18:18, 15 - تامىز 2019 | GMT +6
ءالىمحان ۇلىن بورات كەيپىندە تانىستىرعان بوكسشى وتاندىق جانكۇيەرلەردەن كەشىرىم سۇرادى
نۇر-سۇلتان. قازاقپارات - جانىبەك ءالىمحان ۇلىنىڭ الداعى قارسىلاسى كانادالىق بوكسشى ستيۋارد ماكلەللان بارلىق قازاقستاندىقتاردان كەشىرىم سۇرادى دەپ حابارلايدى Sports.kz.
بۇل تۋرالى كانادالىق بىلعارى قولعاپ شەبەرى الەۋمەتتىك جەلىدەگى پاراقشاسىندا جازدى.
«مەن بارلىق قازاقستاندىق جانكۇيەرلەردەن كەشىرىم سۇرايمىن. بوراتتىڭ سۋرەتى سىزدەر ءۇشىن قورلاۋ بولىپ تابىلاتىنىن بىلگەنىم جوق. مەن سىزدەردەن شىن كوڭىلدەن كەشىرىم سۇرايمىن. مەن بۇكىل ەلدىڭ ەمەس، تەك قارسىلاسىمنىڭ شامىنا تيگىم كەلدى»، - دەيدى بوكسشى.
ەسكە سالا كەتسەك، ستيۋارد ماكلەللان ءوزىنىڭ Instagram جەلىسىندەگى پاراقشاسىندا جانكۇيەرلەرىنە جانىبەك ءالىمحان ۇلىن بورات كەيپىندە تانىستىرىپ، 17- تامىزدا لوس-اندجەلەستە جەكپە- ەككە شىعاتىنىن حابارلاعان.
بۇعان قاتىستى قازاقستاندىق سپورتشى دا ءۇنسىز قالماي، كانادالىق قارسىلاسىنىڭ سازايىن بەرەتىنىن مالىمدەدى.