تۇركيا گرەكيامەن گاز كەن ورىنىنا تالاسىپ قالدى

None
None
نۇر-سۇلتان. قازاقپارات - ەۋرووداق تۇركياعا قارسى سانكسيا سالۋى مۇمكىن. گرەكيا پرەمەر- ءمينيسترى الەكسيس تسيپراس وسىنداي مالىمدەمە جاسادى. ۇكىمەت باسشىسىنىڭ بۇلاي دەپ شۇيلىگۋىنە كيپردىڭ ەكونوميكالىق ايماعىنان تابىلعان گاز كەنى سەبەپ.

 تۇرىكتەر تابىلعان تابيعي بايلىق بىزدىكى دەپ، بۇل اۋماقتا بىردەن بۇرعىلاۋ جۇمىستارىن باستاپ كەتكەن. ال سيپراس رەسمي انكارا بۇل قادامى ارقىلى گرەكيا جانە كيپردىڭ ەگەمەندىك قۇقىعىن بۇزدى دەپ ايىپتادى.

 الەكسيس سيپراس، گرەكيا پرەمەر- ءمينيسترى:

- ءبىزدى ەڭ ءبىرىنشى الاڭداتاتىن ماسەلە ول گرەكتەردىڭ قاۋىپسىزدىگى. تۇركيانىڭ ارانداتۋشىلىعى، زاڭ بۇزۋشىلىعى كۇشتىڭ ەمەس، كەرىسىنشە السىزدەردىڭ ارەكەتى. كيپردىڭ ەكونوميكالىق ايماعىندا انكارانىڭ بۇرعىلاۋ جۇمىستارىن جۇرگىزگەنى انىقتالسا، ءبىز تۇركياعا قارسى سانكسيا سالۋعا دەيىن بارامىز. سەبەبى ەلىمىزدىڭ ەگەمەندىگىنە زالال تيگىزبەك بولعاندار جازاسىز قالمايدى.

 گرەكيا دا وزىنە سەنىمدى. ويتكەنى ارتىندا ەۋرووداق تۇر. ايتا كەتەيىك، كەشە عانا مالتا استاناسى ۆاللەتتا قالاسىندا وداققا مۇشە ەلدەر باس قوستى. ولار ءبىراۋىزدان گرەكيانى قولداپ وتىر. جەتى مەملەكەتتىڭ باسشىسى دا تۇركياعا سەس كورسەتىپ، بۇرعىلاۋ جۇمىستارىن توقتاتۋدى تالاپ ەتتى.

 ەممانۋەل ماكرون، فرانسيا پرەزيدەنتى:

- ءبىز گرەكيانىڭ شاعىمىن تىڭدادىق. شىنىندا كيپر ەگەمەن، تاۋەلسىز مەملەكەت. تۇركيا تاراپى ەكونوميكالىق ايماقتا جۇرگىزىپ جاتقان زاڭسىز ارەكەتتەرىن توقتاتۋى ءتيىس. بۇل بارىپ تۇرعان حالىقارالىق قۇقىقتى بۇزۋشىلىق. ەۋروپالىق وداق بۇل سۇراقتى سوڭىنا دەيىن جەتكىزەتىن بولادى.

جالپى كيپر ارالدارى بۇرىننان داۋ تۋدىرىپ كەلە جاتقان ايماق. تاريحتاعى ءتۇرلى قاقتىعىستار، تالاس- تارتىستاردان كەيىن بۇگىندە اۋماقتىڭ 57,6 پروتسەنتى كيپر رەسپۋبليكاسى سانالادى. ال، 36 پروتسەنتىن جارتىلاي مويىندالعان سولتۇستىك كيپر تۇركيا رەسپۋبليكاسى باسقارادى. سوندىقتان جەرورتا تەڭىزىنىڭ شىعىسىنان تابىلعان تابيعي بايلىق تۇرىكتەرگە تيەسىلى، دەيدى تۇركيا سىرتقى ىستەر ءمينيسترى.

ميەۆليۋت چاۆۋشوگلۋ، تۇركيا سىرتقى ىستەر ءمينيسترى:

 - بۇرىن ءبىز بۇل ايماقتا تەك سەيسميكالىق زەرتتەۋلەر جۇرگىزىپ كەلدىك. سەبەبى بۇرعىلاۋعا قاجەتتى قۇرالدارىمىز بولمادى. قازىر ول تەحنيكامىز بار. سوندىقتان، قازبا جۇمىستارىن باستاپ كەتتىك. گرەكيانىڭ بۇل قادامعا كيلىگەتىندەي شارۋاسى بولماۋ قاجەت. سەبەبى ءبىز حالىقارالىق قۇققىقا ساي ارەكەت ەتىپ وتىرمىز. ءبىز ۇلتى تۇرىك كيپرلىك تۇرعىنداردىڭ قۇقىعىن قورعاۋىمىز كەرەك.

 تۇركيا تاراپىنىڭ ءتۇرلى ەسكەرتۋلەرگە قۇلاق اساتىن ءتۇرى جوق. بۇرعىلاۋ جۇمىستارىن جالعاستىرىپ جاتىر. قۇرال- جابدىقتارىن سايلاپ العان. مۇنى ەستىگەن كيپر رەپۋبليكاسىنىڭ بيلىگى گەولوگيالىق جۇمىستار دەرەۋ توقتاتىلماسا، مۇنداعى مامانداردى تۇتقىندايتىنىن ايتىپ قالدى. بۇعان تۇركيانىڭ دا جاۋابى دايىن ەكەن.

حامي اكسوي، تۇركيا س ءى م باسپا ءسوز حاتشىسى:

 - تۇركيا تاراپى مۇنداي نەگىزسىز جالاعا ءمان بەرمەيدى. ەگەر گرەكيا بيلىگى ايتقاندارىنداي بۇرعىلاۋ جۇمىستارىن جۇرگىزىپ جاتقان توپتى تەمىر تورعا قاماسا، انكارا تيىسىنشە قاتاڭ جاۋاپ قايتاراتىن بولادى.

ءسويتىپ، تۇرىكتەر بۇل بايلىق وزدەرىنە تيەسىلى ەكەندىگىن ايتادى. سونداي- اق ەل اكىمشىلىگى تۇرىك كومپانياسىنا ارنايى ليسەنزيا بەرگەنگە ۇقسايدى. سول سەبەپتى رەدجەپ تاييپ ەردوعان گاز كەنىن بۇرعىلاۋ رەسمي جانە زاڭدى ەكەنىن مالىمدەدى. قاجەت بولسا قارۋلى كۇشتەردىڭ كومەگىمەن جۇرەتىنىن ايتتى.

تاراپتار اراسى بۇرىننان سۋىق. گرەكيا كيپردە تۇرىپ جاتقان گرەكتەردىڭ، تۇركيا كيپردە تۇرىپ جاتقان تۇرىكتەردىڭ قۇقىعىن قورعاعىسى كەلەدى. ساراپشىلاردىڭ ايتۋىنشا، بۇل ماسەلەگە الەمدىك ۇيىمدار ارالاسپاسا، تەكەتىرەستىڭ سوڭى قارۋلى قاقتىعىسقا اكەلۋى مۇمكىن.

www.24.kz

سوڭعى جاڭالىقتار