بالالار ومىردەگى ۇلكەن قاتەلىكتەردى اتا-انادان ۇيرەنەدى
ءبىز بۇگىن اتا-انالاردىڭ بالا تاربيەسىندەگى قاتەلىكتەرى جايىندا ايتاتىن بولامىز.
ومىردەگى ۇلكەن قاتەلىكتەردىڭ بارلىعى - ۇساق دۇنيەلەردەن باستالاتىنىن ۇمىتپاڭىزدار قۇرمەتتى اتا-انالار!
بالاڭىز وسكەندە نەگە وسەكشى بولادى؟
جىلاپ جاتقان بالاڭىز جىلاعانىن قويسىن دەپ «مەنىڭ بالام جىلامايدى، جىلاي بەرەتىن كورشىنىڭ بالاسى ساكەن عوي، ول قاشان كورسەڭ ەڭىرەپ وتىرادى»، - دەپ بوتەن ادامنىڭ سىرتىنان وي قالىپتاستىرۋدى ۇيرەتتىڭىز.
نەمەسە، تۋعان تۋىستار جينالىپ وتىرعان ساتتە بالاڭىزدى شاقىرىپ الىپ، «قانە بالام مۇرات قالاي قورىلدايدى، ايگۇل قالاي جۇرەدى كورسەتشى»، - دەپ وزگەلەردى ءاجۋالاپ، مازاقتاۋدى بويىنا ءسىڭىرىپ، بولاشاققا عايباتشىل ءبىر ادامدى دايارلاپ بەردىڭىز.
بالاڭىز وسكەندە نەگە پاراقور بولادى؟
قاندايدا ءبىر جەتىستىككە جەتكەن بالاعا سىيلىق بەرىپ، جىلى ءسوز ايتىپ، ارقاسىنان قاعۋدىڭ ارتىقتىعى جوق. ءبىراق، ءسىز بالاڭىزعا كوبىنەسە سىيلىقتى كەلىسىم شارتپەن الۋدى ۇيرەتتىڭىز. ماسەلەن، «بالام ساباقتى جاقسى وقىساڭ ۆەلوسيپەد الىپ بەرەمىن نەمەسە مۋسوردى توگىپ كەلسەڭ كامپيت بەرەمىن»، - دەگەن سوزدەردى ايتۋ ارقىلى قوعامدا سىياقى الماسا ءونىمدى جۇمىس جاسامايتىن تاعى ءبىر پاراقوردى دايىندادىڭىز.
بالاڭىز وسكەندە نەگە وتىرىكشى بولادى؟
بالا كەزىندە ءسىز ونى ويناتىپ جاتىرمىن دەپ، ءمان بەرمەي، الداي بەرەتىنسىز. قولىڭىزدا جوق بولسا دا، «بالام بەرى كەلشى شوكالاد بەرەمىن»، - دەپ وتىرىكتى كوپ ايتتىڭىز. «قايدا كەتتىڭ؟» -دەپ ەسىكتەن جىلاپ، شىعارىپ سالىپ تۇرعان بالاڭىزعا «قازىر كەلەمىن»، - دەپ ۇزاااق ءىس-ساپارلارعا كەتە بەرەتىنسىز. ءسويتىپ، بالانىڭ بويىنا وتىرىكتى دارىتىپ، قوعامدا ۋادەسىندە تۇرمايتىن تاعى ءبىر ءوتىرشىنىڭ كوبەيۋىنە ۇلەس قوستىڭىز.
بالاڭىز وسكەندە نەگە مەيىرىمسىز بولادى؟
بالاڭىزدىڭ قولىنا سۇيىكتى نارسەسىن الىپ بەرىپ، «ەندى اكەڭ جاقسى ما، اناڭ جاقسى ما»، - دەگەن سۇراقتى قويۋ ارقىلى ەكەۋىن تەڭ جاقسى كورەتىن بالانىڭ پسيحولوگياسىن قاق ايىردىڭىز. سول ساتتە كەرەگىن الىپ سىزگە ءىشى جىلىپ تۇرعان بالاڭىزدىڭ، «اكەم جاقسى»، - دەگەن ءسوزىن ەستىپ، ءماز بولعانىڭىزبەن، ەرتەڭ دۇنيەسى بار اداممەن جىلى سويلەسىپ، دۇنيەسى جوق اداممەن قول الىسپايتىن، دۇنيەقوڭىز، مەيىرىمسىز ادامدى تاربيلەپ جاتقانىڭىزدى تۇسىنبەدىڭىز.
P. S. ومىردەگى ۇلكەن قاتەلىكتەردىڭ بارلىعى - ۇساق دۇنيەلەردەن باستالاتىنىن ۇمىتپاڭىزدار قۇرمەتتى اتا-انالار!
دايىنداعان بەيسەن سۇلتان ۇلى