جاستارعا ايتىپ قويايىن، بىزدە ەڭ كوپ نەكە قازان ايىندا قيىلادى - دالەنوۆ

بۇل تۋرالى بۇگىن حالىقپەن ەسەپتىك كەزدەسۋ وتكىزگەن ۇلتتىق ەكونوميكا ءمينيسترى رۋسلان دالەنوۆ ايتتى، دەپ حابارلايدى قازاقپارات ءتىلشىسى.

«ادامداردىڭ ءجيى اجىراسۋىنا ب ا ق-تىڭ ءجىتى نازار اۋدارىپ كەتۋىنە بايلانىستى تاياۋدا ستاتيستيكاعا كوز جۇگىرتكەن ەدىم. جىل سايىن ەلىمىزدە 140 مىڭ ادام نەكەلەسىپ، وكىنىشكە قاراي 55 مىڭى اجىراسۋعا ءوتىنىش بەرەدى ەكەن. ەگەر نەكە قيۋ ديناميكاسىنا قارايتىن بولساق، شىنىمەن دە ونىڭ تومەندەگەنى بايقالادى»، - دەدى ول.

وسى رەتتە مينيستر نەكەلەسۋدىڭ تومەندەۋى 90- جىلدارداعى دەموگرافيالىق احۋالعا بايلانىستى ەكەنىن ايتتى. سەبەبى، سول جىلدارى دۇنيەگە كەلگەن بۋىننىڭ سانى از بولىپ تۇر.

«ءبىز «بۇدان ءارى نە بولادى؟ 2000 -جىلدارداعى ءبىزدىڭ بەيبي بۋم قايدا؟» دەگەن ساۋالدار توڭىرەگىندە ويلاندىق. بولجامدارعا قارادىق. ەندى 5-6 جىلدان كەيىن ءبىز نەكە قيۋ بويىنشا ەڭ جوعارى شەككە جەتەمىز. 2025 -جىلعا قاراي ەلىمىزدە قيىلاتىن نەكەلەردىڭ سانى 150 مىڭنان اسىپ تۇسەتىن بولادى. قىزىق ءۇشىن، جاس قىزدارعا ايتىپ قويايىن، بىزدە ەڭ كوپ نەكە قازان ايىندا - شامامەن 13,5 مىڭ، ەڭ ازى (8,5 مىڭ) - اقپان ايىندا قيىلادى»، - دەدى رۋسلان دالەنوۆ.