ورالدا مەكتەپ وقۋشىسىن ەر ادام ۇرلاپ كەتپەك بولعان

None
None
ورال. قازاقپارات - ورالدا مەكتەپ وقۋشىسىن ەر ادام ۇرلاپ كەتپەك بولعان، دەپ حابارلايدى قازاقپارات ءتىلشىسى.

قالاداعى №44 -مەكتەپ-گيمنازياسىنىڭ ديرەكتورى اقجارقىن تەمىرحانوۆانىڭ ايتۋىنشا، وقيعا 16 -قازان كۇنى ورىن الدى.

وسى ءبىلىم ورداسىنىڭ 5-سىنىپ وقۋشىسى ساباق اياقتالعان سوڭ ساعات 17.30-دا مەكتەپتەن شىعىپ، د. قونايەۆ اتىنداعى شاعىناۋداندا №27-ۇيگە قاراي كەتىپ بارا جاتقان.

سول مەزگىلدە قارا كيىم كيگەن بەيتانىس ەر ادام ارتىنان كەلىپ، موينىنان ۇستاپ، ارتقا قاراي سۇيرەگەن. قورىققان قىز بالا قاتتى شىڭعىرىپ جىبەرگەن. ونىڭ داۋىسىن ەستىگەن ايەل سۋ قۇياتىن ىدىسىمەن ەر ادامدى سوققىلاپ، قىزدى قۇتقارىپ قالعان. بۇل تۋرالى كەشكىسىن ساعات 21.00-دە قىزدىڭ اناسى وقۋشىنىڭ كۋراتورىنا(سىنىپ جەتەكشىسىنە – رەد.) حابارلاعان.

«17-قازان كۇنى قىزدىڭ اتا-اناسى مەكتەپكە شاقىرتىلىپ، بولعان جاعداي انىقتالدى. مەكتەپ اكىمشىلىگى تاراپىنان اناسى مەن قىزىنا پسيحولوگيالىق كومەك كورسەتىلدى. وقيعا جونىندە مەكتەپ ينسپەكتورىنا دا ەسكەرتىلدى. سونداي-اق اتا-اناسى قىزىن ساباقتان كەيىن ءوزى الىپ كەتەتىنى تۋرالى قولحات جازدى»، دەدى ا. تەمىرحانوۆا.

ب ق و پوليتسيا دەپارتامەنتىنىڭ باسپا ءسوز قىزمەتى قازىرگى كەزدە ءمان-جايدىڭ انىقتالىپ جاتقاندىعىن جەتكىزدى.

اۆتور: ەلجان ەرالى

سوڭعى جاڭالىقتار