەتراجدى «مۇزبالاق» (رەج. تۇردىبەك مايدان جانە تىلەك تولەۋعازى) انيماتسيالىق فيلمىن تاماشالاي الادى.
فيلمدەر مينسك قالاسىنداعى «بەلارۋس» كينوتەاترىندا (رومانوۆسكايا سلوبودا كوشەسى، 28) كورسەتىلەدى. كىرۋ تەگىن.