گەرمانيادا بارلىق اتوم ەلەكتر ستانسالارى تولىقتاي توقتاتىلادى
2011 -جىلدان بەرى جۇمىس ىستەپ تۇرعان 17 ستانسانىڭ قازىر تەك جەتەۋى عانا قولدانىستا. مامانداردىڭ پىكىرىنشە، اتوم قۋاتىن پايدالانۋ ءبىرجولا توقتايدى.
نەمىس بۋندەستاگىنىڭ دەپۋتاتتارى وسىدان سەگىز جىل بۇرىن وسىلاي دەپ ۇيعارعان. مۇنداي شەشىم قابىلداۋعا جاپونيالىق «فۋكۋسيما» ستانساسىنداعى اپات سەبەپ بولعان. وعان قوسا راديواكتيۆتى قالدىقتاردى ساقتاۋ دا قيىنداي ءتۇستى. بۇدان بولەك اتوم ەلەكتر ستانسالارىن سالۋ جانە بۇزۋ قوماقتى قاراجاتتى قاجەت ەتەدى.
قازىرگى تاڭدا كۇن، جەل، سۋ جانە بيوماسسادان ەنەرگيا ءوندىرۋ اناعۇرلىم ءتيىمدى. سوندىقتان گەرمانيا كارى قۇرلىق ەلدەرىنىڭ العاشقىسى بولىپ تولىعىمەن بالامالى قۋات كوزىن پايدالانۋعا كوشەدى.
اتوم ەنەرگياسىنان باس تارتقانداردىڭ قاتارىندا شۆەيساريا، يتاليا، بەلگيا جانە يسپانيا بار.
گيۋنتەر كنابە، ورتالىق ازيا ەلدەرى بويىنشا ساراپشى:
- گەرمانيادا قازىر جۇمىس ىستەپ تۇرعان اتوم ەلەكتر ستانسالارى بىرتىندەپ ءوز جۇمىسىن توقتاتادى. ناقتى شەشىم قابىلدادىق، ەندى ونى وزگەرتپەيمىز. گەرمانيا ەندىگى جەردە اتوم ەنەرگياسىن قولدانبايتىن بولادى. جوعارى تەحنولوگيالى، جان- جاقتى دامىعان گەرمانيا سەكىلدى مەملەكەتتە بالامالى قۋات كوزدەرىنەن ءونىم الۋعا ابدەن بولاتىنىن حالىق بىلەدى. بولاشاقتا اتوم، كومىر جانە مۇنايدى قولدانۋدان تولىعىمەن باس تارتامىز. ءبىر سوزبەن ايتقاندا، گەرمانيادا اتوم ءداۋىرى اياقتالدى.