ۇلىتاۋدا جوشى حان ەسكەرتكىشىن توقايەۆ تۇرعىزسا، ۇلت رۋحى ءدۇر سىلكىنەر ەدى - قازىبەك يسا

None
None
نۇر-سۇلتان. قازاقپارات -   ۇلىتاۋدا جوشى حان ەسكەرتكىشىن قاسىم-جومارت توقايەۆ تۇرعىزسا، ۇلت رۋحى ءدۇر سىلكىنەر دۇنيە بولار ەدى.

بۇل تۋرالى بۇگىن ۇلتتىق قوعامدىق سەنىم كەڭەسىنىڭ العاشقى وتىرىسىندا كەڭەس مۇشەسى قازىبەك يسا ايتتى، دەپ حابارلايدى قازاقپارات ءتىلشىسى.

«ەندىگى ماسەلەمىز ۇلتتىق رۋحتى كوتەرۋ ەڭ باستى مىندەتىمىز. ۇلتتىق مۇددەنى قورعاۋ ۇلتتىق رۋحتى وياتۋدان باستالادى. تاياۋدا ۇلت تاريحىنداعى  ۇلىتاۋعا قاسىم-جومارت توقايەۆ قازاقستان پرەزيدەنتى رەتىندە تۇڭعىش ساپار جاساپ، زيارات ەتىپ قايتتى. بوسقا بارعان جوق. كۇللى تۇركى الەمىنە ۇلگى بولاتىن وردالى وي ايتتى. ەۋرازيا كەڭىستىگىندە ەرەكشە زور الىپ يمپەريا التىن وردانىڭ 750 جىلدىعىن مەرەكەلەۋ تۋرالى باستاما كوتەرگەن مەملەكەت باسشىسى: «شىڭعىس حاننىڭ ۇلكەن ۇلى جوشىنىڭ مازارى قازاق جەرىندە تۇرعانىن بۇگىندە ەلىمىزدە جانە شەتەلدەگى جۇرتشىلىقتىڭ كوپشىلىگى بىلە بەرمەيدى. ونىڭ تاريحي تۇلعاسىنا الەمنىڭ نازارىن اۋدارىپ، كەسەنەسىن مادەني تۋريزم نىسانىنا اينالدىرۋ وتە ماڭىزدى مىندەت» دەپ اتاپ ءوتتى. مەملەكەت باسشىسىنىڭ  ۇلىتاۋ ساپارى مەن ۇلاعاتتى سوزدەرى رۋحىمىزدى كوتەرىپ، ەڭسەمىزدى بيىكتەتتى. ءيا، التىن وردانىڭ اتاسى جوشى حاننىڭ تۇلعاسىن ساقتاۋ تۇگەل تۇركى جۇرتىنا ورتاق ءىس»، - دەدى ول.

ۇلتتىق كەڭەس مۇشەسى الىپ يمپەريانىڭ العاشقى استاناسى سارايشىقتا التىن وردانىڭ تىزگىنىن بالاسى باتۋ حانعا تاپسىرىپ كەتكەن اكەسى، ۇلى حانىمىز جوشى دا قازاق جەرىندە جاتقانىن ايتتى.

«جوشى شىڭعىس حاننىڭ ءبىرىنشى ايەلى، قازاق قىزى بورتەدەن تۋعان تۇڭعىش ۇلى. بىرىنشىدەن، جوشى حاننىڭ  ۇلىتاۋدا تاققا وتىرعانىنا 2023 -جىلى 800 جىل تولادى. قازاق مەملەكەتى تاريحىنداعى ەلدىك ماڭىزى ەرەكشە زور بۇل مەرەيتوي مەملەكەتتىك دەڭگەيدە تويلانۋى ءتيىس. مىنە، قازاقستان پرەزيدەنتى ايتقانداي، جوشى حانعا الەم نازارىن اۋدارار ناعىز كەزەڭ باستالدى دەۋگە بولادى. وسىنداي الەم تاريحىندا سالماعى وراسان ساڭلاق تۇلعالار مەن ماڭىزدى زور قالالار وزگە ءبىر ەلدىڭ ەنشىسىندە بولسا نە بولار ەدى؟ ارىگە بارماي-اق مەملەكەت باسشىسى ايتقان كىشكەنتاي موڭعوليانىڭ ءوزى جوشى حاننىڭ اكەسى الەمدى بيلەگەن شىڭعىس حان ارقىلى دۇنيەجۇزىنە ءدۇبىرىن تانىتىپ جاتىر. مۇمكىن ءبىز دە شىڭعىس حاننىڭ الىپ ەسكەرتكىشىندەي جوشى حانعا ودان دا كەم ەمەس ەسكەرتكىش كەشەن تۇرعىزارمىز. ول كەشەندە جوشىنىڭ اناسى بورتە دە، بالاسى باتۋ حان دا، اكەسى شىڭعىس حاننىڭ دا ەسكەرتكىشى تۇرسا ءتىپتى كەرەمەت بولار ەدى. ال  ۇلىتاۋدا مازارى جاتقان جوشى حاننىڭ ەسكەرتكىشىن قازاقستان پرەزيدەنتى قاسىم-جومارت توقايەۆ تۇرعىزىپ جاتسا، ۇلت رۋحى ءدۇر سىلكىنەر دۇنيە بولار ەدى»، - دەدى قازىبەك يسا.

اۆتور: مارلان جيەمباي


سوڭعى جاڭالىقتار