ءبىلىم مينيسترلىگى ج و و- لارعا قوياتىن تالاپتارىن قايتا قاراۋى كەرەك - توقايەۆ
«ءاربىر اتا- انا بالاسىنىڭ جوعارى ءبىلىم العانىن قالايدى. بۇل وتە دۇرىس قالاۋ ءارى قۇبىلىس. ءبىراق، بۇگىنگى كۇنى ەڭبەك نارىعىنداعى كەلەشەك تۇلەكتىڭ قاجەتتىلىگى ماسەلەسى بارىنشا وزەكتى بولىپ تۇر. ول ءۇشىن جوعارى وقۋ ورىندارىندا ءبىلىمنىڭ جوعارى ساپاسىن قامتاماسىز ەتۋ قاجەت. وقۋ پروتسەسىنىڭ ساپاسىن كوتەرمەي ءبىلىم گرانتتارىن كەزەڭ- كەزەڭىمەن ۇلعايتۋ يگىلىكتەن بىرتىندەپ ىسكە قوسىلاتىن «ميناعا» اينالىپ كەتۋى مۇمكىن»، - دەدى قازاقستان پرەزيدەنتى.
سوندىقتان مەملەكەت باسشىسى جوعارى ءبىلىمنىڭ قولجەتىمدىلىگىن قامتاماسىز ەتەمىز دەپ ءجۇرىپ ونىڭ ديەۆالۆاتسيالانۋىنا جول بەرىپ الماۋ قاجەتتىگىن ەسكەرتتى.
«ۇكىمەت مەملەكەتتىك گرانتتاردىڭ باعاسى مەن ولاردىڭ قازىرگى شىنايى ومىرگە سايكەستىگى ماسەلەسىن تىڭعىلىقتى زەردەلەۋى قاجەت. ءبىلىم جانە عىلىم مينيسترلىگى جوعارى وقۋ ورىندارىنا قوياتىن تالاپتارى مەن نورماتيۆتەرىن قايتا قاراۋى كەرەك. ماسەلەن، جوعارى وقۋ ورىندارىنىڭ وقىتۋشىلارىنا ستۋدەنتتەر سانىنىڭ اراقاتىناسىنا قاتىستى تالاپ سالدارىنان شتاتتار جاساندى ۇلعايتىلۋعا ءماجبۇر»، - دەدى ق. توقايەۆ.
اۆتور مارلان جيەمباي