شەتەلدەگى قازاقتاردى مەملەكەتتىك قولداۋ جوباسى ازىرلەندى

ايتا كەتەيىك، ەلباسىنىڭ شەتتەگى جانە ەلگە كوشىپ كەلەتىن اعايىندى جان- جاقتى قولداۋ جانە كومەك بەرۋدىڭ شارالارىن جۇزەگە اسىرۋ تاپسىرماسىن ورىنداۋ ماقساتىندا اتالعان كەڭەس قۇرىلدى.

«كەڭەستىڭ كۇن تارتىبىنە سايكەس، «وتانداستار قورى» تاراپىنان دايىندالعان «قازاق دياسپوراسىن مەملەكەتتىك قولداۋ تۋرالى» زاڭ جوباسىنىڭ تۇجىرىمداماسى سىزدەرگە الدىن الا تاراتىلىپ بەرىلگەن بولاتىن. ونىڭ تۇجىرىمداماسى الەمدىك تاجىريبەدەگى قازىرگى زامانعى ۇردىستەرگە، جيناقتالعان تاجىريبەگە جانە قازاق مەملەكەتىنىڭ، قوعامنىڭ تاياۋ ءارى الىس بولاشاعى تۋرالى عىلىمي، تۇبەگەيلى يدەيالارعا نەگىزدەلىپ ازىرلەنگەن. قازاق دياسپوراسىنىڭ قۇقىقتىق مارتەبەسىن زاڭنامالىق رەتتەۋدىڭ قاجەتتىلىگى شەتەلدە تۇراتىن ەتنيكالىق قازاقتارعا قولداۋ كورسەتۋ ماسەلەلەرىن رەتتەيتىن ءبىرىڭعاي ارنايى قۇقىقتىق اكتىنىڭ جوقتىعىنان تۋىنداپ وتىرعانى بارىمىزگە ءمالىم» ، - دەدى كەڭەس ءتوراعاسى، پارلامەنت ءماجىلىسىنىڭ دەپۋتاتى نۇرلان دۋلاتبەكوۆ.

ءوز كەزەگىندە «وتانداستار قورىنىڭ» ۆيتسە- پرەزيدەنتى ماعاۋيا سارباسوۆ «قازاق دياسپوراسىن مەملەكەتتىك قولداۋ تۋرالى» زاڭ جوباسى تۇجىرىمداما نۇسقاسىنىڭ باستى يدەياسىن ءتۇسىندىردى.

«زاڭ جوباسىنىڭ ماقساتى - شەتەلدە تۇراتىن قازاق دياسپوراسىن مەملەكەتتىك قولداۋ بويىنشا قوعامدىق قاتىناستاردى رەتتەيتىن قۇقىقتىق بازاسىن قالىپتاستىرۋ. دۇنيەجۇزى قازاقتار قاۋىمداستىعىنىڭ مالىمەتىنە سۇيەنسەك، 44 ەلدە 5 ميلليوننان استام قازاق وكىلدەرى تۇرادى ەكەن» ، - دەدى ول.

 م. سارباسوۆتىڭ سوزىنە قاراعاندا، اتالعان زاڭ جوباسى قانداستار ماسەلەلەرىن شەشۋدە ءتيىمدى قۇجاتقا اينالادى. قۇجات اياسىندا «قازاق كارتاسى» ، ياعني تۇلعانىڭ قازاق حالقىنىڭ وكىلى رەتىندە راستايتىن قۇجاتتى ەنگىزۋ كوزدەلگەن. قازاق كارتاسى قازاق ءتىلىن جانە سالت- ءداستۇرىنىڭ ساقتالۋى مەن دامۋىنا، سونداي- اق ءبىزدىڭ ەلگە ەتنيكالىق قازاقتاردىڭ قونىس اۋدارۋىنا سەپتىگىن تيگىزەدى دەگەن سەنىم بار. ونىڭ اتاپ وتۋىنشە، زاڭ جوباسىنىڭ تۇجىرىمداماسىندا قازاق دياسپوراسىن كەشەندى تۇردە مەملەتتىك قولداۋ، سونداي- اق قانداستاردى قولداۋدىڭ نەگىزگى كەپىلدىكتەرىن زاڭ جۇزىندە بەكىتۋ ەسكەرىلگەن. مۇنىمەن قوسا، قازاق دياسپوراسىمەن ەكونوميكالىق جانە مادەني- گۋمانيتارلىق بايلانىستاردى ورناتۋعا جاعداي جاساۋ، قانداستاردى اقپاراتتىق قولداۋدى دامىتۋ، شەتەلدە تۇراتىن قازاقتاردىڭ ەلىمىزدىڭ وقۋ ورىندارىندا ءبىلىم الۋىنا دايىنداۋ ءۇشىن جاعداي جاساۋ شارالارى قامتىلعان.