الماتىدا پوليتسەيدى كولىگىنىڭ ەسىگىنە بايلاپ سۇيرەگەن جۇرگىزۋشى ۇستالدى

وقىس وقيعا 11- تامىز كۇنى 16:00 دە الماتىنىڭ مەدەۋ اۋدانىندا بولعان. «Luxgen-7» ماركالى اۆتوموبيلدىڭ جۇرگىزۋشىسى جول ەرەجەسىن بۇزعانى ءۇشىن توقتاتىلعان. پوليتسەيدىڭ قۇجاتىن تالاپ ەتكەنىنە پىسقىرماي، ول وقيعا ورنىنان ءىزىن سۋىتپاق بولعان.

«جۇرگىزۋشى پاترۋل قىزمەتكەرىنىڭ كولىكتىڭ ەسىگىنە ءىلىنىپ قالعانىنا دا پىسقىرماعان. قايتا گازىن باسىپ، ونى ارى يتەرە باستاعان. وقيعا سالدارىنان پوليتسيا سەرجانتى رۋسلان مۇقاشەۆتىڭ وڭ يىعى سىنىپ، ەڭبەك سۇيەگىنىڭ وڭ جاعى گەماتوما بولعان. ابىروي بولعاندا، قازىر ومىرىنە قاۋىپ ءتونىپ تۇرعان جوق. ول اۋرۋحاناعا جاتقىزىلدى. ىزدەستىرۋ ءبولىمى كۇدىكتىنىڭ تۇلعاسىن بىردەن انىقتادى. ول 1981-جىلى تۋعان ازامات ي. كەشە كەشكىسىن ول ۇستالدى»، - دەپ مالىمدەدى الماتى پوليتسيا دەپارتامەنتىنىڭ جەرگىلىكتى پوليتسيا قىزمەتى باسقارماسى باستىعىنىڭ ورىنباسارى پوليتسيا پودپولكوۆنيگى ەرىك ناسىربەكوۆ.

ەر ادامعا بىرنەشە باپ بويىنشا ايىپ تاعىلىپ وتىر: ق ر قىلمىستىق كودەكسىنىڭ 345-بابىنىڭ 1-بولىگى (اۆتوموبيلدى، تروللەيبۋستى، ترامۆايدى نە باسقا دا مەحانيكالىق كولىك قۇرالىن باسقاراتىن ادامنىڭ جول ءجۇرىسى نەمەسە كولىك قۇرالدارىن پايدالانۋ قاعيدالارىن ابايسىزدا ادامنىڭ دەنساۋلىعىنا اۋىرلىعى ورتاشا زيان كەلتىرۋگە اكەپ سوققان بۇزۋى)؛ ق ر قىلمىستىق كودەكسىنىڭ 380-بابىنىڭ 2-بولىگى (بيلىك وكىلىنە قاتىستى كۇش قولدانۋ)؛ ق ر اكىمشىلىك قۇقىق بۇزۋشىلىق تۋرالى كودەكسىنىڭ 612-بابىنىڭ 1-بولىگى (قۇجاتتارى جوق جانە باسقارۋ قۇقىعى جوق ادامنىڭ كولىك قۇرالىن باسقارۋى).