ەلىمىزدە تۇرمىستىق قاتتى قالدىقتار بويىنشا قانداي پروبلەمالار بار

وسى ورايدا ق ر پرەمەر-ءمينيسترىنىڭ ورىنباسارى جەڭىس قاسىمبەكتىڭ اتىنا دەپۋتاتتىق ساۋال جولداندى، دەپ حابارلايدى قازاقپارات ءتىلشىسى.

«اعىمداعى جىلعى مامىردا قاراعاندى وبلىسىنىڭ حالقىمەن بولعان كەزدەسۋلەردە ەلىمىزدە تۇرمىستىق قاتتى قالدىقتاردى ورنالاستىرۋعا جانە كادەگە جاراتۋعا بايلانىستى قالىپتاسقان جاعداي تۋرالى ماسەلە كوتەرىلدى. الىنعان اقپاراتقا جۇرگىزىلگەن تالداۋ تۇرمىستىق قالدىقتاردى باسقارۋ پروبلەماسى قازاقستاندا وتە وزەكتى ەكەنىن جانە ۇكىمەتتىڭ جەدەل تۇردە ارالاسۋىن تالاپ ەتەتىنىن كورسەتىپ وتىر. قازىرگى ۋاقىتتا قازاقستاندا 3520 ءۇيىندى مەن ت ق ق پوليگونى پايدالانىلادى. ولاردىڭ كوبى ەكولوگيالىق جانە سانيتارلىق تالاپتار مەن نورمالارعا سايكەس كەلمەيدى. ونىڭ ۇستىنە، جۇمىس ىستەپ تۇرعان پوليگونداردىڭ باسىم بولىگى تولىپ كەتكەن»، - دەدى دەپۋتات ارمان قوجاحمەتوۆ.

ونىڭ سوزىنە قاراعاندا، جينالعان تۇرمىستىق قاتتى قالدىقتاردىڭ جيىنتىق كولەمى 100 ميلليون توننادان اسىپ ءتۇستى. جىل سايىن وسى تقق كولەمى 5-6 ميلليونعا ءوسىپ وتىرادى. 2025 -جىلعا قاراي قالدىقتاردى قويمالاۋدىڭ جىلدىق مولشەرى 8 ميلليون تونناعا دەيىن ۇلعايادى دەپ كۇتىلۋدە. بۇل رەتتە قوقىس پوليگوندارعا الدىن الا زارارسىزداندىرۋسىز شىعارىلادى.

«ەنەرگەتيكا مينيسترلىگىنىڭ دەرەكتەرى بويىنشا، قازىرگى تاڭدا ەلىمىزدە قالدىقتاردى سۇرىپتايتىن جانە قايتا وڭدەيتىن 130 كاسىپورىن بار. ولار 20-عا جۋىق ءونىم ءتۇرىن شىعارادى. سۇرىپتاۋ كەشەندەرى 18 ەلدى مەكەندە ورنالاسقان. الايدا، اتالعان كاسىپورىنداردىڭ ءتىزىمىن قارايتىن بولساق، وسى كاسىپورىنداردىڭ ءبارى دەرلىك وبلىس ورتالىقتارى مەن ءىرى قالالاردا ورنالاسقانىن كورۋگە بولادى. ادەتتە، بۇل دارا كاسىپكەرلەر نەمەسە قۋاتى كىشىگىرىم شاعىن كاسىپورىندار، ولار اعىمداعى جيناقتالعان كولەمدەردى دە يگەرە المايدى. وزگە قالالار مەن اۋىلدىق اۋماقتار قوقىستى قايتا وڭدەۋ جونىندەگى سەرۆيسپەن قامتىلماعان»، - دەدى ا. قوجاحمەتوۆ.

دەپۋتاتتىڭ اتاپ وتۋىنشە، ۇلكەن اۋماققا يە بولا وتىرىپ، قازاقستاننىڭ ءار قالادا جانە ءىرى اۋدان ورتالىعىندا قالدىقتاردى قايتا وڭدەۋ جونىندەگى ينفراقۇرىلىمى بولۋى ءتيىس.

وسى ورايدا ول جۇمىس ىستەپ تۇرعان ت ق ق جانە ونەركاسىپتىك قالدىقتار پوليگوندارىن تۇگەندەۋگە، ولاردىڭ زاڭنامانىڭ سانيتارلىق، ەكولوگيالىق نورمالارىنا سايكەستىگىن تەكسەرۋدى ۇسىندى.

ونىڭ ايتۋىنشا، جۇمىس ىستەپ تۇرعان پوليگونداردى سانيتارلىق جانە ەكولوگيالىق تالاپتارعا سايكەس كەلتىرۋ جونىندەگى قاجەتتى جۇمىستاردى، سونداي-اق قالدىقتاردى سۇرىپتاۋعا، قايتا وڭدەۋ مەن كومۋگە ارنالعان قاجەتتى جابدىقتاردى ساتىپ الۋدى قارجىلاندىرۋ كوزدەرىن ايقىنداۋعا باعىتتالعان شارالاردى وتكىزۋ كەرەك.

بۇل تۇرعىدا قوجاحمەتوۆ تۇرمىستىق قاتتى قالدىقتاردى قايتا وڭدەۋ جانە كادەگە جاراتۋ سالاسىنا جەكە ينۆەستيتسيالاردىڭ تارتىلۋىن ىنتالاندىرۋدى ارتتىرۋ قاجەتتىگىن اتاپ ءوتتى.