14:35, 19 - ماۋسىم 2019 | GMT +6
وتانعا دەگەن سۇيىسپەنشىلىك جاستاردىڭ باستى باعدارىنا اينالۋى ءتيىس - ق ر پرەزيدەنتى
نۇر-سۇلتان. قازاقپارات - جاسامپازدىق، بەيبىتشىلىك پەن كەلىسىم، حالقىمىزدىڭ بىرلىگى، وتانعا دەگەن سۇيىسپەنشىلىك جانە بارىمىزگە ورتاق تاعدىر جولى - ءبىزدىڭ حالقىمىزدى بىرىكتىرەتىن قۇندىلىقتار.
بۇل قۇندىلىقتار - جاستاردىڭ باستى باعدارىنا اينالۋى ءتيىس. بۇل تۋرالى ق ر پرەزيدەنتى قاسىم-جومارت توقايەۆ قاراعاندى وبلىسىندا ءوتىپ جاتقان «ايبىن» رەسپۋبليكالىق اسكەري-پاتريوتتىق جاستار جيىنىندا ايتتى، دەپ حابارلايدى قازاقپارات اقوردانىڭ twitter-دەگى مالىمەتتەرىنە سۇيەنە وتىرىپ.
«وتانىمىز - ماڭگىلىك ەلدىڭ بەدەلىن ارتتىرا بەرۋ - سەندەرگە ارتىلعان زور ءۇمىت. سوندىقتان، جاستارىمىز ۇلتتىق قۇندىلىقتارىمىزعا ادال بولىپ، قازاقستاننىڭ جەتىستىكتەرىن ەسەلەي بەرەدى دەپ مەن كامىل سەنەمىن. اسكەري-پاتريوتتىق قوزعالىستىڭ باستى ماقساتى - وزدەرىڭىز سياقتى جالىندى جاستاردىڭ باسىن قوسىپ، ەل دامۋىنا قاجەتتى ماڭىزدى جۇمىستارعا بەلسەنە ارالاستىرۋ، كۇش جۇمىلدىرۋ. وتان ءۇشىن ايانباي ەڭبەك ەتۋ جانە ول بارشامىزعا ورتاق ماقسات»، - دەدى مەملەكەت باسشىسى.