مادەنيەتىمىز بەن داستۇرىمىزدە التىن وردانىڭ مۇراسى بار - داۋرەن ابايەۆ
«قازاق حاندىعىنىڭ 550 جىلدىعىن تويلاۋ ارقىلى ءبىز مەملەكەتتىگىمىزدىڭ تۋۋىن اتاپ وتتىك. مەملەكەتتىك تاقىر جەردەن پايدا بولدى دەۋگە بولمايدى. قازاق ەتنوسى دا 550 جىل بۇرىن پايدا بولعان جوق. بەدەلدى تاريحشىلار قازاق حالقىنىڭ ەتنوگەنەزىنىڭ التىن وردا كەزەڭىندە قالىپتاسقانىن ايتادى. جوشى ۇلىسىنىڭ باسىم بولىگى قازىرگى قازاقستاننىڭ اۋماعىندا ورنالاسقان. كەرەي مەن جانىبەكتەن باستاپ، كەنەسارىعا دەيىنگى بارلىق حاندارىمىز ءدال التىنوردالىق شىڭعىس ۇرپاقتارىنان تاراعان. ءبىزدىڭ مادەنيەتىمىز، ونەرىمىز بەن داستۇرىمىزدە التىن وردانىڭ مۇراسى بار. بۇل انىق. مۇندا تاريح كوكجيەگىن قولدان كەڭەيتۋ جوق، كەرىسىنشە تاريحتى دۇرىس باعامداۋعا تىرىسىپ جاتىرمىز»، - دەدى داۋرەن ابايەۆ.
ەسكە سالا كەتسەك، مەملەكەت باسشىسى قاسىم-جومارت توقايەۆ «ۇلىتاۋ - 2019» حالىقارالىق تۋريستىك فورۋمىندا التىن وردانىڭ 750 جىلدىعىن تويلاۋدى ۇسىندى.
اۆتور: ايجان سەرىكجان قىزى